ຂ່າວຫຼ້າສຸດ

ທ່ານນາຍົກ ຕິດຕາມສະພາບນ້ຳຖ້ວມ ຢູ່ແຂວງວຽງຈັນ

349 07 ກ.ຍ. 2018 ຂ່າວໜ້າ​ໜຶ່ງ
ທ່ານນາຍົກ ຕິດຕາມສະພາບນ້ຳຖ້ວມ ຢູ່ແຂວງວຽງຈັນ

    ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ພ້ອມ​ດ້ວຍ​ຄະ­ນະ ໄດ້​ລົງ​ເຄື່ອນ​ໄຫວ​ຕິດ­ຕາມ​ສະ­ພາບ​ນ້ຳ​ຖ້ວມ ແລະ ຢ້ຽມ­ຢາມ​ປະ­ຊາ­ຊົນ ຢູ່​ເມືອງ​ທຸ­ລະ​ຄົນ ແຂວງ​ວຽງ​ຈັນ ໃນ​ວັນ​ທີ 6 ກັນ­ຍາ 2018 ຖືກ​ຕ້ອນ­ຮັບ​ໂດຍ​ທ່ານ ວິ​ດົງ ໄຊ​ຍະ​ສອນ ເຈົ້າ­ແຂວງ​ວຽງ​ຈັນ ພ້ອມ​ດ້ວຍ​ຄະ­ນະ​ນຳ​ແຂວງ ເມືອງ ອຳ­ນາດ​ການ​ປົກ­ຄອງ​ບ້ານ ແລະ ພໍ່​ແມ່​ປະ­ຊາ­ຊົນ.

    ອີງ­ໃສ່​ສະ­ພາບ​ຂອງ​ຟ້າ​ຝົນ​ໃນ​ປີ​ນີ້ ແມ່ນ​ມີ​ຄວາມ​ແຕກ​ຕ່າງ​ຈາກ​ຊຸມ​ປີ­ຜ່ານ­ມາ ປະ­ລິ­ມານ​ນ້ຳ​ຝົນ​ມີ​ຫຼາຍ ສະ­ນັ້ນ ອົງ­ການ​ປົກ­ຄອງ​ແຂວງ ແລະ ອົງ­ການ​ປົກ­ຄອງ​ເມືອງ ໄດ້​ມີ​ການ​ຄາດ​ຄະ­ເນ​ອາດ​ຈະ​ເກີດ​ເຫດ­ການ​ນ້ຳ​ຖ້ວມ ຢູ່​ພາຍ​ໃນ​ແຂວງ​ວຽງ​ຈັນ ໂດຍ​ສະ­ເພາະ​ແມ່ນ​ເຂດ​ລ່ອງ​ນ້ຳ​ງື່ມ ເມືອງ​ທຸ­ລະ​ຄົນ ເພື່ອ​ກຽມ​ຄວາມ​ພ້ອມ​ຮັບ​ມື​ໄພ­ພິ­ບັດ​ດັ່ງ­ກ່າວ ຈຶ່ງ​ໄດ້​ມີ​ການ​ແຕ່ງ­ຕັ້ງ​ຄະ­ນະ​ກຳ­ມະ­ການ​ໄພ­ພິ­ບັດ​ຂັ້ນ​ແຂວງ ແລະ ຂັ້ນ​ເມືອງ​ຂຶ້ນ ໂດຍ​ປະ­ກອບ​ມີ​ບັນ­ດາ​ຂະ­ແໜງ­ການ​ກ່ຽວ­ຂ້ອງ​ຄົບ​ຊຸດ ເພື່ອ​ເຮັດ​ໜ້າ­ທີ່​ບໍ­ລິ­ການ​ຮັບ​ໃຊ້​ປະ­ຊາ­ຊົນ ແລະ ປະ­ສານ​ງານ​ກັບ​ຂະ­ແໜງ­ການ​ກ່ຽວ­ຂ້ອງ​ຕ່າງໆ ໃນ​ນັ້ນ ມີ​ຄະ­ນະ​ຊີ້​ນຳ ແລະ ວິ­ຊາ​ການ​ສຳ­ລັບ​ຊ່ວຍ​ປະ­ຊາ­ຊົນ​ຂົນ​ຍ້າຍ​ເຄື່ອງ​ຂອງ​ໄວ້​ບ່ອນ​ສູງ ຍ້າຍ​ສັດ­ລ້ຽງ ແລະ ເກັບ​ກຳ​ສັງ​ລວມ​ບັນ­ດາ​ຜົນ​ເສຍ​ຫາຍ​ຈາກ​ໄພ­ພິ­ບັດ​ນ້ຳ​ຖ້ວມ ພ້ອມ​ທັງ​ສັງ​ລວມ​ລາຍ​ງານ​ຄະ­ນະ​ກຳ­ມະ­ການ​ໄພ­ພິ­ບັດ​ຂັ້ນ​ຕ່າງໆ ເນື່ອງ​ຈາກ​ບໍ­ລິ­ເວນ​ພື້ນ​ທີ່​ເຂດ​ເມືອງ​ທຸ­ລະ­ຄົມ ແມ່ນ​ຢູ່​ກ້ອງ​ເຂື່ອນ​ໄຟ­ຟ້າ​ນ້ຳ​ງື່ມ 1 ມີ​ການ​ລະ­ບາຍ​ນ້ຳ​ອອກ​ຈາກ​ອ່າງ ພ້ອມ​ນີ້​ການ​ນຳ​ເມືອງ ແລະ ຂະ­ແໜງ­ການ​ກ່ຽວ­ຂ້ອງ ຍັງ​ໄດ້​ຮ່ວມ​ກັບ​ທີມ​ງານ​ຂອງ​ເຂື່ອນ​ໄຟ­ຟ້າ​ນ້ຳ​ງື່ມ 1 ລົງ​ສ້າງ​ແຜນ​ຮອງ​ຮັບ​ໄພ​ນ້ຳ​ຖ້ວມ ໃນ​ຈຳ­ນວນ 16 ບ້ານ ທີ່­ຢູ່​ກ້ອງ​ເຂື່ອນ ໂດຍ​ໄດ້​ລົງ​ເຮັດ​ວຽກ​ກັບ​ກຸ່ມ​ບ້ານ ນາຍ­ບ້ານ​ໃນ​ການ​ກຳ­ນົດ​ຈຸດ​ຂົນ​ຍ້າຍ​ໄປ​ຈຸດ​ປອດ​ໄພ.

    ບ້ານ​ທີ່​ຖືກ​ຜົນ​ກະ­ທົບ​ປັດ­ຈຸ­ບັນ​ມີ 16 ບ້ານ​ຄື: ບ້ານ​ຫາດ​ສວນ ຕານ​ປ່ຽວ ສຸກ­ສາ­ລາ​ບ້ານ​ຈຸ້ມ ບ້ານ​ແຈ້ງ ຫາດ​ສ້ຽວ ໂພນ​ແພງ ຫຼິ່ງ​ຊັນ ບຸງ​ພ້າວ ຫາດ​ໄຊ ນາ​ຄອງ ຖິ່ນ​ຄຳ ໂພນ​ແຮ່ ບ້ານ​ເກີນ​ໃຕ້ ບ້ານ​ເກີນ​ກາງ ບ້ານ​ເກີນ​ເໜືອ ແລະ ຄຸ້ມ​ຫາດ​ນ້ອຍ ສຳ­ລັບ​ບ້ານ​ທີ່​ນ້ຳ​ຍັງ​ຖ້ວມ​ຂັງ​ມີ 11 ບ້ານ.

    ມາ​ຮອດ​ປັດ­ຈຸ­ບັນ ນ້ຳ​ງື່ມ​ໄດ້​ເພີ່ມ​ຂຶ້ນ​ຢ່າງ​ໄວ­ວາ ຈາກ​ການ​ລະ­ບາຍ​ນ້ຳ​ຈາກ​ອ່າງ​ນ້ຳ​ງື່ມ​ບວກ​ກັບ​ນ້ຳ​ຝົນ ຕາມ​ຫ້ວຍ­ຮ່ອງ​ໜອງ​ບຶງ ໄດ້​ໄຫຼ​ເຂົ້າ​ຖ້ວມ​ໂຮງ­ຮຽນ 12 ແຫ່ງ ນັບ​ແຕ່​ວັນ​ທີ 5 ກັນ­ຍາ 2018 ເປັນ­ຕົ້ນ​ມາ ໂຮງ­ຮຽນ​ຖືກ​ປິດ​ການ​ຮຽນ-ການ​ສອນ​ຊົ່ວ­ຄາວ ສະ­ເພາະ​ວິ­ທະ­ຍາ­ໄລ​ຄູ​ບ້ານ​ເກິນ​ກໍ່​ໄດ້​ປິດ​ຮຽນ ບັນ­ດາ​ນັກ​ສຶກ​ສາ​ແມ່ນ​ໃຫ້​ປະ­ຈຳ​ຢູ່​ຫໍ​ພັກ ເພື່ອ​ກະ­ກຽມ​ຊ່ວຍ­ເຫຼືອ​ປະ­ຊາ­ຊົນ​ໃນ​ການ​ເກັບ​ມ້ຽນ​ຂົນ​ຍ້າຍ​ເຄື່ອງ ແລະ ສັດ ປັດ­ຈຸ­ບັນ ສັດ­ລ້ຽງ​ຂາດ​ອາ­ຫານ ທີ່­ຢູ່​ອາ­ໄສ ແລະ ຕາຍ​ຈຳ­ນວນ​ໜຶ່ງ.

    ໂອ­ກາດ​ນີ້ ຄະ­ນະ​ຮັບ­ຜິດ­ຊອບ​ຈາກ​ພາກ­ສ່ວນ​ກ່ຽວ­ຂ້ອງ ກໍ່​ໄດ້​ຜັດ­ປ່ຽນ​ກັນ​ຂຶ້ນ​ຊີ້​ແຈງ​ລາຍ​ງານ​ກ່ຽວ​ກັບ​ສະ­ພາບ​ການ​ປ່ອຍ​ນ້ຳ​ຈາກ​ເຂື່ອນ ແລະ ການ​ສະ­ໜອງ​ແນວ​ພັນ​ພືດ​ຕ່າງໆ​ເພື່ອ​ການ​ຜະ­ລິດ​ລະ­ດູ­ແລ້ງ ຈາກ​ນັ້ນ ທ່ານ​ນາ­ຍົກ​ໄດ້​ເນັ້ນ​ໜັກ​ໃຫ້​ຄະ­ນະ​ນຳ​ແຂວງ ເມືອງ ເອົາ­ໃຈ­ໃສ່​ຊ່ວຍ­ເຫຼືອ​ປະ­ຊາ­ຊົນ​ທີ່​ຍັງ​ຈົມ​ນ້ຳ​ຢູ່ ໃຫ້​ພົ້ນ​ອັນ­ຕະ­ລາຍ​ໂດຍ​ໄວ ອົບ​ພະ​ຍົກ​ມາ​ເຂດ​ທີ່​ປອດ​ໄພ​ໃຫ້​ຊີ­ວິດ​ຄົນ​ປອດ​ໄພ 100% ພ້ອມ​ທັງ​ເກັບ​ມ້ຽນ​ຊັບ​ສິນ​ໄວ້​ໃຫ້​ດີ ລະ­ດົມ​ໃຊ້​ທຸກ​ກຳ­ລັງ​ແຮງ​ລວມ​ຂອງ​ແຂວງ ທຸກ​ພາກ­ສ່ວນ​ເຂົ້າ​ຊ່ວຍ​ປະ­ຊາ­ຊົນ ໂຮງ­ຮຽນ​ທີ່​ປິດ​ບໍ່​ໄດ້​ຮຽນ​ໃຫ້​ແກ້​ໄຂ​ສ້າງ​ໂຮງ­ຮຽນ​ຊົ່ວ­ຄາວ ເພື່ອ​ໃຫ້​ລູກ​ຫຼານ​ໄດ້​ຮ່ຳ­ຮຽນ​ທັນ​ເວ­ລາ ຊ່ວຍ​ປະ­ຊາ­ຊົນ​ດ້ານ​ອາ­ຫານ​ການ​ກິນ ນ້ຳ​ດື່ມ ຕິດ­ຕາມ​ເຝົ້າ​ລະ­ວັງ​ພະ­ຍາດ​ລະ­ບາດ​ທີ່​ຈະ​ຕາມ​ມາ ຈາກ​ນັ້ນ ຄະ­ນະ​ກໍ່​ໄດ້​ລ່ອງ​ເຮືອ​ລົງ​ໄປ​ຕິດ­ຕາມ​ເບິ່ງ​ສະ­ພາບ​ນ້ຳ​ຖ້ວມ​ເຮືອນ​ຢູ່​ບ້ານ​ບຸ່ງ​ພ້າວ ເມືອງ​ທຸ­ລະ­ຄົມ ພ້ອມ​ນີ້ ຄະ­ນະ​ກໍ່​ໄດ້​ລ່ອງ​ເຮືອ​ຕິດ­ຕາມ​ເບິ່ງ​ເນື້ອ­ທີ່​ການ​ຜະ­ລິດ​ຂອງ​ປະ­ຊາ­ຊົນ ລຽບ​ຕາມ​ສອງ​ຝັ່ງ​ນ້ຳ​ງື່ມ ໄດ້​ຮັບ​ຄວາມ​ເສຍ​ຫາຍ​ຈາກ​ນ້ຳ​ຖ້ວມ ແລະ ໄປ​ກວດ­ກາ​ເບິ່ງ​ສະ­ພາບ​ລະ­ດັບ​ນ້ຳ ແລະ ເຕັກ­ນິກ​ຢູ່​ສັນ​ເຂື່ອນ​ໄຟ­ຟ້າ​ນ້ຳ​ງື່ມ 1 ຕື່ມ​ອີກ.

ຂ່າວທີ່ກ່ຽວຂ້ອງ