ມາຮອດປັດຈຸບັນ ສາມາດປະກາດຈົບຊັ້ນມັດທະຍົມຕອນຕົ້ນໄດ້ເກືອບທຸກເມືອງ

344 10 ກ.ຍ. 2018 ຂ່າວໜ້າ​ໜຶ່ງ
ມາຮອດປັດຈຸບັນ ສາມາດປະກາດຈົບຊັ້ນມັດທະຍົມຕອນຕົ້ນໄດ້ເກືອບທຸກເມືອງ

    ວັນ​ທີ 6 ກັນ­ຍາ 2018 ທ່ານ​ນາງ ແສງ​ເດືອນ ຫຼ້າ​ຈັນ­ທະ​ບູນ ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ ໄດ້​ຖະ­ແຫຼງ​ຂ່າວ​ໃນ​ໂອ­ກາດ​ວັນ​ສາ­ກົນ​ແຫ່ງ​ການ​ລຶ­ບລ້າງ​ຄວາມ​ບໍ່​ຮູ້​ໜັງ­ສື 8 ກັນ­ຍາ ຄົບ­ຮອບ 53 ປີ (8/9/1965-8/9/2018).

    ທ່ານ​ນາງ ແສງ​ເດືອນ ຫຼ້າ​ຈັນ­ທະ​ບູນ ກ່າວ​ວ່າ: ວັນ​ທີ 8 ກັນ­ຍາ ແມ່ນ​ວັນ​ໜຶ່ງ​ທີ່​ມີ​ຄວາມ​ໝາຍ​ຄວາມ​ສຳ­ຄັນ​ຕໍ່​ກັບ​ປະ­ຊາ​ຊາດ​ທົ່ວ​ໂລກ ໂດຍ​ສະ­ເພາະ ຜູ້​ດ້ອຍ​ໂອ­ກາດ ແລະ ເສຍ​ໂອ­ກາດ​ທາງ​ດ້ານ​ການ​ສຶກ​ສາ ເປັນ­ຕົ້ນ ຄວາມ​ບໍ່​ຮູ້​ໜັງ­ສື ແລະ ການ​ຮຽນ​ບໍ່​ຈົບ​ຂັ້ນ​ພື້ນ­ຖານ ເຮັດ​ໃຫ້​ເປັນ​ບັນ­ຫາ​ທີ່​ທ້າ​ທາຍ​ຕໍ່​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ໃນ​ທົ່ວ​ໂລກ ປີ 1965 ກອງ​ປະ­ຊຸມ​ສາ­ກົນ​ລະ­ດັບ​ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ ທີ່​ເຕ​ເຮ​ຣານ ປະ­ເທດ​ອີ​ຣານ ໄດ້​ຄົ້ນ­ຄວ້າ​ນຳ​ສະ­ເໜີ​ໃຫ້​ມີ​ວັນ​ສາ­ກົນ​ແຫ່ງ​ການ​ລຶ­ບລ້າງ​ຄວາມ​ບໍ່​ຮູ້​ໜັງ­ສື ໂດຍ​ກຳ­ນົດ​ເອົາ​ວັນ​ທີ 8 ກັນ­ຍາ​ທຸກ​ປີ ເປັນ​ວັນ​ສຳ­ຄັນ​ດັ່ງ­ກ່າວ ສຳ­ລັບ​ປະ­ເທດ​ລາວ​ກໍ່​ໄດ້​ເປັນ​ພາ­ຄີ ແລະ ປະ­ກອບ­ສ່ວນ​ຢ່າງ​ຕັ້ງ­ໜ້າ​ເຂົ້າ​ໃນ​ການ​ເປັນ​ສະ­ມາ­ຊິກ ໂດຍ​ສະ­ເພາະ ການ​ປັບ­ປຸງ​ຍົກ​ລະ­ດັບ ແລະ ບຳ­ລຸງ​ການ​ສຶກ​ສາ​ຂັ້ນ​ຕ່າງໆ​ດ້ວຍ​ຄວາມ​ຮັບ­ຜິດ­ຊອບ​ສູງ ໃນ​ວັນ​ທີ 28 ສິງ­ຫາ 2015 ລາວ​ເຮົາ​ສາ­ມາດ​ປະ­ກາດ​ຈົບ​ຊັ້ນ​ປະ­ຖົມ​ບຳ­ລຸງ​ຢ່າງ​ເປັນ​ທາງ​ການ ແລະ ປີ 2018 ຂະ­ແໜງ­ການ​ສຶກ​ສາ​ສາ­ມາດ​ເຮັດ​ສຳ­ເລັດ​ຫຼາຍ​ໜ້າ­ທີ່​ສຳ­ຄັນ ເປັນ­ຕົ້ນ ວຽກ​ງານ​ຍົກ​ລະ­ດັບ​ການ​ສຶກ​ສາ​ໃຫ້​ແກ່​ປະ­ຊາ­ກອນ​ບໍ່​ຮູ້​ໜັງ­ສື ໃນ​ສົກ­ຮຽນ 2017-2018 ປະ­ຊາ­ກອນ​ທີ່​ມີ​ອາ­ຍຸ 15 ປີ​ຂຶ້ນ​ໄປ ຮຽນ​ຈົບ​ລະ­ດັບ​ລຶ­ບລ້າງ​ຄວາມ​ບໍ່​ຮູ້​ໜັງ­ສື ມີ 5.504 ຄົນ ຍິງ 3.003 ຄົນ ແລະ ຮຽນ​ຈົບ​ຊັ້ນ​ປະ­ຖົມ​ບຳ­ລຸງ 15.763 ຄົນ ຍິງ 8.528 ຄົນ ນອກ​ນັ້ນ ຍັງ​ບຳ­ລຸງ​ຊັ້ນ​ມັດ­ທະ­ຍົມ ແລະ ຜູ້​ຮຽນ​ຈົບ​ຊັ້ນ​ມັດ­ທະ­ຍົມ​ຕອນ​ຕົ້ນ ລະ­ບົບ​ບຳ­ລຸງ ໄດ້ 17.613 ຄົນ ຍິງ 7.217 ຄົນ ຈົບ​ຊັ້ນ​ມັດ­ທະ­ຍົມ​ຕອນ​ປາຍ 1.747 ຄົນ ຍິງ 516 ຄົນ ທີ່​ພົ້ນ​ເດັ່ນ​ສາ­ມາດ​ປະ­ກາດ​ຈົບ​ຊັ້ນ​ມັດ­ທະ­ຍົມ​ຕອນ​ຕົ້ນ​ທົ່ວ​ເມືອງ ໄດ້ 112 ເມືອງ​ຈາກ 148 ເມືອງ​ທົ່ວ​ປະ­ເທດ ແລະ ປະ­ກາດ​ຈົບ​ຊັ້ນ​ມັດ­ທະ­ຍົມ​ຕອນ​ຕົ້ນ​ບຳ­ລຸງ​ທົ່ວ​ແຂວງ ໄດ້​ຄື: ນະ­ຄອນ­ຫຼວງ​ວຽງ​ຈັນ ແຂວງ​ໄຊ​ຍະ​ບູ​ລີ ແລະ ແຂວງ​ຊຽງ​ຂວາງ.

ຂ່າວທີ່ກ່ຽວຂ້ອງ