ບ້ານນາຕານ ໄດ້ຮັບເຄື່ອງຊ່ວຍເຫຼືອ

259 07 ກ.ຍ. 2018 ຂ່າວໜ້າ​ໜຶ່ງ
ບ້ານນາຕານ ໄດ້ຮັບເຄື່ອງຊ່ວຍເຫຼືອ

    ບ້ານ​ນາ​ຕານ ເມືອງ​ໄຊ​ທານີ ນະຄອນຫຼວງ​ວຽງ​ຈັນ ມີ 262 ຫຼັງຄາ ມີ 232 ຄອບຄົວ ພົນລະເມືອງ​ທັງ​ໝົດ​ຈຳນວນ 1.180 ຄອບຄົວ ຍິງ 570 ຄົນ ໃນ​ນີ້​ຕາມ​ການ​ລາຍ​ງານ​ເບື້ອງ​ຕົ້ນ ມີ​ຄອບຄົວ​ທີ່​ໄດ້​ຮັບ​ຜົນ​ເສຍ​ຫາຍ​ຈາກ​ນ້ຳ​ຖ້ວມ​ທັງ​ໝົດ 25 ຄອບຄົວ ມີ​ພົນລະເມືອງ​ຈຳນວນ 95 ຄົນ ຍິງ 50 ຄົນ ເນື້ອທີ່​ນາ​ເສຍ​ຫາຍ 81,76 ເຮັກຕາ ໜອງ​ປາ 4,5 ເຮັກຕາ ແລະ ເນື້ອທີ່​ສວນ 28 ເຮັກຕາ ນອກ​ນີ້​ໄດ້​ຍ້າຍ​ງົວ​ມາ ບໍ່​ມີ​ບ່ອນຢູ່​ຈຳນວນ 19 ໂຕ.

    ວັນ​ທີ 5 ກັນຍາ 2018 ທີ່​ສະໂມສອນ​ບ້ານ​ນາ​ຕານ ພະ​ແນກ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ນະຄອນຫຼວງ​ວຽງ​ຈັນ ແລະ ສຳນັກງານ​ປົກຄອງ​ເມືອງ​ໄຊ​ທານີ ນະຄອນຫຼວງ​ວຽງ​ຈັນ ໄດ້​ນຳ​ເຄື່ອງ​ອຸປະໂພກ​ໄປ​ຊ່ວຍເຫຼືອ​ປະຊາຊົນ​ບ້ານ​ນາ​ຕານ ເມືອງ​ໄຊ​ທານີ ທີ່​ໄດ້​ຮັບ​ຜົນ​ກະທົບ​ຈາກ​ໄພ​ນ້ຳ​ຖ້ວມ​ຄັ້ງ​ນີ້ ໂດຍ​ການ​ກ່າວ​ມອບ​ຂອງ​ທ່ານ ຄຳ​ປະດິດ ເຂັມ​ມານິດ ຫົວໜ້າ​ພະ​ແນກ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ນະຄອນຫຼວງ​ວຽງ​ຈັນ ແລະ ທ່ານ ໜູ​ກີ ສີ​ຫາ​ລາດ ຮອງ​ເຈົ້າເມືອງ​ໄຊ​ທານີ ກ່າວ​ຮັບ​ຂອງ​ທ່ານ ຄຳ​ດີ ໄດ​ສີ ນາຍບ້ານ​ນາ​ຕານ ມີ​ຫົວໜ້າ​ຫ້ອງການ ພະນັກງານ ແລະ ຄະນະ​ບ້ານ​ເຂົ້າ​ຮ່ວມ.

    ເຄື່ອງ​ອຸປະໂພກ​ຂອງ​ພະ​ແນກ ຖວທ ນວ ນຳໄປ​ມອບ​ຄັ້ງ​ນີ້ ປະກອບ​ມີ ໝີ່ ຈຳນວນ 10 ແກັດ (ໃຫຍ່) ນ້ຳ​ດື່ມ ວີ​ວີ ຈຳນວນ 53 ແພັກ ແລະ ນ້ຳ​ດື່ມ​ທິບ​ພານິດ ຈຳນວນ 50 ແພັກ ລວມ​ມູນ​ຄ່າ 7 ລ້ານ​ກວ່າ​ກີບ ເຊິ່ງ​ເຄື່ອງ​ດັ່ງກ່າວ​ແມ່ນ​ການ​ປະກອບສ່ວນ​ຂອງ​ພະ​ແນກ ຖວທ ນວ ອີກ​ສ່ວນ​ໜຶ່ງ​ແມ່ນ​ໄດ້​ມາ​ຈາກ​ການ​ປະກອບສ່ວນ​ຂອງ​ຫົວໜ່ວຍ​ທຸລະ​ກິດ ສຳລັບ​ເຄື່ອງ​ອຸປະໂພກ​ຂອງ​ສຳນັກງານ​ປົກຄອງ​ເມືອງ​ໄຊ​ທານີ​ປະກອບ​ມີ ໝີ່ 15 ແກັດ ນ້ຳ​ດື່ມ 15ແພັກ ເຂົ້າສານ 1 ເປົາ ແລະ ປາກະປ໋ອງ 2 ແພັກ.

ຂ່າວທີ່ກ່ຽວຂ້ອງ