ໂຄງການ​ກໍ່ສ້າງ​ທາງ​ລົດໄຟ​ຄວາມ​ໄວ​ສູງ ສິງກະໂປ - ມາ​ເລ​ເຊຍ ຖືກ​ໂຈະ

151 07 ກ.ຍ. 2018 ຂ່າວຕ່າງປະເທດ
ໂຄງການ​ກໍ່ສ້າງ​ທາງ​ລົດໄຟ​ຄວາມ​ໄວ​ສູງ ສິງກະໂປ - ມາ​ເລ​ເຊຍ ຖືກ​ໂຈະ

     ສິງກະໂປ ແລະ ມາ​ເລ​ເຊຍ ໄດ້​ເຫັນ​ດີ​ເປັນ​ເອກະສັນ​ກັນ ກ່ຽວ​ກັບ​ການ​ໂຈະ​ເປັນ​ການ​ຊົ່ວຄາວ ໃນ​ການ​ການ​ຜັນ​ຂະຫຍາຍ​ໂຄງການ​ກໍ່ສ້າງ​ທາງ​ລົດໄຟ​ຄວາມ​ໄວ​ສູງ ແລະ​ວ່າ​ຝ່າຍ​ມາ​ເລ​ເຊຍ ຈະ​ຕ້ອງ​ຈ່າຍ​ຄ່າ​ໃຊ້​ຈ່າຍ​ທີ່​ເກີດ​ຂຶ້ນ​ຍ້ອນ​ການ​ໂຈະ ໂດຍ​ຄາດ​ວ່າ​ຈະ​ໂຈະ​ໄປ​ຮອດ​ເດືອນ​ພຶດສະພາ ປີ 2020 ນັ້ນ.

    ຂ່າວ​ແຈ້ງວ່າ ການ​ຕົກລົງ​ດັ່ງກ່າວ​ໄດ້​ຮັບ​ການ​ລົງ​ນາມ​ລະຫວ່າງ​ທ່ານ ອາ​​ສ​ມິນ ອາລີ ລັດຖະມົນຕີ​ເສດຖະກິດ​ຂອງ​ມາ​ເລ​ເຊຍ ກັບ​ທ່ານ ຄໍ ບອນ ວັນ ລັດຖະມົນຕີ​ຄົມມະນາຄົມ ຂົນສົ່ງ ຂອງ​ສິງກະໂປ ຊຶ່ງ​ມີ​ຂຶ້ນ​ເມື່ອ​ວັນ​ທີ 5 ກັນຍາ​ນີ້.

   ທາງ​ລົດໄຟ​ຄວາມ​ໄວ​ສູງ​ດັ່ງກ່າວ ຄາດ​ວ່າ​ຈະ​ນຳ​ເຂົ້າ​ສູ່​ການເຄື່ອນໄຫວ ພາຍ​ໃນ​ປີ 2031 ແທນ​ທີ່​ຈະ​ແມ່ນ​ໃນ​ປີ 2026 ຕາມ​ແຜນການ​ເບື້ອງ​ຕົ້ນ. ໂຄງການ​ທາງ​ລົດໄຟ​ຄວາມ​ໄວ​ສູງ​ສາຍ​ນີ້ ເປັນ​ການ​ເຊື່ອມ​ຈອດ​ສິງກະໂປ ກັບ​ມາ​ເລ​ເຊຍ ຊຶ່ງ​ລັດຖະບານ​ຂອງ​ສອງ​ປະເທດ ລົງ​ນາມ​ເມື່ອ​ເດືອນ ທັນວາ ປີ 2016 ໃນ​ສະໄໝ​ລັດຖະບານ​ຊຸດ​ກ່ອນ​ຂອງ​ມາ​ເລ​ເຊຍ ໂດຍ​ມີ​ມູນ​ຄ່າ ການ​ລົງທຶນ​ປະມານ 17 ຕື້​ໂດ​ລາ​ສະຫະລັດ.

 

ຂ່າວທີ່ກ່ຽວຂ້ອງ