ຂ່າວຫຼ້າສຸດ

ຊົມເຊີຍ ! ການຈັດສັນລະບຽບປ້າຍ

577 07 ກ.ຍ. 2018 ນານາສາລະ

    ໄລ­ຍະ​ນີ້ ເວ­ລາ​ຂີ່​ລົດ​ຜ່ານ​ໄປ​ຫຼາຍ​ສະ­ຖານ­ທີ່ ຈະ​ເຫັນ​ເຈົ້າ​ໜ້າ­ທີ່​ຕຳ­ຫຼວດ ແລະ ພະ­ນັກ­ງານ​ທີ່​ກ່ຽວ­ຂ້ອງ​ການ​ຈັດ​ສັນ​ລະ­ບຽບ​ປ້າຍ ຢືນ​ເປັນ​ກຸ່ມ ເພື່ອ​ເຮັດ​ວຽກ​ຈັດ​ສັນ​ລະ­ບຽບ​ປ້າຍ​ຕາມ​ໜ້າ​ຮ້ານ ບ້ານ​ເຮືອນ​ຂ້າງ​ຖະ­ໜົນ ເພື່ອ​ຄວາມ​ເປັນ​ລະ­ບຽບ​ຈົບ­ງາມ ເຊິ່ງ​ຜູ້​ເສຍ​ປະ­ໂຫຍດ​ກໍ່​ຄົງ​ຈະ​ຄິດ​ບໍ່​ພໍ­ໃຈ​ແນ່ ແຕ່​ຖ້າ​ຈະ​ຄິດ​ແບບ​ສ່ວນ​ລວມ ເພື່ອ​ຄວາມ​ເປັນ​ລະ­ບຽບ​ຈົບ­ງາມ​ຂອງ​ບ້ານ​ເມືອງ ກໍ່​ຕ້ອງ​ບອກ​ເປັນ​ສຽງ​ສ່ວນ​ໃຫຍ່​ວ່າ ຂໍ​ຊົມ­ເຊີຍ​ການ­ຈັດ­ຕັ້ງ ແລະ ເຈົ້າ​ໜ້າ­ທີ່ ເຊິ່ງ​ພວກ​ເພິ່ນ​ຕັ້ງ­ໃຈ​ປະ­ຕິ­ບັດ​ໃຫ້​ໄດ້​ເຫັນ​ເຖິງ​ຄວາມ​ເຂັ້ມ​ງວດ​ເລື່ອງ​ລະ­ບຽບ​ປ້າຍ.

    ຜູ້​ຂຽນ​ຈຶ່ງ​ຂໍ​ຝາກ​ຕື່ມ​ວ່າ: ເທົ່າ​ທີ່​ໄດ້​ຍິນ​ຫາງ​ສຽງ​ສັງ­ຄົມ​ສ່ວນ​ໃຫຍ່ ແມ່ນ​ອອກ­ປາກ​ຍ້ອງ­ຍໍ​ຊົມ­ເຊີຍ ຂໍ​ໃຫ້​ທາງ​ການ​ລົງ­ມື​ປະ­ຕິ­ບັດ​ໃຫ້​ທົ່ວ​ເຖິງ ເພາະ​ຄົນ​ສ່ວນ​ໃຫຍ່​ໃນ​ສັງ­ຄົມ​ຕ່າງ​ກໍ່​ເລງ​ເຫັນ​ຄວາມ​ຈົບ­ງາມ ຄວາມ​ເປັນ​ລະ­ບຽບ​ຖືກ­ຕ້ອງ ເຮັດ​ແລ້ວ​ບໍ່​ຕ້ອງ​ອາຍ​ຕ່າງ­ປະ­ເທດ ເພາະ 2018 ເປັນ​ປີ​ທ່ອງ​ທ່ຽວ ໃຜໆ​ກໍ່​ຢາກ​ເຫັນ​ບ້ານ​ເຮືອນ​ຕົນ​ເອງ​ສະ­ອາດ​ຈົບ­ງາມ ບັນ­ຫາ​ທາງ​ຍ່າງ ຫຼື ພໍ່­ຄ້າ​ແມ່​ຂາຍ​ໄດ້​ວາງ​ເຄື່ອງ​ຂອງ​ຕັນ​ທາງ​ນີ້​ແກ່­ຍາວ​ມາ​ດົນ ຜ່ານ​ມາ​ເຫັນ​ວ່າ​ເຈົ້າ​ໜ້າ­ທີ່​ໄດ້​ພະ­ຍາ­ຍາມ​ແກ້​ໄຂ​ຢ່າງ​ລຽນ­ຕິດ ແຕ່​ປາ­ກົດ​ວ່າ​ຕົກ​ໃນ​ລັກ­ສະ­ນະ​ແກ້​ບ່ອນ​ຫັ້ນ​ຍັງ​ບ່ອນ​ນີ້ ແຕ່​ການ​ດຳ­ເນີນ​ການ​ຈັດ​ສັນ​ຄັ້ງ​ນີ້ ຄົງ​ຈະ​ເປັນ​ການ​ແກ້​ໄຂ​ແບບ​ຖາ­ວອນ ແລະ ເຂົ້າ­ໃຈ​ວ່າ​ປະ­ຊາ­ຊົນ​ທຸກ​ພາກ­ສ່ວນ​ຕ້ອງ​ເຫັນ­ແກ່​ສ່ວນ​ລວມ.

    ຜູ້​ຂຽນ​ຍັງ​ຢາກ​ຝາກ​ໜ່ວຍ​ງານ​ກ່ຽວ­ຂ້ອງ​ຕື່ມ ເລື່ອງ​ການ​ຈອດ​ລົດ​ບາງ​ສະ­ຖານ­ທີ່​ຍັງ​ມີ​ການ​ເກັບ​ປີ້ ເຊິ່ງ​ຫຼາຍ​ຄົນ​ຕ່າງ​ກໍ່​ຄິດ​ວ່າ ບາງ​ສະ­ຖານ­ທີ່​ເປັນ​ຂອງ​ສ່ວນ​ລວມ ຫຼື ເປັນ​ສະ­ຖານ­ທີ່​ບໍ່​ຄວນ​ເກັບ​ປີ້ ເຊິ່ງ​ຜູ້​ສັນ­ຈອນ​ຜ່ານ​ກາຍ­ໄປ​ວຽກ​ກໍ່​ຢາກ​ຈອດ​ຊື້​ເຄື່ອງ​ຂອງ​ຈຳ­ເປັນ ແຕ່​ປາ­ກົດ​ມີ​ຄົນ​ເກັບ​ປີ້ ສົ່ງ​ປີ້​ໃຫ້​ເລື່ອງ​ນີ້​ຍັງ​ປາ­ກົດ​ມີ​ຫາງ​ສຽງ (ເວົ້າ​ສະ­ເພາະ​ບາງ​ສະ­ຖານ­ທີ່​ທີ່​ເຫັນ​ວ່າ​ເປັນ​ຂອງ​ລວມ​ບໍ່​ເໝາະ​ສົມ) ເຂົ້າ­ໃຈ​ວ່າ​ປະ­ຊາ­ຊົນ​ກໍ່​ສາ­ມາດ​ເປັນ​ຝ່າຍ​ສະ­ທ້ອນ​ຫາງ​ສຽງ ເພື່ອ​ເລັງ​ໃສ່​ຄວາມ​ຍຸ­ຕິ​ທຳ ແລະ ຄວາມ​ເໝາະ​ສົມ.

    ສັງ​ລວມ​ວ່າ ການ​ຈັດ​ສັນ​ລະ­ບຽບ​ປ້າຍ ແລະ ທາງ​ຍ່າງ​ແມ່ນ​ໄດ້​ຮັບ​ຄວາມ​ຍ້ອງ­ຍໍ​ຊົມ­ເຊີຍ ຈາກ​ຫຼາຍ​ພາກ­ສ່ວນ​ເພາະ​ມັນ​ແມ່ນ​ຄວາມ​ຈົບ­ງາມ​ຂອງ​ທຸກ​ຄົນ ທີ່​ເປັນ​ເຈົ້າ​ຂອງ​ປະ­ເທດ ຂໍ​ແຕ່​ວ່າ​ເປັນ​ການ​ພັດ­ທະ­ນາ​ແບບ​ຍືນ​ຍົງ ບໍ່​ແມ່ນ​ວ່າ​ຈັດ​ສັນ​ໄປ​ຂ້າງ​ໜ້າ​ພໍ​ງວາກ​ມາ​ຄືນ​ຫຼັງ​ຍັງ​ເຮັດ​ຄື­ເກົ່າ ແບບ​ນີ້​ຄື​ຊິ​ບໍ່​ມີ​ນໍ ! ສຳ­ຄັນ​ແມ່ນ​ການ​ເລາະ​ກວດ­ກາ​ຕິດ­ຕາມ​ເປັນ​ປະ­ຈຳ ເພື່ອ​ປ້ອງ​ກັນ​ພວກ​ຫົວ­ລ້ານ​ລື່ນ​ຄູ! ພວກ​ເຫັນ­ແກ່​ປະ­ໂຫຍດ​ບໍ່​ຟັງ​ລະ­ບຽບ​ກົດ­ໝາຍ.

ຂ່າວທີ່ກ່ຽວຂ້ອງ