ຂ່າວຫຼ້າສຸດ

ຮອງນາຍົກ ຕິດຕາມສະພາບການຟື້ນຟູໄພພິບັດ ຢູ່ເມືອງສະໜາມໄຊ

245 10 ກ.ຍ. 2018 ຂ່າວໜ້າ​ໜຶ່ງ
ຮອງນາຍົກ ຕິດຕາມສະພາບການຟື້ນຟູໄພພິບັດ ຢູ່ເມືອງສະໜາມໄຊ

    ພາຍ­ຫຼັງ​ສຳ­ເລັດ​ການ­ເຄື່ອນ­ໄຫວ​ວຽກ​ງານ​ຢູ່​ແຂວງ​ຈຳ­ປາ​ສັກ​ແລ້ວ ໃນ​ວັນ​ທີ 7 ກັນ­ຍາ 2018 ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ປະ­ທານ​ຄະ­ນະ​ສະ­ເພາະ​ກິດ​ແກ້​ໄຂ​ໄພ­ພິ­ບັດ​ລະ­ດັບ​ຊາດ ພ້ອມ​ດ້ວຍ​ຄະ­ນະ ໄດ້​ເດີນ­ທາງ​ໄປ​ຕິດ­ຕາມ​ສະ­ພາບ​ການ​ແກ້​ໄຂ​ໄພ­ພິ­ບັດ​ຢູ່​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ໂດຍ​ໄດ້​ຮັບ​ການ​ຕ້ອນ­ຮັບ​ຈາກ​ຄະ­ນະ​ນຳ​ແຂວງ​ອັດ​ຕະ​ປື ອຳ­ນາດ​ການ​ປົກ­ຄອງ​ເມືອງ ແລະ ປະ­ຊາ­ຊົນ.

    ໂອ­ກາດ​ດັ່ງ­ກ່າວ ທ່ານ ບຸນ​ໂຮມ ພົມ​ມະ​ສານ ເຈົ້າ­ເມືອງໆ​ໜາມ​ໄຊ ຮອງ​ຫົວ­ໜ້າ​ຄະ­ນະ​ຟື້ນ​ຟູ​ຈັດ​ສັນ​ອາ­ຊີບ ໄດ້​ລາຍ​ງານ​ໃຫ້​ຊາບ​ວ່າ: ມາ​ຮອດ​ປັດ­ຈຸ­ບັນ ວຽກ​ງານ​ການ​ຊອກ​ຄົ້ນ​ຫາ​ຜູ້​ສູນ­ຫາຍ​ໄດ້​ດຳ­ເນີນ​ໄປ​ຢ່າງ​ຕໍ່​ເນື່ອງ ສາ­ມາດ​ພົບ​ຜູ້​ເສຍ​ຊີ­ວິດ​ໄດ້​ທັງ​ໝົດ 40 ຄົນ ໃນ​ນີ້​ເກັບ​ກູ້​ຈາກ​ພາກ​ສະ­ໜາມ​ໄດ້ 34 ສົບ ເສຍ​ຊີ­ວິດ​ຢູ່​ໂຮງ­ໝໍ 6 ສົບ ໄດ້​ສະ­ໜອງ​ເຄື່ອງ​ອຸ­ປະ​ໂພ-ບໍ­ລິ­ໂພກ​ໃຫ້​ຜູ້​ໄດ້​ຮັບ​ຜົນ​ກະ­ທົບ​ເປັນ​ແຕ່​ລະ​ມື້ ບາງ​ຄອບ­ຄົວ​ກໍ່​ໄດ້​ສະ­ໜອງ​ເປັນ​ອາ­ຫານ​ສົດ​ໃຫ້ ເພື່ອ​ນຳ­ໄປ​ປັບ­ປຸງ​ເອງ ບາງ​ຄອບ­ຄົວ​ກໍ່​ໄດ້​ແຕ່ງ­ອາ­ຫານ​ໃຫ້​ກິນ​ຢູ່​ບ່ອນ​ລວມ ເບີກ​ຈ່າຍ​ເງິນ​ແຮ​ໃຫ້​ຜູ້​ໄດ້​ຮັບ​ຜົນ​ກະ­ທົບ​ໄດ້​ຄົບ​ແຕ່​ລະ​ຄອບ­ຄົວ ສຳ­ລັບ​ວຽກ​ງານ​ປະ​ເມີນ​ຄວາມ​ເສຍ​ຫາຍ ໄດ້​ມີ​ການ­ຈັດ­ຕັ້ງ ແລະ ແບ່ງ​ເປັນ 8 ຈຸ ເພື່ອ​ລົງ​ເກັບ​ກຳ​ສະ­ພາບ​ຄວາມ​ເສຍ​ຫາຍ ມາ​ຮອດ​ປັດ­ຈຸ­ບັນ ສາ­ມາດ​ປະ​ເມີນ​ຄວາມ​ເສຍ​ຫາຍ ຈຳ­ນວນ 6 ບ້ານ​ທີ່​ໄດ້​ຮັບ​ຜົນ​ກະ­ທົບ​ໜັກ​ໄດ້ 52% ສ່ວນ​ເນື້ອ­ທີ່​ທຳ​ການ​ຜະ­ລິດ​ຂອງ​ປະ­ຊາ­ຊົນ ຍັງ​ບໍ່​ສາ­ມາດ​ປະ​ເມີນ​ຄວາມ​ເສຍ​ຫາຍ​ໄດ້ ສຳ­ລັບ​ການ​ບຸກ­ເບີກ​ພື້ນ​ທີ່​ຈັດ​ສັນ​ບ່ອນ​ໃໝ່ ເພື່ອ​ໃຫ້​ຜູ້​ໄດ້​ຮັບ​ຜົນ​ກະ­ທົບ​ໄດ້​ສືບ­ຕໍ່​ດຳ­ເນີນ​ການ​ສຳ​ຫຼວດ​ຈຳ­ນວນ​ຄອບ­ຄົວ ແລະ ຜູ້​ປະ­ສົບ​ໄພ ສຳ­ເລັດ 2 ບ້ານ​ຄື: ບ້ານ​ໃໝ່ ແລະ ບ້ານ​ທ່າ​ຫີນ ສຳ­ລັບ​ການ​ກໍ່­ສ້າງ​ທີ່​ພັກ­ຊົ່ວ­ຄາວ ແລະ ຖາ­ວອນ ມີ​ຄື: ຢູ່​ຈຸດ​ດົງ​ບາກ​ໄດ້​ແລ້ວ 2,5% ກໍ່­ສ້າງ​ໂຮງ­ໝໍ​ເມືອງ ປະ­ຕິ­ບັດ​ໄດ້ 14,5% ສຳ­ລັບ​ຈຸດ​ພັກ​ທີ່​ໄດ້​ກຳ­ນົດ​ເມື່ອ​ກ່ອນ ໃນ​ເນື້ອ­ທີ່ 4,8 ເຮັກ­ຕາ ແມ່ນ​ໄດ້​ບຸກ­ເບີກ​ສຳ­ເລັດ​ແລ້ວ 100% ຈຸດ​ບ້ານ​ຕະ​ມໍ​ຢອດ ມີ​ເນື້ອ­ທີ່​ທັງ​ໝົດ 3,66 ເຮັກ­ຕາ ມາ​ຮອດ​ປັດ­ຈຸ­ບັນ​ປະ­ຕິ­ບັດ​ໄດ້ 99% ສຳ­ລັບ​ຈຸດ​ດອນ​ບົກ ແມ່ນ​ໄດ້​ນຳ​ໃຊ້​ກົນ​ຈັກ​ເຂົ້າ​ບຸກ­ເບີກ​ໃນ​ເນື້ອ­ທີ່ 5 ເຮັກ­ຕາ ປະ­ຈຸ​ບັນ​ບຸກ­ເບີກ​ໄດ້ 2,1 ເຮັກ­ຕາ ສ່ວນ​ທີ່​ຍັງ 2,9 ເຮັກ­ຕາ ແມ່ນ​ໄດ້​ບຸກ­ເບີກ​ສຳ­ເລັດ​ແລ້ວ ຈຸດ​ພັກ​ທີ່​ໄດ້​ກຳ­ນົດ​ໃໝ່ ໃນ​ເນື້ອ­ທີ່ 8 ເຮັກ­ຕາ ປັດ­ຈຸ­ບັນ​ບຸກ­ເບີກ​ໄດ້​ແລ້ວ 5,1 ເຮັກ­ຕາ ເທົ່າ​ກັບ 63,75% ສຳ­ລັບ​ຈຸດ​ບ້ານ​ປິນ​ດົງ ໃນ​ຈຳ­ນວນ 4,5 ເຮັກ­ຕາ ແມ່ນ​ໄດ້​ບຸກ­ເບີກ​ແລ້ວ 4,1 ເຮັກ­ຕາ ເທົ່າ​ກັບ 91,11% ສ້ອມ­ແປງ​ເສັ້ນ­ທາງ​ແຕ່​ບ້ານ​ຫີນ​ລາດ ຫາ​ບ້ານ​ຕະ​ມໍ​ຢອດ ປະ­ຕິ­ບັດ​ໄດ້ 54% ບ້ານ​ຕະ​ມໍ​ຢອດ ຫາ​ບ້ານ​ໄຊ​ດອນ​ໂຂງ ປະ­ຕິ­ບັດ​ໄດ້ 54% ສຳ­ຄັນ​ແມ່ນ​ໄດ້​ຍົກ­ຍ້າຍ​ປະ­ຊາ­ຊົນ ມາ​ຢູ່​ເຮືອນ​ພັກ​ເຊົາ​ຊົ່ວ­ຄາວ ຈຳ­ນວນ 100 ກວ່າ​ຄອບ­ຄົວ.

    ໃນ​ໂອ­ກາດ​ນີ້ ທ່ານ ຮອງ​ນາ­ຍົກ ໄດ້​ສະ­ແດງ​ຄວາມ​ຊົມ­ເຊີຍ​ຕໍ່​ອຳ­ນາດ​ການ​ປົກ­ຄອງ ແລະ ທຸກ​ພາກ­ສ່ວນ ອາ­ສາ​ສະ­ຫມັກ​ທັງ​ພາຍ​ໃນ ແລະ ຕ່າງ­ປະ­ເທດ ທີ່​ໄດ້​ເອົາ­ໃຈ­ໃສ່​ເຂົ້າ​ໃນ​ການ​ປະ­ຕິ­ບັດ​ວຽກ​ງານ​ຂອງ​ຕົນ ມີ​ຄວາມ​ຄືບ​ໜ້າ​ເປັນ​ຢ່າງ​ດີ ເພື່ອ​ຊ່ວຍ­ເຫຼືອ ແລະ ການ​ຟື້ນ​ຟູ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ທີ່​ໄດ້​ຮັບ​ຜົນ​ກະ­ທົບ ໃຫ້​ກັບ​ຄືນ​ສູ່​ສະ­ພາບ​ປົກ­ກະ­ຕິ​ໂດຍ​ໄວ ພ້ອມ​ທັງ​ໄດ້​ຊີ້​ນຳ ແລະ ເນັ້ນ​ໜັກ​ໃຫ້​ແກ່​ຄະ­ນະ​ສະ­ເພາະ​ກິດ​ແກ້​ໄຂ​ໄພ​ພິ­ພັດ​ຂັ້ນ​ແຂວງ-ເມືອງ ສືບ­ຕໍ່​ເອົາ­ໃຈ­ໃສ່ ເປັນ­ຕົ້ນ ໃນ​ໄລ­ຍະ​ຮີບ​ດ່ວນ​ນີ້ ໃຫ້​ປັບ­ປຸງ​ວຽກ​ງານ​ການ​ສຶກ​ສາ ແລະ ສະ­ໜອງ​ອຸ­ປະ­ກອນ​ການ​ຮຽນ-ການ​ສອນ​ໃຫ້​ຄົບ​ຖ້ວນ ເພື່ອ​ເຮັດ​ໃຫ້​ນັກ­ຮຽນ​ໄດ້​ເຂົ້າ​ຮຽນ​ຢ່າງ​ເປັນ​ປົກ­ກະ­ຕິ ສືບ­ຕໍ່​ຮັກ­ສາ​ສຸ­ຂະ­ພາບ​ໃຫ້​ຜູ້​ປະ­ສົບ​ໄພ ເອົາ­ໃຈ­ໃສ່​ບຸກ­ເບີກ​ຈັດ​ສັນ​ພື້ນ​ທີ່ ເພື່ອ​ກໍ່­ສ້າງ​ສູນ​ພັກ­ຊົ່ວ­ຄາວ ແລະ ຖາ­ວອນ ພື້ນ​ທີ່​ທຳ​ການ​ຜະ­ລິດ​ຂອງ​ປະ­ຊາ­ຊົນ ປັບ­ປຸງ​ພື້ນ­ຖານ​ໂຄງ​ລ່າງ ໂດຍ​ສະ­ເພາະ ລະ­ບົບ​ໄຟ­ຟ້າ ເສັ້ນ­ທາງ ນ້ຳ​ໃຊ້ ແລະ ສິງ​ອຳ­ນວຍ​ຄວາມ​ສະ­ດວກ​ຕ່າງ ຂຶ້ນ​ບັນ­ຊີ ອອກ​ບັດ ແລະ ຂຶ້ນ​ສຳ­ມະ­ໂນ​ຄົວ​ໃຫ້​ແກ່​ຜູ້​ປະ­ສົບ​ໄພ ພ້ອມ​ທັງ​ສຳ​ຫຼວດ​ຄວາມ​ເສຍ​ຫາຍ​ໃຫ້​ລະ­ອຽດ ແລະ ຊັດ​ເຈນ ກຳ­ນົດ​ເຂດ​ໃດ​ເປັນ​ເຂດ​ທີ່​ໄດ້​ຮັບ​ຜົນ​ກະ­ທົບ​ໜັກ​ເຂດ​ໃດ​ໄດ້​ຮັບ​ຜົນ​ກະ­ທົບ​ລະ­ດັບ​ກາງ ແລະ ລະ­ດັບ​ເບົາ ເພື່ອ​ວາງ​ແຜນ​ຟື້ນ​ຟູ​ແກ້​ໄຂ ແລະ ທົດ​ແທນ​ຄ່າ​ເສຍ​ຫາຍ​ໃຫ້​ປະ­ຊາ­ຊົນ​ສະ­ໜອງ​ເຄື່ອງ​ອຸ­ປະ­ໂພກ-ບໍ­ລິ­ໂພກ​ໃຫ້​ປະ­ຊາ­ຊົນ ໄປ​ຄຽງ​ຄູ່​ກັບ​ການ​ເບີກ​ຈ່າຍ​ເງິນ​ແຮ​ຖົງ​ໃຫ້​ປະ­ຊາ­ຊົນ​ເປັນ​ປົກ­ກະ­ຕິ ສຳ­ຄັນ​ໃນ​ການ​ເບີກ​ເຄື່ອງ​ຂອງ​ບໍ­ລິ­ຈາກ​ໃຫ້​ປະ­ຊາ­ຊົນ ຕ້ອງ​ມີ​ການ​ບັນ­ທຶກ ແລະ ລົງ​ບັນ­ຊີ​ຢ່າງ​ລະ­ອຽດ​ຊັດ​ເຈນ ພ້ອມ​ດຽວ​ກັນ​ນັ້ນ ໃຫ້​ປັບ­ປຸງ​ລະ­ບົບ​ການ­ຈັດ­ຕັ້ງ ແລະ ລະ­ບຽບ​ໃນ​ການ​ຄຸ້ມ​ຄອງ​ສູນ ເອົາ­ໃຈ­ໃສ່​ສ້າງ​ກິດ­ຈະ­ກຳ​ພາຍ​ໃນ​ສູນ​ຢ່າງ​ເປັນ​ປົກ­ກະ­ຕິ ເອົາ­ໃຈ­ໃສ່​ວຽກ​ງານ​ໂຄ­ສະ­ນາ​ປະ­ຊາ­ສຳ­ພັນ​ໃຫ້​ປະ­ຊາ­ຊົນ​ໄດ້​ຮັບ​ຮູ້​ຢ່າງ​ທັນ​ການ ຄົ້ນ­ຄວ້າ ແລະ ສ້າງ​ເງື່ອນ­ໄຂ​ໃນ​ການ​ສ້າງ​ວຽກ​ເຮັດ​ງານ​ທຳ ການ​ທຳ​ການ​ຜະ­ລິດ​ຂອງ​ປະ­ຊາ­ຊົນ​ໃຫ້​ມີ​ຄວາມ​ເໝາະ​ສົມ ສຳ​ຫຼວດ​ຄືນ ການ​ໃຫ້­ການ​ຊ່ວຍ­ເຫຼືອ​ໃນ​ໄລ­ຍະ​ທີ່​ຜ່ານ​ມາ ລວມ​ທັງ​ສັງ​ລວມ​ບັນ­ດາ​ຄວາມ​ຕ້ອງ­ການ​ຕົວ​ຈິງ​ຂອງ​ປະ­ຊາ­ຊົນ ແລະ ສະ­ໜອງ​ອຸ­ປະ­ກອນ​ຫາ​ກິນ​ທີ່​ຈຳ­ເປັນ​ຈຳ­ນວນ​ໜຶ່ງ​ໃຫ້​ປະ­ຊາ­ຊົນ.

ຂ່າວທີ່ກ່ຽວຂ້ອງ