ຂ່າວຫຼ້າສຸດ

ໄຊຍະບູລີ ຄັດເລືອກນັກກີລາກະຕໍ້ ຮ່ວມ ຊຽງຂວາງ ເກມ

266 10 ກ.ຍ. 2018 ວົງຈອນກີລາ
ໄຊຍະບູລີ ຄັດເລືອກນັກກີລາກະຕໍ້ ຮ່ວມ ຊຽງຂວາງ ເກມ

    ສະ­ຫະ­ພັນ​ກີ­ລາ​ກະ­ຕໍ້ ແຂວງ​ໄຊ​ຍະ​ບູ​ລີ ຈັດ­ການ​ແຂ່ງ­ຂັນ​ກີ­ລາ​ກະ­ຕໍ້​ທົ່ວ​ແຂວງ ປະ­ຈຳ​ປີ 2018 ຊີງ​ຂັນ​ທ່ານ​ເຈົ້າ­ແຂວງ​ໄຊ​ຍະ​ບູ​ລີ ເພື່ອ​ເປັນ​ການ​ຄັດ​ເລືອກ​ເອົາ​ນັກ­ກີ­ລາ​ທີ່​ມີ​ຄວາມ​ສາ­ມາດ ແລະ ພອນ​ສະ­ຫວັນ​ດີ­ເດັ່ນ ກຽມ​ເປັນ​ຕົວ​ແທນ​ແຂວງ​ເຂົ້າ​ຮ່ວມ​ງານ ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ 11 ທີ່​ແຂວງ​ຊຽງ​ຂວາງ ເປັນ​ເຈົ້າ­ພາບ ລະ­ຫວ່າງ​ວັນ​ທີ 11-21 ພະ­ຈິກ 2018 ນີ້.

    ການ​ແຂ່ງ­ຂັນ​ຄັ້ງ​ນີ້ ມີ​ນັກ­ກີ­ລາ​ທັງ​ໝົດ 8 ທີມ ຈາກ 3 ເມືອງ ຄື: ເມືອງ​ໄຊ​ຍະ​ບູ​ລີ ເມືອງ​ພຽງ ແລະ ເມືອງ​ແກ່ນ​ທ້າວ ເຂົ້າ​ຮ່ວມ​ຄັດ​ເລືອກ ຜົນ​ການ​ແຂ່ງ­ຂັນ ປາ­ກົດ​ວ່າ: ອັນ​ດັບ​ທີ 1 ແມ່ນ​ນັກ­ກີ­ລາ​ຈາກ​ເມືອງ​ພຽງ ໄດ້​ຮັບ​ຂັນ 1 ໜ່ວຍ+ເງິນ­ສົດ 1 ລ້ານ​ກີບ ອັນ​ດັບ​ທີ 2 ທີມ​ນັກ­ກີ­ລາ​ບ້ານ​ດອນ​ໃໝ່ ປະ­ສົມ​ເມືອງ​ໄຊ​ຍະ​ບູ​ລີ ໄດ້​ຮັບ​ຂັນ 1 ໜ່ວຍ+ເງິນ­ສົດ 7 ແສນ​ກີບ ແລະ ອັນ​ດັບ​ທີ 3 ທີມ ນັກ­ກີ­ລາ​ຈາກ​ອົງ­ການ​ໄອ​ຍະ​ການ​ປະ­ຊາ­ຊົນ​ແຂວງ​ໄຊ​ຍະ​ບູ​ລີ ໄດ້​ຮັບ​ຂັນ 1 ໜ່ວຍ+ເງິນ­ສົດ 5 ແສນ​ກີບ.

    ການ​ແຂ່ງ­ຂັນ​ຄັ້ງ​ນີ້ ໄດ້​ສຳ­ເລັດ​ລົງ​ໃນ​ວັນ​ທີ 31 ສິງ­ຫາ​ຜ່ານ​ມາ ຫຼັງ​ດຳ­ເນີນ​ມາ​ເປັນ​ເວ­ລາ 2 ວັນ​ເຕັມ ທີ່​ເດີ່ນ​ກີ­ລາ​ໃນ​ຮົ່ມ​ຂອງ​ແຂວງ ໂດຍ​ໃຫ້​ກຽດ​ເຂົ້າ​ຮ່ວມ ແລະ ມອບ​ລາ­ງວັນ​ຂອງ​ທ່ານ ເພັງ​ນິ​ລັນ ຄຳ​ພັນ​ເພັງ ຮອງ​ເຈົ້າ­ແຂວງ​ໄຊ​ຍະ​ບູ​ລີ ມີ​ທ່ານ ອາ​ເມ​ຊົງ ເຢຍ​ເລັ່ງ ຫົວ­ໜ້າ​ພະ​ແນກ​ຍຸ­ຕິ​ທຳ​ແຂວງ ທັງ​ເປັນ​ປະ­ທານ​ສະ​ຫາ​ພັນ​ກີ­ລາ​ກະ­ຕໍ້​ແຂວງ​ໄຊ​ຍະ​ບູ​ລີ ພ້ອມ​ດ້ວຍ​ບັນ­ດາ​ຫົວ­ໜ້າ-ຮອງ​ຫົວ­ໜ້າ​ພະ​ແນກ ກົມ ກອງ ຄູ​ເຝິກ ນັກ­ກີ­ລາ ແລະ ພາກ­ສ່ວນ​ທີ່​ກ່ຽວ­ຂ້ອງ.

ຂ່າວທີ່ກ່ຽວຂ້ອງ