ຂ່າວຫຼ້າສຸດ

ສຶກສາຄວາມເປັນໄປໄດ້ ພັດທະນາແຫຼ່ງທ່ອງທ່ຽວຢູ່ແຂວງໄຊສົມບູນ

416 10 ກ.ຍ. 2018 ຂ່າວໜ້າ​ໜຶ່ງ
ສຶກສາຄວາມເປັນໄປໄດ້ ພັດທະນາແຫຼ່ງທ່ອງທ່ຽວຢູ່ແຂວງໄຊສົມບູນ

    ພິ­ທີ​ເຊັນ​ບົດ​ບັນ­ທຶກ​ຄວາມ​ເຂົ້າ­ໃຈ ເພື່ອ​ສຶກ​ສາ​ຄວາມ​ເປັນ​ໄປ​ໄດ້​ໂຄງ­ການ​ພັດ­ທະ­ນາ​ແຫຼ່ງ​ທ່ອງ​ທ່ຽວ ບໍ່​ນ້ຳ​ອຸ່ນ ບ້ານ​ໜອງ​ພູນ​ໄຊ ເມືອງ​ລ້ອງ​ແຈ້ງ ແລະ ແຫຼ່ງ​ທ່ອງ​ທ່ຽວ​ຖ້ຳ​ເຈົ້າ​ອະ­ນຸ­ວົງ ເມືອງ​ອະ­ນຸ­ວົງ ແຂວງ​ໄຊ​ສົມ­ບູນ ລະ­ຫວ່າງ​ອົງ­ການ​ປົກ­ຄອງ​ແຂວງ​ໄຊ​ສົມ­ບູນ ຕາງ­ໜ້າ​ໂດຍ​ພະ​ແນກ​ແຜນ­ການ ແລະ ການ​ລົງ­ທຶນ​ແຂວງ​ໄຊ​ສົມ­ບູນ ກັບ​ບໍ­ລິ­ສັດ ທີ​ເອັສ​ອີ ວິ­ຊາ​ການ​ກໍ່­ສ້າງ ຈຳ­ກັດ​ຜູ້​ດຽວ ຈັດ​ຂຶ້ນ​ວັນ​ທີ 5 ກັນ­ຍາ 2018 ທີ່​ປົກ­ຄອງ​ແຂວງ​ໄຊ​ສົມ­ບູນ ຮ່ວມ​ລົງ​ນາມ​ລະ­ຫວ່າງ​ທ່ານ ຈັນ​ຖະ­ໜອມ ວົງ​ສົມ​ຈິດ ຫົວ­ໜ້າ​ພະ​ແນກ​ແຜນ­ການ ແລະ ການ​ລົງ­ທຶນ​ແຂວງ ແລະ ທ່ານ ຊາ­ລີ ຊູ​ເຕັກ​ຊິນ ປະ­ທານ​ບໍ­ລິ­ສັດ ທີ​ເອັສ​ອີ​ວິ­ຊາ​ການ​ກໍ່­ສ້າງ ຈຳ­ກັດ​ຜູ້​ດຽວ ມີ​ທ່ານ ພົນ​ຕີ ທອງ​ລອຍ ສີ​ລິ​ວົງ ເຈົ້າ­ແຂວງ​ໄຊ​ສົມ­ບູນ ທ່ານ ບຸນ​ສຸກ ຈອມ​ວິ­ສານ ປະ­ທານ​ສະ­ພາ​ປະ­ຊາ­ຊົນ​ແຂວງ ພ້ອມ​ດ້ວຍ​ການ​ນຳ​ແຂວງ ເມືອງ ແລະ ພາກ­ສ່ວນ​ທີ່​ກ່ຽວ­ຂ້ອງ​ທັງ​ສອງ​ຝ່າຍ​ເຂົ້າ​ຮ່ວມ.

    ໃນ​ພິ­ທີ​ທ່ານ ຈັນ​ຖະ­ໜອມ ວົງ​ສົມ​ຈິດ ໄດ້​ລາຍ​ງານ​ກ່ຽວ​ກັບ​ເນື້ອ​ໃນ​ບົດ​ບັນ­ທຶກ​ຄວາມ​ເຂົ້າ­ໃຈ ເພື່ອ​ກຳ­ນົດ​ສິດ ໜ້າ­ທີ່ ແລະ ພັນ­ທະ​ຕ່າງໆ​ຂອງ​ຄູ່​ຮ່ວມ​ສັນ­ຍາ ໃນ​ການ​ພັດ­ທະ­ນາ​ແຫຼ່ງ​ທ່ອງ​ທ່ຽວ​ຂອງ​ແຂວງ​ໄຊ​ສົມ­ບູນ ຈາກ​ນັ້ນ ທ່ານ​ເຈົ້າ­ແຂວງ​ມີ​ຄຳ​ເຫັນ​ໂດຍ​ໄດ້​ຍົກ​ໃຫ້​ເຫັນ​ເຖິງ​ຄວາມ​ໝາຍ​ຄວາມ​ສຳ­ຄັນ ໃນ​ການ​ສ້າງ­ສາ​ພັດ­ທະ­ນາ​ປະ­ເທດ​ຊາດ ເວົ້າ​ລວມ ເວົ້າ​ສະ­ເພາະ ກໍ່​ຄື ໂຄງ­ການ​ພັດ­ທະ­ນາ​ແຫຼ່ງ​ທ່ອງ​ທ່ຽວ​ບໍ່​ນ້ຳ​ອຸ່ນ ແລະ ແຫຼ່ງ​ທ່ອງ​ທ່ຽວ​ຖ້ຳ​ເຈົ້າ​ອະ­ນຸ­ວົງ ເພື່ອ​ເປັນ​ສະ­ຖານ­ທີ່​ທ່ອງ​ທ່ຽວ​ທາງ​ທຳ​ມະ​ຊາດ ແລະ ປະ­ຫວັດ­ສາດ​ໃນ​ອະ­ນາ­ຄົດ ເພື່ອ​ເຮັດ​ໃຫ້​ແຂວງ​ໄຊ​ສົມ­ບູນ​ໄດ້​ຮັບ​ການ​ພັດ­ທະ­ນາ​ຢ່າງ​ຕໍ່​ເນື່ອງ ແລະ ຈະ­ເລີນ​ກ້າວ­ໜ້າ​ຂຶ້ນ​ເລື້ອຍໆ ພ້ອມ​ນີ້​ທ່ານ​ຍັງ​ໄດ້​ສະ­ແດງ​ຄວາມ​ຂອບ​ອົກ​ຂອບ­ໃຈ​ມາ​ຍັງ​ບໍ­ລິ­ສັດ ທີ​ເອັສ​ອີ​ວິ­ຊາ​ການ​ກໍ່­ສ້າງ ຈຳ­ກັດ​ຜູ້​ດຽວ ທີ່​ປະ­ກອບ­ສ່ວນ​ອັນ​ສຳ­ຄັນ ເຂົ້າ​ໃນ​ການ​ພັດ­ທະ­ນາ​ໂຄງ­ການ​ດັ່ງ­ກ່າວ.

ຂ່າວທີ່ກ່ຽວຂ້ອງ