ຂ່າວຫຼ້າສຸດ

ປາ​ຣາກ​ວາຍ ປະກາດ​ຍ້າຍ​ສະຖານທູດ​ປະຈຳ​ອິດ​ສະ​ຣາ​ແອນ​ກັບ​ໄປ​ຍັງ​ແຕນ​ອາ​ວິບ

259 07 ກ.ຍ. 2018 ຂ່າວຕ່າງປະເທດ
ປາ​ຣາກ​ວາຍ ປະກາດ​ຍ້າຍ​ສະຖານທູດ​ປະຈຳ​ອິດ​ສະ​ຣາ​ແອນ​ກັບ​ໄປ​ຍັງ​ແຕນ​ອາ​ວິບ

     ທ່ານ ລູ​ອິ​​ສ ອານ​ແບກ​ໂຕ ຄາ​​ສ​ຕິກ​ລີ​ໂອ​ນີ ລັດຖະມົນຕີ​ການ​ຕ່າງປະເທດ​ປາ​ຣາກ​ວາຍ ຖະແຫຼງ​ຕໍ່​ຜູ້​ສື່​ຂ່າວ ເມື່ອ​ວັນ​ທີ 5 ກັນຍາ​ນີ້​ວ່າ ປະເທດ​ນີ້​ຈະ​ຍ້າຍ​ສະຖານທູດ​ຂອງ​ຕົນ ປະຈຳ​ອິດ​ສະ​ຣາ​ແອນ ກັບ​ຄືນ​ໄປ​ຍັງ​ແຕນ​ອາ​ວິບ.

    ການ​ຕົກລົງ​ດັ່ງກ່າວ ເປັນ​ການ​ຕ່າວ​ປີ້ນ​ຂໍ້​ຕົກລົງ​ຂອງ​ລັດຖະບານ​ຊຸດ​ກ່ອນ ພາຍ​ໃຕ້​ການ​ນຳ ຂອງ​ປະທານາທິບໍດີ ຮໍ​ຣາ​ຊີ​ໂອ ກາກ​ເຕ​​ສ ທີ່​ມີ​ອອກ​ມາ​ເມື່ອ​ເດືອນ​ພຶດສະພາ​ທີ່​ຜ່ານ​ມາ ກ່ຽວ​ກັບ​ການ ນຳ​ເອົາ​ສຳນັກງານ​ຂອງ​ອົງການ​ການ​ທູດ (ສະຖານທູດ) ຂອງ​ປາ​ຣາກ​ວາຍ ໄປ​ຍັງ​ນະຄອນ ເຈ​ຣູ​ຊາ​ແລມ.

    ທ່ານ ຄາ​​ສ​ຕິກ​ລີ​ໂອ​ນີ ເວົ້າ​ວ່າ ນີ້​ເປັນ​ການ​ຕົກລົງ​ຂອງ​ທ່ານ ມາ​ຣີ​ໂອ ອັບ​ໂດ ປະທານາທິບໍດີ ຄົນ​ໃໝ່​ຂອງ​ປາ​ຣາກ​ວາຍ ຜູ້​ຊຶ່ງ​ເຂົ້າ​ພິທີ​ສາບານ​ຕົນ​ຮັບ​ຕຳແໜ່ງ ເມື່ອ​ວັນ​ທີ 15 ສິງຫາ​ ທີ່​ຜ່ານ​ມາ ທັງ​ນີ້​ກໍ​ເພື່ອ​ເປັນ​ການ​ປະກອບສ່ວນ​ຄວາມ​ພະຍາຍາມ​ທາງ​ດ້ານ​ການ​ທູດ ຂອງ​ພາກ​ພື້ນ ແລະ​ສາກົນ ເພື່ອ​ໃຫ້​ບັນລຸ​ພື້ນຖານ​ສັນຕິພາບ​ທີ່​ກວ້າງຂວາງ ຍຸຕິ​ທຳ ແລະ​ຍາວ​ນານ​ຢູ່​ໃນ​ເຂດ​ຕາເວັນ​ອອກ​ກາງ. ທ່ານ ຄາ​​ສ​ຕິກ​ລີ​ໂອ​ນີ ໃຫ້​ຮູ້​ວ່າ ການ​ຕົກລົງ​ຍ້າຍ​ສະຖານທູດ​ຂອງ​ປາ​ຣາກ​ວາຍ ກັບ​ໄປ​ຍັງ​ແຕນ​ອາ​ວິບ ຈະ​ມີ​ຜົນ​ບັງຄັບ​ໃຊ້​ທັນທີ.

   ລັດຖະບານ​ອິດ​ສະ​ຣາ​ແອນ ມີ​ປະຕິກິລິຍາ​ອອກ​ມາ​ທັນທີ ໃນ​ວັນ​ດຽວ​ກັນ ໂດຍ​ຖະແຫຼງ​ວ່າ ວ່າ​ຈະ​ປິດ​ສະຖານທູດ​ຂອງ​ອິດ​ສະ​ຣາ​ແອນ ປະຈຳ​ປາ​ຣາກ​ວາຍ. ແຈ້ງ​ການ​ຂອງ​ກະຊວງ ການ​ຕ່າງປະເທດ​ອິດ​ສະ​ຣາ​ແອນ ໃຫ້​ຮູ້​ວ່າ ນາຍົກລັດຖະມົນຕີ ອິດ​ສະ​ຣາ​ແອນ ເບນ​ຈາ​ມິນ ເນ​ຕັນ​ຢາ​ຮູ ໄດ້​ຊີ້​ນຳ​ໃຫ້​ກະຊວງ​ການ​ຕ່າງປະເທດ ດຳເນີນ​ບາດກ້າວ​ທີ່​ຈຳເປັນ ເພື່ອ​ໃຫ້​ຢຸດ​ການ ເຄື່ອນ​ໄຫວ​ຂອງ​ອົງການ​ຜູ້ຕາງໜ້າ​ທາງ​ດ້ານ​ການ​ທູດ​ຂອງ​ຕົນ ປະຈຳ​ນະຄອນຫຼວງ ອາ​ຊັນ​ໂຊນ ຂອງ ປາ​ຣາກ​ວາຍ ໂດຍ​ຖື​ວ່າການ​ກະທຳ​ຂອງ​ປາ​ຣາກ​ວາຍ ເປັນ​ເລື່ອງ “ຮ້າຍ​ແຮງ​ຢ່າງ​ຍິ່ງ” ເຮັດ​ໃຫ້​ເກີດ ຄວາມ​ເສຍ​ຫາຍ​ຕໍ່​ການ​ພົວພັນ​ລະຫວ່າງ​ສອງ​ຝ່າຍ.

 

ຂ່າວທີ່ກ່ຽວຂ້ອງ