ທ່ານນາຍົກ ຈະເຂົ້າຮ່ວມກອງປະຊຸມເວທີປຶກສາຫາລືເສດຖະກິດໂລກ

183 10 ກ.ຍ. 2018 ຂ່າວໜ້າ​ໜຶ່ງ

    ວັນ​ທີ 11 ກັນ­ຍາ 2018 ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ຈະ​ນຳ­ພາ​ຄະ­ນະ​ເດີນ­ທາງ​ໄປ​ເຂົ້າ​ຮ່ວມກອງ​ປະ­ຊຸມ ​ເວ­ທີ​ປຶກ­ສາ​ຫາ­ລື​ເສດ­ຖະ­ກິດ​ໂລກ ກ່ຽວ​ກັບ​ອາ​ຊຽນ ຄັ້ງ​ທີ 27 ພາຍ​ໃຕ້​ຫົວ­ຂໍ້: ອາ​ຊຽນ 4.0: ການ​ປະ­ກອບ​ການ​ທຸ­ລະ​ກິດ ແລະ ການ​ປະ­ຕິ­ວັດ​ດ້ານ​ອຸດ­ສາ­ຫະ­ກຳ ຄັ້ງ​ທີ 4 ຕາມ​ການ​ເຊື້ອ​ເຊີນ​ຂອງ​ນາ­ຍົກ­ລັດ­ຖະ­ມົນ­ຕີ​ຫວຽດ­ນາມ ແລະ ປະ­ທານ​ອົງ­ການ​ເວ­ທີ​ປຶກ­ສາ​ຫາ­ລື​ເສດ­ຖະ­ກິດ​ໂລກ ທີ່​ຈະ​ຈັດ​ຂຶ້ນ​ວັນ​ທີ 11-13 ກັນ­ຍາ 2018 ທີ່​ຮ່າ​ໂນຍ ສສ ຫວຽດ­ນາມ.

    ກອງ​ປະ­ຊຸມ​ດັ່ງ­ກ່າວ​ຈັດ​ຂຶ້ນ​ທຸກ​ປີ ໂດຍ​ໄດ້​ເຊື້ອ​ເຊີນ​ເອົາ​ບັນ­ດາ​ຜູ້­ນຳ​ຂັ້ນ​ສູງ​ທັງ​ພາກ​ລັດ ຫົວ­ໜ່ວຍ​ທຸ­ລະ​ກິດ​ຈາກ​ທົ່ວ​ໂລກ ຜູ້​ວາງ​ນະ­ໂຍ­ບາຍ​ຈາກ​ຂະ­ແໜງ​ອຸດ­ສາ­ຫະ­ກຳ ບັນ­ດາ​ອົງ​ການ­ຈັດ­ຕັ້ງ​ສາ­ກົນ ແລະ ບຸກ­ຄົນ​ທີ່​ມີ​ຊື່​ສຽງ​ແຖວ​ໜ້າ​ຂອງ​ໂລກ​ເຂົ້າ​ຮ່ວມ ເພື່ອ​ແລກ­ປ່ຽນ​ຄຳ​ຄິດ​ຄຳ​ເຫັນ ແລະ ວິ­ໄສ​ທັດ​ຕາມ​ຫົວ­ຂໍ້​ດັ່ງ­ກ່າວ ແລະ ການ​ຮ່ວມ​ມື​ລະ­ຫວ່າງ​ພາກ​ລັດ ແລະ ເອ­ກະ​ຊົນ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ໃນ​ພາກ​ພື້ນ ແລະ ສາ­ກົນ.

    ນອກ­ຈາກ​ເຂົ້າ​ຮ່ວມ​ກອງ​ປະ­ຊຸມ​ແລ້ວ​ທ່ານ ທອງ​ລຸນ ສີ​ສຸ​ລິດ ຍັງ​ຈະ​ໄດ້​ພົບ​ປະ​ກັບ​ບັນ­ດາ​ຄູ່​ຮ່ວມ​ຕຳ­ແໜ່ງ ລວມ​ທັງ​ທ່ານ​ນາ­ຍົກ­ລັດ­ຖະ­ມົນ­ຕີ​ຫວຽດ­ນາມ ນອກ​ນັ້ນ​ຍັງ​ຕ້ອນ­ຮັບ​ການ​ເຂົ້າ​ຢ້ຽມ​ຄຳ­ນັບ​ຂອງ​ທ່ານ​ປະ­ທານ​ອົງ­ການ​ເວ­ທີ​ປຶກ­ສາ​ຫາ­ລື​ເສດ­ຖະ­ກິດ​ໂລກ ແລະ ບັນ­ດາ​ບໍ­ລິ­ສັດ​ສາ­ກົນ​ທີ່​ມີ​ຊື່​ສຽງ​ຈຳ­ນວນ​ໜຶ່ງ​ທີ່​ມີ​ການ​ລົງ­ທຶນ​ຢູ່​ລາວ.

ຂ່າວທີ່ກ່ຽວຂ້ອງ