ຂ່າວຫຼ້າສຸດ

ພະຍາດ​ໄຂ້​ຫວັດ​ໝູ​ລະບາດ​ຢູ່​ໃນ​ລັດ ມະຫາ​ຣາດ ຂອງ​ອິນ​ເດຍ

218 07 ກ.ຍ. 2018 ຂ່າວຕ່າງປະເທດ
ພະຍາດ​ໄຂ້​ຫວັດ​ໝູ​ລະບາດ​ຢູ່​ໃນ​ລັດ ມະຫາ​ຣາດ ຂອງ​ອິນ​ເດຍ

    ພະຍາດ​ໄຂ້​ຫວັດ​ໝູ ໄດ້​ເກີດ​ລະບາດ​ຢູ່​ໃນ​ລັດ​ມະຫາ​ຣາດ (Maharashtra) ຊຶ່ງ​ຕັ້ງ​ຢູ່​ທາງ​ທິດຕາເວັນຕົກ​ຂອງ​ອິນ​ເດຍ ໂດຍ​ມີ​ຂ່າວ​ວ່າ​ມີ​ຜູ້​ຕິດ​ພະນາດ​ຢ່າງ​ໜ້ອຍ 222 ຄົນ. ໃນ​ແຈ້ງ​ການ ທີ່​ມີ​ອອກ​ມາ​ຫຼ້າ​ສຸດ ໃນ​ວັນ​ທີ 5 ກັນຍາ​ນີ້ ເຈົ້າ​ໜ້າທີ່​ໃນ​ທ້ອງຖິ່ນ ໃຫ້​ຮູ້​ວ່າ ມີ 179 ກໍລະນີ​ຖືກ​ກວດ ພົບ​ຫຼັງ​ວັນ​ທີ 1 ສິງຫາ​ທີ່​ຜ່ານ​ມາ ແລະ​ເມື່ອ​ໄລ່​ແຕ່​ຕົ້ນ​ປີ​ນີ້​ເປັນຕົ້ນ​ມາ ສະເພາະ​ແຕ່​ໃນ​ລັດ ມະຫາ​ຣາດ ກໍ​ມີ​ຜູ້​ຕິດພະຍາດ​ດັ່ງ​​​ກ່າວ ເສຍ​ຊີວິດ 48 ຄົນ​ແລ້ວ.

    ສາເຫດ​ທີ່​ເຮັດ​ໃຫ້​ມີ​ຜູ້​ຕິດພະຍາດ​ດັ່ງກ່າວ​ເພີ່ມ​ຂຶ້ນ ໃນ​ເດືອນ​ທີ່​ຜ່ານ​ມາ ແມ່ນ​ຍ້ອນ​ສະພາບ ປຽກ​ຊຸ່ມ ທີ່​ເປັນ​ການ​ສ້າງ​ເງື່ອນໄຂ​ສະ​ດວ​​ກ​ໃຫ້​ແກ່​ໄວ​​ຣັສ​ໄຂ້​ຫວັດ A/H1N1 ພັດທະນາ.

    ໄຂ້​ຫວັດ​ໝູ ເປັນ​ໜຶ່ງ​ໃນ​ບັນດາ​ພະຍາດ​ທາງ​ລະບົບ​ຫາຍໃຈ ທີ່​ເກີດ​ຈາກ​ໄວ​​ຣັສ​ສາຍ​ພັນ
A/H1N1. ນີ້​ເປັນ​ພະ​ຍາດ​​​ທີ່​ອັນຕະລາຍ ໂດຍ​ສະເພາະ​ກໍ​ແມ່ນ​ສຳລັບ​ໝູ ທີ່​ມີ​ອາຍຸ​ແຕ່ 1-5 ອາທິດ. ພະຍາດ​ນີ້​ຕິດຕໍ່​ໄດ້​ໄວ ເຮັດ​ໃຫ້​ໝູ​ທັງ​ຝູງ​ຕິດພະຍາດ​ໄດ້​ໃນ​ເວລາ​ດຽວ​ກັນ. ການ​ລະບາດ​ຂອງ​ພະຍາດ​ນີ້ ມັກ​ເກີດ​ຂຶ້ນ​ກັບ​ຝູງ​ໝູ ບ່ອນ​ຊຶ່ງ​ພະຍາດ​ເຮັດ​ໃຫ້​ເກີດ​ອັດຕາ​ສ່ວນ​ໄຂ້​ສູງ ແຕ່​ບໍ່​ຄ່ອຍ​ເຮັດ​ໃຫ້​ໝູ​ຕາຍ​ໄດ້.

ອາການ​ຕິດພະຍາດ​ໄຂ້​ຫວັດ​ໝູ​ຢູ່​ໃນ​ຄົນ ຄ້າຍຄື​ກັນ​ກັບ​ອາການ​ຂອງ​ໄຂ້​ຫວັດ ແລະ ​ພະຍາດ ທີ່​ຄື​ກັບ​ໄຂ້​ຫວັດ ກໍ​ຄື​ມີ​ອາການ​ໄຂ້​ສູງ ໄອ ເຈັບຄໍ ເຈັບ​ຕາມ​ຕົນ​ໂຕ ອອກ​ເຢັນ ແລະ ​ເມື່ອຍ.

   ສຳລັບ​ຢູ່​ໃນ​ໂລກ​ແລ້ວ ໄຂ້​ຫວັດ​ໝູ ຖືກ​ກວດ​ພົບ​ເປັນ​ເທື່ອ​ທຳ​ອິດ ຢູ່​ໃນ​ເຂດ​ພາກ​ເໜືອ ສ ອາ​ເມ​ຣິ​ກາ ເມື່ອ​ປີ 1918 ຈາກ​ນັ້ນ​ກໍ​ຕິດຕໍ່​ລາມ​ໄປ​ຍັງ​ບັນດາ​ປະເທດ​ໃນ​ເຂດ​ອາ​ເມ​ຣິ​ກາ​ເໜືອ ແລະ​ໃນ​ໂລກ. ໃນ​ປີ​ດຽວ​ກັນ​ນັ້ນ ພະຍາດ​ດັ່ງກ່າວ​ໄດ້​ຕິດຕໍ່​ສູ່​ຄົນ ແລະ ກາຍເປັນ​ການ​ລະບາດ​ຄັ້ງ​ໃຫຍ່ ຢູ່​ໃນ​ບາງ​ປະເທດ ເປັນ​ເຫດ​ໃຫ້​ມີ​ຜູ້​ເສຍ​ຊີວິດ​ຈຳນວນ​ຫຼາຍ.

 

ຂ່າວທີ່ກ່ຽວຂ້ອງ