ຂາດ​ດຸນ​ການ​ຄ້າ​ຂອງ ສ ອາ​ເມ​ຣິ​ກາ ເພີ່ມ​ຂຶ້ນ

145 10 ກ.ຍ. 2018 ຂ່າວຕ່າງປະເທດ
ຂາດ​ດຸນ​ການ​ຄ້າ​ຂອງ ສ ອາ​ເມ​ຣິ​ກາ ເພີ່ມ​ຂຶ້ນ

      ຕົວ​ເລກ​ຂອງ​ກະຊວງ​ການ​ຄ້າ ສ ອາ​ເມ​ຣິ​ກາ ຊຶ່ງ​ນຳ​ອອກ​ມາ​ເປີດເຜີຍ​ເມື່ອ​ວັນ​ທີ 5 ກັນຍາ ທີ່​ຜ່ານ​ມາ ໃຫ້​ຮູ້​ວ່າ ຂາດ​ດຸນ​ການ​ຄ້າ​ຂອງ ສ ອາ​ເມ​ຣິ​ກາ ໄດ້​ເພີ່ມ​ຂຶ້ນ​ເປັນ 50,1 ຕື້​ໂດ​ລາ​ສະຫະລັດ ໃນ​ເດືອນ​ກໍລະກົດ​ທີ່​ຜ່ານ​ມາ  ຍ້ອນ​ວ່າການ​ນຳ​ເຂົ້າ​ສິນຄ້າ ບັນລຸ​ລະດັບ​ສ້າງ​ສະຖິຕິ.

    ໃນ​ນັ້ນ ການ​ສົ່ງ​ອອກ​ສິນຄ້າ​ຂອງ ສ ອາ​ເມ​ຣິ​ກາ ໄດ້​ຫຼຸດ​ລົງ​ຢ່າງ​ແຮງ​ພາຍ​ໃນ​ເດືອນ​ກໍລະກົດ ທີ່​​ຜ່ານ​ມາ ໃນ​ເມື່ອ​ສິນຄ້າ​ຂອງ ສ ອາ​ເມ​ຣິ​ກາ ປະ​ເຊີນ​ກັບ​ມາດ​ຕະການ​ຕອບ​ໂຕ້​ດ້ານ​ພາສີ ຢູ່​ໃນ​ຫຼາຍ​ປະເທດ. ຄວາມ​ຜິດ​ໂຕນ ລະຫວ່າງ​ການ​ນຳ​ເຂົ້າ ແລະ​ສົ່ງ​ອອກ​ສິນຄ້າ ແລະ​ການ​ບໍລິການ ໄດ້​ເພີ່ມ​ຂຶ້ນ​ກວ່າ 4 ຕື້​ໂດ​ລາ​ສະຫະລັດ ຫຼື​ເທົ່າ​ກັບ 9,5%, ຂຶ້ນ​ເປັນ 50,1 ຕື້​ໂດ​ລາ​ສະຫະລັດ.

    ນີ້​ເປັນ​ເດືອນ​ທີ​ສອງ​ຕິດຕໍ່​ກັນ ທີ່​ຂາດ​ດຸນ​ການ​ຄ້າ​ຂອງ ສ ອາ​ເມ​ຣິ​ກາ ເພີ່ມ​ຂຶ້ນ ຫຼັງ​ຈາກ​ທີ່​ການ​ສົ່ງ​ອອກ​ສິນຄ້າ ພຸ່ງ​ສູນ​ຂຶ້ນ​ໃນ​ເດືອນ​ພຶດສະພາ​ທີ່​ຜ່ານ​ມາ ຊຶ່ງ​ສາມາດ​ທົດ​ແທນ ໃຫ້​ແກ່​ຜົນ​ກະທົບ​ຈາກ​ມາດ​ຕະການ​ດ້ານ​ພາສີ ທີ່​ປະຕິບັດ​ຕໍ່​ຜະລິດ​ຕະ​ພັນ​ຂອງ ສ ອາ​ເມ​ຣິ​ກາ ສົ່ງ​ອອກ​ໄປ​ຍັງ​ຕ່າງປະເທດ.

    ການ​ນຳ​ເຂົ້າ​ສິນຄ້າ​ຂອງ ສ ອາ​ເມ​ຣິ​ກາ ໃນ​ເດືອນ​ກໍລະກົດ​ທີ່​ຜ່ານ​ມາ ເພີ່​​ມ​ຂຶ້ນ 0,9% ຂຶ້ນ​ເປັນ 261,2 ຕື້​ໂດ​ລາ​ສະຫະລັດ ນັບ​ວ່າ​ເປັນ​ລະດັບ​ສ້າງ​ສະຖິຕິ ທັງ​ທາງ​ດ້ານ​ກຳລັງ​ການ​ຊື້​ສິນຄ້າ ແລະ​ການ​ບໍລິການ. ໃນ​ຂະນະ​ດຽວ​ກັນ ການ​ສົ່ງ​ອອກ​ສິນຄ້າ​ໄດ້​ຫຼຸດ​ລົງ 1% ລົງ​ໄປ​ສູ່ 211,1 ຕື້​ໂດ​ລາ​ສະຫະລັດ ໂດຍ​ທີ່​ປະລິມານ​ສິນຄ້າ​ອຸດສາຫະກຳ ແລະ​ນ້ຳມັນ ບັນລຸ​ລະດັບ​ສ້າງ​ສະຖິຕິ.

 

ຂ່າວທີ່ກ່ຽວຂ້ອງ