ເອດີບີ ໃຫ້ທຶນຊ່ວຍເຫຼືອສົ່ງເສີມການຜະລິດກະສິກຳເປັນສິນຄ້າ

327 07 ກ.ຍ. 2018 ຂ່າວໜ້າ​ໜຶ່ງ
ເອດີບີ ໃຫ້ທຶນຊ່ວຍເຫຼືອສົ່ງເສີມການຜະລິດກະສິກຳເປັນສິນຄ້າ

    ພິ­ທີ​ເຊັນ​ສັນ­ຍາ​ຮັບ​ເອົາ​ເງິນ​ຊ່ວຍ­ເຫຼືອ​ລ້າ ມູນ​ຄ່າ 40,5 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 345 ຕື້​ກີບ​ຈາກ​ທະ­ນາ­ຄານ​ພັດ­ທະ­ນາ​ອາ­ຊີ (ເອ​ດີ​ບີ) ສຳ­ລັບ​ໂຄງ­ການ​ສົ່ງ­ເສີມ​ລະ­ບົບ​ຕ່ອງ​ໂສ້​ການ​ຜະ­ລິດ​ກະ­ສິ­ກຳ​ເປັນ​ສິນ­ຄ້າ ທີ່​ເປັນ​ມິດ​ກັບ​ສິ່ງ­ແວ­ດລ້ອມ ຈັດ​ຂຶ້ນ​ວັນ​ທີ 6 ກັນ­ຍາ 2018 ທີ່​ກະ­ຊວງ​ການ​ເງິນ ຮ່ວມ​ລົງ​ນາມ​ຕາງ­ໜ້າ​ລັດ­ຖະ­ບານ​ລາວ ໂດຍ​ທ່ານ​ນາງ ທິບ​ພະ​ກອນ ຈັນ­ທະ​ວົງ­ສາ ຮອງ​ລັດ­ຖະ­ມົນ­ຕີ ກະ­ຊວງ​ການ​ເງິນ ແລະ ທ່ານ ຢາ​ຊູ​ຊິ ເນ​ກິ​ຊິ ຜູ້­ຕາງ­ໜ້າ​ທະ­ນາ­ຄານ​ພັດ­ທະ­ນາ​ອາ­ຊີ​ປະ­ຈຳ​ລາວ ມີ​ພາກ­ສ່ວນ​ກ່ຽວ­ຂ້ອງ​ທັງ​ສອງ​ຝ່າຍ​ເຂົ້າ​ຮ່ວມ.

    ທ່ານ ຢາ​ຊູ​ຊິ ເນ​ກິ​ຊິ ກ່າວ​ວ່າ: ຂະ­ແໜງ​ກະ­ສິ­ກຳ​ເປັນ​ຂະ­ແໜງ­ການ​ທີ່​ສຳ­ຄັນ ໃນ​ການ​ປະ­ກອບ­ສ່ວນ​ໃຫ້​ແກ່​ເສດ­ຖະ­ກິດ​ຂອງ​ລາວ ແຕ່​ຂະ­ແໜງ​ນີ້ ຜັດ​ມີ​ຄວາມ​ສ່ຽງ​ຕໍ່​ກັບ​ການ​ປ່ຽນ­ແປງ​ຂອງ​ດິນ​ຟ້າ​ອາ­ກາດ ຖືກ​ຂົ່ມ­ຂູ່​ດ້ວຍ​ໄພ​ນ້ຳ​ຖ້ວມ ແລະ ໄພ​ແຫ້ງ­ແລ້ງ ເຮັດ​ໃຫ້​ຄວາມ​ຄາດ​ຫວັງ​ຕໍ່​ການ​ພັດ­ທະ­ນາ ແລະ ຄວາມ​ໝັ້ນ­ຄົງ​ທາງ​ດ້ານ​ສະ­ບຽງ​ອາ­ຫານ​ຂອງ​ປະ­ເທດ​ຕົກ​ຢູ່​ໃນ​ຄວາມ​ສ່ຽງ ເຊິ່ງ​ການ​ຮ່ວມ​ມື​ກັນ​ລະ­ຫວ່າງ​ລັດ­ຖະ­ບານ​ລາວ ແລະ ເອ​ດີ​ບີ​ຄັ້ງ​ນີ້​ມີ​ຄວາມ​ພະ­ຍາ­ຍາມ​ທີ່​ຈະ​ຮັບ​ມື​ຕໍ່​ກັບ​ບັນ­ຫາ​ນີ້​ໃຫ້​ປາ­ກົດ​ຜົນ​ເປັນ​ຈິງ ແລະ ເພື່ອ​ຫັນ​ການ​ຜະ­ລິດ​ກະ­ສິ­ກຳ​ໃຫ້​ເປັນ​ສິນ­ຄ້າ ມີ​ຄວາມ​ຍືນ​ຍົງ ແລະ ສອດ­ຄ່ອງ​ຕໍ່​ກັບ​ສະ­ພາບ​ແວດ​ລ້ອມ​ໄດ້​ດີ​ຂຶ້ນ ພ້ອມ​ທັງ​ສົ່ງ­ເສີມ​ການ​ຮ່ວມ​ມື​ການ​ເຊື່ອມ​ໂຍງ​ພາກ​ພື້ນ ແລະ ຄວາມ​ອາດ​ສາ­ມາດ​ໃນ​ການ​ແຂ່ງ­ຂັນ​ທາງ​ດ້ານ​ລະ­ບົບ​ຕ່ອງ​ໂສ້​ທຸ­ລະ​ກິດ​ກະ­ສິ­ກຳ ເພື່ອ​ປະ­ກອບ­ສ່ວນ​ສະ­ໜັບ­ສະ­ໜູນ​ໃຫ້​ແກ່​ການ​ຂະ­ຫຍາຍ­ຕົວ​ທາງ​ດ້ານ​ເສດ­ຖະ­ກິດ​ຂອງ​ປະ­ເທດ ການ​ປັບ­ປຸງ​ຄວາມ​ສອດ­ຄ່ອງ​ໃຫ້​ເຂົ້າ​ກັບ​ສະ­ພາບ​ແວດ​ລ້ອມ​ຂອງ​ໂຄງ​ລ່າງ​ພື້ນ­ຖານ ສຳ­ລັບ​ຕ່ອງ​ໂສ້​ທຸ­ລະ​ກິດ​ກະ­ສິ­ກຳ​ລວມ​ມີ: ການ​ບູ­ລະ­ນະ​ສ້ອມ­ແປງ​ລະ­ບົບ​ໂຄງ​ລ່າງ​ທາງ​ຊົນ­ນະ­ບົດ ແລະ ຊົນ­ລະ­ປະ­ທານ​ຂະ­ໜາດ​ນ້ອຍ ໂຄງ​ລ່າງ​ສຶກ​ສາ​ວິ­ໄຈ​ພືດ​ສິນ­ຄ້າ ແລະ ໂຄງ​ລ່າງ​ທົດ​ລອງ​ຄຸ­ນະ­ພາບ​ຄວາມ​ປອດ​ໄພ​ຂອງ​ພືດ​ສິນ­ຄ້າ ແລະ ການ​ປັບ­ປຸງ​ລະ­ບົບ​ການ​ເກັບ​ມ້ຽນ​ພາຍ­ຫຼັງ​ການ​ເກັບ​ກ່ຽວ​ໃຫ້​ເປັນ​ມິດ​ກັບ​ສິ່ງ­ແວ­ດລ້ອມ ພ້ອມ​ທັງ​ປັບ­ປຸງ​ຂະ​ບວນ​ການ​ປຸງ​ແຕ່ງ​ຂອງ​ບັນ­ດາ​ຫົວ­ໜ່ວຍ​ປະ­ກອບ​ການ​ທຸ­ລະ​ກິດ​ກະ­ສິ­ກຳ​ພາຍ​ໃນ​ປະ­ເທດ ນອກ­ຈາກ​ສິ່ງ​ທີ່​ກ່າວ​ມາ​ນັ້ນ ໂຄງ­ການ​ຍັງ​ຈະ​ຊ່ວຍ​ສະ­ມັດ­ຖະ­ພາບ​ຂອງ​ການ​ຜະ­ລິດ​ພືດ​ສິນ­ຄ້າ ສ້າງ​ຜະ­ລິດ​ຕະ​ພັນ​ກະ­ສິ­ກຳ​ໃຫ້​ມີ​ຄວາມ​ອຸ­ດົມ­ສົມ­ບູນ ແລະ ເພີ່ມ​ທະ­ວີ​ຄວາມ​ສອດ­ຄ່ອງ​ຕໍ່​ສະ­ພາບ​ແວດ​ລ້ອມ​ໃນ​ລາວ ໃນ​ການ​ສົ່ງ­ເສີມ​ການ​ນຳ​ໃຊ້​ຝຸ່ນ​ຊີ­ວະ​ພາບ ແລະ ການ​ເຮັດ​ກະ­ສິ­ກຳ​ອິນ​ຊີ ພ້ອມ​ທັງ​ແຈກ​ຢາຍ​ແນວ​ພັນ​ພືດ​ສິນ­ຄ້າ​ຫຼາຍ​ຊະ­ນິດ​ທີ່​ທົນ​ຕໍ່​ສະ­ພາບ​ນ້ຳ​ຖ້ວມ ແລະ ແຫ້ງ­ແລ້ງ ພ້ອມ​ນັ້ນ​ຈະ​ສະ­ໜັບ­ສະ­ໜູນ​ການ​ສ້າງ​ນະ­ໂຍ­ບາຍ​ສົ່ງ­ເສີມ​ການ​ລົງ­ທຶນ​ຂອງ​ພາກ​ເອ­ກະ​ຊົນ​ໃນ​ຂະ­ແໜງ​ກະ­ສິ­ກຳ ໂດຍ​ຜ່ານ​ຮູບ​ແບບ​ການ​ລົງ­ທຶນ​ຮ່ວມ​ລະ­ຫວ່າງ​ພາກ​ລັດ ແລະ ພາກ​ເອ­ກະ​ຊົນ ການ​ເຮັດ​ສັນ­ຍາ​ຜູກ​ພັນ​ສອງ​ສົ້ນ ແລະ ການ​ສ້າງ­ຕັ້ງ​ກຸ່ມ​ການ​ລົງ­ທຶນ​ຮ່ວມ​ເພື່ອ​ຜະ­ລິດ​ກະ­ສິ­ກຳ​ເປັນ​ສິນ­ຄ້າ.

    ສຳ­ລັບ​ການ​ລິ​ເລີ່ມ​ດັ່ງ­ກ່າວ ແມ່ນ​ສອດ­ຄ່ອງ​ກັບ​ແຜນ​ຍຸດ​ທະ​ສາດ​ຂອງ​ລັດ­ຖະ­ບານ ໃນ​ການ​ພັດ­ທະ­ນາ​ກະ­ສິ­ກຳ​ຮອດ​ປີ 2025 ເຊິ່ງ​ແຜນ​ຍຸດ​ທະ​ສາດ​ນີ້ ແນ­ໃສ່​ເພື່ອ​ສົ່ງ­ເສີມ​ລະ­ບົບ​ຕ່ອງ​ໂສ້​ການ​ຜະ­ລິດ​ເຂົ້າ​ໃນ​ບັນ­ດາ​ແຂວງ​ເປົ້າ​ໝາຍ ເຊັ່ນ: ແຂວງ​ຄຳ​ມ່ວນ ສາ­ລະ​ວັນ ແລະ ສະ­ຫວັນ​ນະ​ເຂດ ສົ່ງ­ເສີມ​ລະ­ບົບ​ຕ່ອງ​ໂສ້​ການ​ຜະ­ລິດ​ພືດ​ສິນ­ຄ້າ​ກະ­ສິ­ກຳ​ໃນ​ນະ­ຄອນ­ຫຼວງ​ວຽງ​ຈັນ ແຂວງ​ຈຳ­ປາ​ສັກ ແລະ ເຊ​ກອງ ສິ່ງ​ດັ່ງ­ກ່າວ ຈະ​ຊ່ວຍ​ເຮັດ​ໃຫ້​ສາ­ມາດ​ບັນ­ລຸ​ເປົ້າ​ໝາຍ​ການ​ຜະ­ລິດ​ພືດ​ສິນ­ຄ້າ​ກະ­ສິ­ກຳ ແລະ ເຂົ້າ​ທີ່​ມີ​ຄຸ­ນະ­ພາບ ເພື່ອ​ສົ່ງ​ຂາຍ​ຕະ­ຫຼາດ​ພາຍ​ໃນ ແລະ ຕ່າງ­ປະ­ເທດ ຄາດ​ຄະ­ເນ​ວ່າ​ປະ­ຊາ­ຊົນ​ຢ່າງ​ໜ້ອຍ 1 ແສນ​ຄົນ ຫຼື 20 ພັນ​ຄອບ­ຄົວ​ຢູ່​ລາວ ຈະ​ໄດ້​ຮັບ​ຜົນ​ປະ­ໂຫຍດ​ຈາກ​ໂຄງ­ການ ເຊິ່ງ​ຈະ​ຊ່ວຍ​ໃຫ້​ເຂົາ­ເຈົ້າ​ມີ​ລາຍ​ຮັບ​ເພີ່ມ​ຕື່ມ​ຢ່າງ​ໜ້ອຍ 30% ພ້ອມ​ທັງ​ສົ່ງ­ເສີມ​ການ​ຮ່ວມ​ມື ແລະ ການ​ເຊື່ອມ​ໂຍງ​ໃນ​ອະ­ນຸ​ພາກ​ພື້ນ​ແມ່­ນ້ຳ​ຂອງ ໂດຍ​ເປັນ​ເອ­ກະ​ພາບ​ກັນ​ທາງ​ດ້ານ​ມາດ­ຕະ­ຖານ​ຄຸ­ນະ­ພາບ ແລະ ຄວາມ​ປອດ​ໄພ ແລະ ສະ­ໜັບ­ສະ­ໜູນ​ບັນ­ດາ​ຂໍ້​ຕົກ­ລົງ​ຕ່າງໆ​ກັບ​ການ​ຄ້າ ແນວ​ພັນ​ອະ­ນຸ​ພາກ​ພື້ນ​ແມ່­ນ້ຳ​ຂອງ.

ຂ່າວທີ່ກ່ຽວຂ້ອງ