ຂ່າວຫຼ້າສຸດ

ວິຊຸນນະລາດ ຂຶ້ນເປັນມື 1 ຂອງລາວ ດອກປີກໄກ່ຊາຍ ປີ 2018

212 10 ກ.ຍ. 2018 ວົງຈອນກີລາ
ວິຊຸນນະລາດ ຂຶ້ນເປັນມື 1 ຂອງລາວ ດອກປີກໄກ່ຊາຍ ປີ 2018

    ອີງ​ຕາມ​ຂໍ້​ມູນ​ຈາກ​ເຟດ​ບຸກ​ຂອງ​ສະ­ຫະ­ພັນ​ດອກ​ປີກ​ໄກ່​ແຫ່ງ​ຊາດ​ລາວ ໄດ້​ແຈ້ງ​ໃຫ້​ຊາບ​ວ່າ: ຜ່ານ​ການ­ເຄື່ອນ­ໄຫວ​ຂອງ​ນັກ­ກີ­ລາ​ເຂົ້າ​ຮ່ວມ​ແຂ່ງ­ຂັນ​ພາຍ​ໃນ​ປະ­ເທດ ເຊິ່ງ​ໄດ້​ມີ​ການ​ສະ​ສົມ​ຄະ­ແນນ ໃນ​ໄລ­ຍະ​ທີ່​ຜ່ານ​ມາ ແລະ ເຂົ້າ​ຮ່ວມ​ແຂ່ງ­ຂັນ​ຫຼ້າ​ສຸດ ລາຍ­ການ​ເບຍ​ລາວ ໂອ​ເພັນ 2018 ກໍ່​ສາ­ມາດ​ສະ­ຫຼຸບ​ໄດ້​ນັກ­ກີ­ລາ​ທີ່​ສາ­ມາດ​ຄອງ​ອັນ​ດັບ​ທີ 1 ປະ­ເພດ​ດ່ຽວ​ຊາຍ ໃນ​ປັດ­ຈຸ­ບັນ ຕົກ​ເປັນ​ຂອງ​ທ້າວ ວິ​ຊຸນ​ນະ­ລາດ ພິ­ຈິດ ນັກ­ກີ­ລາ​ມື 2 ຂອງ​ລາວ ຈາກ​ສະ­ໂມ­ສອນ​ດອກ​ປີກ​ໄກ່​ມັນ​ທາ­ຕຸ​ລາດ ພາຍ­ຫຼັງ​ເອົາ​ຊະ­ນະ ທ້າວ ໄຊ​ສົມ​ພອນ ວົງ​ປະ­ຈິດ ທີ່​ເປັນ​ນັກ­ກີ­ລາ​ມື 1 ຂອງ​ລາວ ຈາກ​ສະ­ໂມ­ສອນ​ເຄ​ທີ ໄປ​ແບບ​ຫວຸດ​ຫວິດ 2-1 ເຊັດ ຄອງ​ຂັນ​ຊະ­ນະ​ເລີດ​ດອກ​ປີກ​ໄກ່​ປະ­ເພດ​ຊາຍ​ດ່ຽວ ລາຍ­ການ​ເບຍ​ລາວ ໂອ​ເພັນ 2018 ພ້ອມ​ທັງ​ສາ­ມາດ​ສະ​ສົມ​ໄດ້​ຄະ­ແນນ​ເຕັມ 1.000 ຄະ­ແນນ ສ່ວນ ໄຊ​ສົມ​ພອນ ມີ 965 ຄະ­ແນນ ແລະ ອັນ​ດັບ​ທີ 3 ຕົກ​ເປັນ​ຂອງ​ທ້າວ ວັນ​ພະ​ສອນ ຈາກ​ສະ­ໂມ­ສອນ​ດອກ​ປີກ​ໄກ່​ຕີ່​ນ່າ.

    ສຳ­ລັບ​ດ່ຽວ​ມື 1 ປະ­ເພດ​ຍິງ ປີ​ນີ້​ຕົກ​ເປັນ​ຂອງ​ນັກ­ກີ­ລາ​ນ້ອງ​ໃໝ່ ນາງ ເພັດ​ມະ­ນີ ຈາກ​ແຂວງ​ຄຳ​ມ່ວນ ທີ 2 ນາງ ມີ່​ມີ່ ຈາກ​ສະ­ໂມ­ສອນ​ມັນ​ທາ­ຕຸ​ລາດ ແລະ ທີ 3 ນາງ ອອນ​ລີ​ວັນ ຈາກ​ສະ­ໂມ­ສອນ​ມັນ​ທາ­ຕຸ​ລາດ ສ່ວນ​ມື 1 ປະ­ເພດ​ທີມ​ຄູ່​ຊາຍ ຕົກ​ເປັນ​ຂອງ​ທ້າວ ຣາ​ຊະ​ວົງ+ທ້າວ ດາວ​ມີ ໄຊ ຈາກ​ນະ­ຄອນ­ຫຼວງ​ວຽງ​ຈັນ ທີ 2 ທ້າວ ນາມ​ບຸນ ຫຼວງ​ອາ­ມາດ+ທ້າວ ແສງ​ອາ­ທິດ ຈາກ​ສະ­ໂມ­ສອນ​ລາວ-ຫວຽດ ແລະ ທີ 3 ທ້າວ ວັນ​ປະ­ສິດ+ທ້າວ ສຸ​ລິ​ສັກ ຈາກ​ສະ­ໂມ­ສອນ​ເຄ​ທີ.

    ຂະ­ນະ​ທີ່​ມື 1 ລາວ ປະ­ເພດ​ທີມ​ຄູ່​ຍິງ ຕົກ​ເປັນ​ຂອງ​ນາງ ທິ­ດາ​ຈັນ+ນາງ ສີ​ລິ​ພອນ ຈາກ​ແຂວງ​ໄຊ​ຍະ​ບູ​ລີ ທີ 2 ນາງ ມີ່​ມີ່+ນາງ ອາ­ພາ​ພອນ ຈາກ​ສະ­ໂມ­ສອນ​ຕີ່​ນ່າ ແລະ ທີ 3 ນາງ ມະ­ນີ​ວອນ+ນາງ ພອນ​ພັນ ຈາກ​ສະ­ໂມ­ສອນ​ລາວ-ຫວຽດ­ນາມ.

ຂ່າວທີ່ກ່ຽວຂ້ອງ