ຂ່າວຫຼ້າສຸດ

ມອບ-ຮັບເລຂາຄະນະພັກ ແລະ ຮັກສາການຜູ້ວ່າການ ທຫລ ຄົນໃໝ່

444 07 ກ.ຍ. 2018 ຂ່າວໜ້າ​ໜຶ່ງ
ມອບ-ຮັບເລຂາຄະນະພັກ ແລະ ຮັກສາການຜູ້ວ່າການ ທຫລ ຄົນໃໝ່

ສູນ​ກາງ​ພັກ ໄດ້​ເປັນ​ປະ­ທານ​ໃນ​ພິ­ທີ​ມອບ-ຮັບ​ເລ­ຂາ​ຄະ­ນະ​ພັກ ແລະ ຜູ້​ວ່າ­ການ​ທະ­ນາ­ຄານ​ແຫ່ງ ສປປ ລາວ (ທຫລ) ໃນ​ວັນ​ທີ 5 ກັນ­ຍາ 2018 ຢູ່​ທະ­ນາ­ຄານ​ດັ່ງ­ກ່າວ ລະ­ຫວ່າງ​ທ່ານ ສົມ​ພາວ ໄຟ​ສິດ ເລ­ຂາ​ຄະ­ນະ​ພັກ ຜູ້​ວ່າ­ການ ທຫລ (ຄົນ​ເກົ່າ) ກັບ​ທ່ານ ສອນ​ໄຊ ສິດ​ພະ​ໄຊ ເລ­ຂາ​ຄະ­ນະ​ພັກ ຮັກ­ສາ​ການ​ຜູ້​ວ່າ­ການ ທຫລ (ຄົນ​ໃໝ່) ໂດຍ​ມີ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ຕາງ­ໜ້າ​ຄະ­ນະ​ຈັດ​ຕັ້ງ​ສູນ​ກາງ​ພັກ ກໍ່​ໄດ້​ຂຶ້ນ​ຜ່ານ​ຄຳ​ສັ່ງ​ວ່າ​ດ້ວຍ​ການ​ຍົກ­ຍ້າຍ​ພະ­ນັກ­ງານ​ການ​ນຳ​ຂັ້ນ​ສູງ​ໄປ​ຮັບ​ໜ້າ­ທີ່​ໃໝ່ ມະ­ຕິ​ຕົກ­ລົງ​ວ່າ​ດ້ວຍ​ການ​ແຕ່ງ­ຕັ້ງ​ເລ­ຂາ​ຄະ­ນະ​ພັກ ທຫລ ແລະ ດຳ­ລັດ​ວ່າ​ດ້ວຍ​ການ​ແຕ່ງ­ຕັ້ງ​ຮັກ­ສາ​ການ​ຜູ້​ວ່າ­ການ ທຫລ ໃນ​ນີ້​ທ່ານ ສົມ​ພາວ ໄຟ​ສິດ ໄດ້​ຮັບ​ການ​ແຕ່ງ­ຕັ້ງ​ເປັນ​ລັດ­ຖະ­ມົນ­ຕີ ປະ­ຈຳ​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ທ່ານ ສອນ​ໄຊ ສິດ​ພະ​ໄຊ ໄດ້​ຮັບ​ການ​ແຕ່ງ­ຕັ້ງ​ເປັນ​ເລ­ຂາ​ຄະ­ນະ​ພັກ ຮັກ­ສາ​ການ​ຜູ້​ວ່າ­ການ ທຫລ ຄົນ​ໃໝ່.

    ທ່ານ ສອນ​ໄຊ ສິດ​ພະ​ໄຊ ມີ​ປະ­ຫວັດ​ການ­ເຄື່ອນ­ໄຫວ​ວຽກ​ງານ​ຢູ່​ໃນ​ຂະ­ແໜງ­ການ​ທະ­ນາ­ຄານ ມາ​ເປັນ​ເວ­ລາ​ຍາວ​ນານ ກ່ອນ​ໜ້າ​ນີ້ ທ່ານ​ເປັນ​ຜູ້­ອຳ­ນວຍ­ການ​ທະ­ນາ­ຄານ​ຮ່ວມ​ທຸ­ລະ​ກິດ ລາວ-ຫວຽດ ເປັນ​ຜູ້­ອຳ­ນວຍ­ການ​ທະ­ນາ­ຄານ​ການ​ຄ້າ​ຕ່າງ­ປະ­ເທດ​ລາວ ເປັນ​ຮອງ​ຜູ້​ວ່າ­ການ ທຫລ ແລະ ໃນ​ກອງ​ປະ­ຊຸມ​ໃຫຍ່ ຄັ້ງ​ທີ X ຂອງ​ພັກ ສະ­ຫາຍ​ໄດ້​ຮັບ​ການ​ເລືອກ​ຕັ້ງ​ເປັນ​ກຳ­ມະ­ການ​ສຳ­ຮອງ​ສູນ​ກາງ​ພັກ.

    ໂອ­ກາດ​ນີ້ ທ່ານ ຈັນ​ສີ ໂພ​ສີ­ຄຳ ກໍ່​ໄດ້​ຕີ​ລາ­ຄາ​ສູງ​ຕໍ່​ການ​ຊີ້​ນຳ-ນຳ­ພາ​ຂອງ​ທ່ານ ສົມ​ພາວ ໄຟ​ສິດ ພ້ອມ​ໝູ່​ຄະ­ນະ ທີ່​ໄດ້​ເອົາ­ໃຈ­ໃສ່​ປະ­ຕິ­ບັດ​ໜ້າ­ທີ່​ການ­ເມືອງ​ຂອງ​ຕົນ​ຢ່າງ​ຜົນ­ສຳ­ເລັດ​ໃນ​ຫຼາຍ​ດ້ານ ພ້ອມ​ນີ້ ທ່ານ​ຍັງ​ໄດ້​ເນັ້ນ​ໜັກ​ວ່າ­ການ​ຍົກ­ຍ້າຍ ແລະ ການ​ແຕ່ງ­ຕັ້ງ​ການ​ນຳ​ລະ­ດັບ​ສູງ​ຂອງ​ທະ­ນາ­ຄານ​ຄັ້ງ​ນີ້​ເປັນ​ວຽກ​ປົກ­ກະ­ຕິ ອີງ​ຕາມ​ຄວາມ​ຕ້ອງ­ການ​ຂອງ​ໜ້າ­ທີ່​ການ­ເມືອງ​ໃນ​ໄລ­ຍະ​ໃໝ່ ແລະ ຮຽກ­ຮ້ອງ​ໃຫ້​ທ່ານ​ທີ່​ໄດ້​ຮັບ​ໜ້າ­ທີ່​ໃໝ່ ສືບ­ຕໍ່​ເສີມ​ຂະ­ຫຍາຍ​ມູນ­ເຊື້ອ​ອັນ​ດີ­ງາມ ແລະ ປັບ­ປຸງ​ແກ້​ໄຂ​ວຽກ​ງານ​ຕ່າງໆ​ໃຫ້​ມີ​ຜົນ­ສຳ­ເລັດ​ເປັນ​ຢ່າງ​ດີ.

ຂ່າວທີ່ກ່ຽວຂ້ອງ