ລັດຖະບານ​ອັງກິດ ອະນຸຍາດ​ຈ້າງ​ແຮງ​ງານ​ອົບ​ພະ​ຍົບ ຫຼັງ​ຈາກ​ອອກ​ໄປ​ຈາກ EU

131 10 ກ.ຍ. 2018 ຂ່າວຕ່າງປະເທດ
ລັດຖະບານ​ອັງກິດ ອະນຸຍາດ​ຈ້າງ​ແຮງ​ງານ​ອົບ​ພະ​ຍົບ ຫຼັງ​ຈາກ​ອອກ​ໄປ​ຈາກ EU

      ລັດຖະບານ​ອັງກິດ ແຈ້ງ​ໃຫ້​ຮູ້ເມື່ອ​ວັນ​ທີ 6 ກັນຍາ​ທີ່​ຜ່ານ​ມາ ວ່າ​ບັນດາ​ເຈົ້າ​ຂອງ​ຟາມ​ປູກ​ຜັກ ແລະ ​ໝາກ​ໄມ້​ໃນ​ອັງກິດ ຈະ​ໄດ້​ຮັບ​ອະນຸຍາດ​ໃຫ້​ຈ້າງ​ແຮງ​ງານ​ອົບ​ພະ​ຍົບ ທີ່​ມາ​ຈາກ​ບັນດາ​ປະເທດ​ຢູ່​ນອກ​ສະຫະພາບ​ເອີ​ຣົບ (EU) ເມື່ອ​ຄົນ​ເຫຼົ່ານັ້ນ​ໄດ້​ຮັບ​ໜັງສື​ເຂົ້າ​ເມືອງ​ເປັນ​ການ​ຊົ່ວຄາວ. ນີ້​ເປັນ​ວິທີ​ການ​ເພື່ອ​ແກ້​ໄຂ​ສະພາບ​ຂາດແຄນ​ແຮງ​ງານ ໃນ​ໄລຍະ​ທີ່​ອັງກິດ​ຫຍຸ້ງໆ​ກັບ​ການ ຖອນ​ອອກ​ໄປ​ຈາກ EU.

    ການ​ຕົກລົງ​ດັ່ງກ່າວ​ຖືກ​ນຳ​ອອກ​ມາ ທ່າມກາງ​ທີ່​ມີ​ການ​ແຈ້ງ​ເຕືອນ​ນັບ​ມື້​ນັບ​ຫຼາຍ​ຂຶ້ນ ກ່ຽວ​ກັບ ສະພາບ​ຂາດແຄນ​ແຮງ​ງານ ຢູ່​ໃນ​ຂະແໜງການ​ກະສິກຳ​ຂອງ​ອັງກິດ ຊຶ່ງ​ທີ່​ຜ່ານ​ມາ​ຂຶ້ນ​ກັບ​ແຫຼ່ງ ແຮງ​ງານ​ຈາກ​ບັນດາ​ປະເທດ​ສະມາຊິກ EU ຫຼາຍ​ພໍ​ສົມຄວນ ທັງ​ນີ້​ກໍ​ເພາະວ່າ​ການເຄື່ອນໄຫວ ໄປ​ມາ​ຢ່າງ​ເສລີ ຂອງ​ແຫຼ່ງ​ແຮງ​ງານ​ດັ່ງກ່າວ ຈະ​ຢຸດຕິ​ລົງ​ເມື່ອ​ອັງກິດ​ອອກ​ໄປ​ຈາກ EU.

    ເຈົ້າ​ໜ້າທີ່​ອັງກິດ​ເວົ້າ​ວ່າ ແຜນການ​ທົດ​ລອງ​ອອກ​ວີ​ຊາ​ຊົ່ວຄາວ ໃຫ້​ແກ່​ຜູ້​ອົບ​ພະ​ຍົບ ຈາກ​ບັນດາ​ປະເທດ​ຢູ່​ນອກ EU ຈະ​ໄດ້​ຜັນ​ຂະຫຍາຍ​ນັບ​ແຕ່​ລະດູບານໃໝ່​ປີ 2019 ໄປ​ຮອດ ທ້າຍ​ເດືອນ​ທັນວາ ປີ 2020 ຊຶ່ງ​ຕາມ​ນັ້ນແລ້ວ​ກໍ​ແມ່ນ​ແຮງ​ງານ 2.500 ຄົນ​ຢູ່​ໃນ​ປະເທດ​ເຫຼົ່ານັ້ນ ຈະ​ໄດ້​ຮັບ​ອະນຸຍາດ​ເຂົ້າ​ໄປ​ໃນ​ອັງກິດ ໃນ​ໄລຍະ​ເວລາ​ສູງ​ສຸດ​ແມ່ນ 6 ເດືອນ.

    ຕົວ​ເລກ​ຂອງ​ອົງການ​ສະຖິຕິ​ແຫ່ງ​ຊາດ​ອັງກິດ ຊີ້​ໃຫ້​ເຫັນ​ວ່າ ການ​ຜະລິດ​ສະບຽງ​ອາຫານ ເປັນ​ຂົງເຂດ​ການ​ຜະລິດ​ໃຫຍ່​ສຸດ​ຢູ່​ໃນ​ອັງກິດ ໂດຍ​ມີ​ລາຍ​ຮັບ​ບັນລຸ 70 ຕື້​ປອນ (ເທົ່າ​ກັບ​ກວ່າ 90 ຕື້​ໂດ​ລາ​ສະຫະລັດ) ໃນ​ປີ​ກາຍ.

 

ຂ່າວທີ່ກ່ຽວຂ້ອງ