ຈັດໃຫ້ມີຫຼາຍກິດຈະກຳທີ່ສຳຄັນສະຫຼອງ ທຫລ ຄົບຮອບ 50 ປີ

124 10 ກ.ຍ. 2018 ຂ່າວໜ້າ​ໜຶ່ງ

    ພິ­ທີ​ຖະ­ແຫຼງ​ຂ່າວ​ການ​ກະ­ກຽມ​ຈັດ​ພິ­ທີ​ສະ­ເຫຼີມ­ສະ­ຫຼອງ ວັນ​ສ້າງ­ຕັ້ງ​ທະ­ນາ­ຄານ​ແຫ່ງ ສປປ ລາວ (ທຫລ) ຄົບ­ຮອບ 50 ປີ (7/9/1968-7/9/2018) ຈັດ​ຂຶ້ນ​ວັນ​ທີ 6 ກັນ­ຍາ 2018 ຢູ່ ທຫລ ໂດຍ​ທ່ານ ເພັດ​ສະ­ຖາ­ພອນ ແກ້ວ​ວົງ​ວິ­ຈິດ ຫົວ­ໜ້າ​ຫ້ອງ­ການ ທຫລ ມີ​ຜູ້­ຕາງ­ໜ້າ​ຈາກ​ພາກ­ສ່ວນ​ກ່ຽວ­ຂ້ອງ ແລະ ສື່​ມວນ​ຊົນ​ເຂົ້າ​ຮ່ວມ.

    ທ່ານ ເພັດ​ສະ­ຖາ­ພອນ ແກ້ວ​ວົງ​ວິ­ຈິດ ກ່າວ​ວ່າ: ການ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ ທຫລ ຄົບ­ຮອບ 50 ປີ ຈະ​ຈັດ​ຂຶ້ນ​ວັນ​ທີ 4-5 ຕຸ­ລາ 2018 ຢູ່​ຫໍ​ປະ­ຊຸມ​ແຫ່ງ​ຊາດ ໂດຍ​ມີ​ຈຸດ­ປະ­ສົງ​ເພື່ອ​ສ້າງ​ຄວາມ​ຮັບ​ຮູ້ ແລະ ເຂົ້າ­ໃຈ​ໃຫ້​ສັງ­ຄົມ​ຢ່າງ​ກວ້າງ­ຂວາງ​ຕໍ່​ຜົນ­ງານ​ການ­ເຄື່ອນ­ໄຫວ ວຽກ​ງານ​ພົ້ນ​ເດັ່ນ​ຂອງ​ຂະ­ແໜງ​ທະ­ນາ­ຄານ ທີ່​ໄດ້​ປະ­ກອບ­ສ່ວນ​ໃນ​ການ​ສ້າງ­ສາ​ພັດ­ທະ­ນາ​ປະ­ເທດ​ຊາດ ສ້າງ​ຄວາມ​ຮັບ​ຮູ້​ໃຫ້​ພະ­ນັກ­ງານ​ພາຍ​ໃນ​ຂະ­ແໜງ­ການ​ທະ­ນາ­ຄານ​ແຕ່​ລະ​ຮຸ່ນ ເຂົ້າ­ໃຈ​ເຖິງ​ຄວາມ​ໝາຍ​ຄວາມ​ສຳ­ຄັນ​ຂອງ​ວັນ​ດັ່ງ­ກ່າວ ແລະ ເຫັນ​ເຖິງ​ຜົນ­ສຳ­ເລັດ​ຂອງ​ຕົນ ທີ່​ໄດ້​ປະ­ກອບ­ສ່ວນ​ໃນ​ພາ­ລະ­ກິດ​ຂະ­ແໜງ­ການ​ດັ່ງ­ກ່າວ ເປັນ​ການ​ສ້າງ​ແຮງ​ບັນ­ດານ​ໃຈ ຊຸກ​ຊູ້​ຍູ້​ສົ່ງ­ເສີມ​ໃຫ້​ພະ­ນັກ­ງານ​ຮຸ່ນ​ສືບ​ທອດ ມີ​ຄວາມ​ບຸກ​ບືນ​ຫ້າວ­ຫັນ​ປະ­ກອບ­ສ່ວນ​ພາ­ລະ­ກິດ ພັດ­ທະ­ນາ​ຂະ­ແໜງ­ການ​ທະ­ນາ­ຄານ​ຢ່າງ​ຕັ້ງ­ໜ້າ ໃນ​ສະ­ເພາະ​ໜ້າ ແລະ ຍາວ​ນານ.

    ກິດ­ຈະ­ກຳ​ຫຼັກ​ມີ​ຂະ​ບວນ​ການ​ແຂ່ງ­ຂັນ​ສິ­ລະ​ປະ-ວັນ­ນະ­ຄະ­ດີ​ທົ່ວ​ຂະ­ແໜງ­ການ​ທະ­ນາ­ຄານ ເພື່ອ​ສະ­ແດງ​ໃນ​ພິ­ທີ​ໂຮມ​ຊຸມ­ນຸມ ວາງ­ສະ­ແດງ​ຜົນ­ງານ​ຂອງ​ຂະ­ແໜງ­ການ​ທະ­ນະ​ຄານ ໂດຍ​ຈະ​ມີ​ທະ­ນາ­ຄານ​ທຸ­ລະ​ກິດ​ລັດ ແລະ ພາກ­ສ່ວນ​ຕ່າງໆ ພາຍ​ໃຕ້​ການ​ຄຸ້ມ​ຄອງ​ຂອງ ທຫລ ວັນ​ທີ 4-5 ຕຸ­ລາ 2018 ສ້າງ​ຂະ​ບວນ​ການ​ແຂ່ງ­ຂັນ​ກິ­ລາ​ທົ່ວ​ຂະ­ແໜງ­ການ​ທະ­ນາ­ຄານ ຈະ​ໃຫ້​ສຳ­ເລັດ​ວັນ​ທີ 6 ຕຸ­ລາ 2018.

    ນອກ­ຈາກ​ກິດ­ຈະ­ກຳ​ຫຼັກ​ທີ່​ກ່າວ​ມາ​ນັ້ນ ເພື່ອ​ເຮັດ​ໃຫ້​ສັງ­ຄົມ​ຮັບ​ຊາບ​ວັນ​ສຳ­ຄັນ​ດັ່ງ­ກ່າວ ທຫລ ຍັງ​ໄດ້​ໂຄ­ສະ­ນາ​ເຜີຍ­ແຜ່​ດ້ວຍ​ການ​ອອກ​ປ້າຍ​ຄຳ​ຂວັນ ໃຫ້​ແກ່​ທະ­ນາ­ຄານ​ທຸ­ລະ​ກິດ​ຕິດ​ປະ­ກາດ​ບົດ​ຄວາມ​ສັ້ນ ບົດ​ກອນ​ອວຍ­ພອນ ຂ່າວ​ການ­ເຄື່ອນ­ໄຫວ​ດ້ານ​ວິ­ຊາ​ສະ­ເພາະ ສາຍ​ສາ­ລະ​ຄະ­ດີ​ກ່ຽວ​ກັບ​ວັນ​ສ້າງ­ຕັ້ງ ທຫລ ຜ່ານ​ສື່​ໜັງ​ສິ​ພິມ ວິ­ທະ­ຍຸ ແລະ ໂທລະ­ພາບ ໄປ​ຈົນ​ເຖິງ​ມື້​ສະ­ເຫຼີມ­ສະ­ຫຼອງ.

ຂ່າວທີ່ກ່ຽວຂ້ອງ