ຂ່າວຫຼ້າສຸດ

ກະຕໍ້ລາວ ພໍໃຈຜົນງານ 1 ຫຼຽນເງິນ 1 ຫຼຽນທອງ ໃນເອຊຽນເກມ

160 07 ກ.ຍ. 2018 ວົງຈອນກີລາ
ກະຕໍ້ລາວ ພໍໃຈຜົນງານ 1 ຫຼຽນເງິນ 1 ຫຼຽນທອງ ໃນເອຊຽນເກມ

    ທ່ານ ອາ​ນຸ​ສອນ ເຄນ​ຕິ​ສັກ ຮອງ​ປະ­ທານ​ສະ­ຫະ­ພັນ​ກີ­ລາ​ກະ­ຕໍ້​ທີມ​ຊາດ​ລາວ ທັງ​ເປັນ​ຄະ­ນະ​ນຳ ນຳ­ພາ​ນັກ­ກີ­ລາ​ກະ­ຕໍ້​ທີມ​ຊາດ​ລາວ ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ເອ​ຊຽນ​ເກມ ຄັ້ງ​ທີ 18 ທີ່​ປະ­ເທດ​ອິນ​ໂດ​ເນ​ເຊຍ ໃຫ້​ສຳ­ພາດ​ໃນ​ວັນ​ທີ 5 ກັນ­ຍາ 2018 ວ່າ: ພາຍ­ຫຼັງ​ໄດ້​ຮັບ​ການ​ແຕ່ງ­ຕັ້ງ​ຈາກ​ຄະ­ນະ​ກະ­ຊວງ​ສຶກ​ສາ​ທິ​ການ ແລະ ກີ­ລາ​ແລ້ວ ພວກ​ເຮົາ​ກໍ່​ໄດ້​ເລີ່ມ​ຄັດ​ເລືອກ​ເອົາ​ນັກ­ກີ­ລາ​ທີ່​ເປັນ​ເປົ້າ​ໝາຍ​ເຂົ້າ​ສູນ​ເຝິກ­ຊ້ອມ ໃນ​ນັ້ນ​ມີ​ນັກ­ກີ­ລາ​ທີ່​ຄັດ​ຈາກ​ການ​ເຂົ້າ​ຮ່ວມ​ແຂ່ງ­ຂັນ​ລະ­ດັບ​ມະ­ຫາ​ໄລ ແລະ ງານ​ມະ​ຫະ​ກຳ​ກີ­ລາ​ນັກ­ຮຽນ​ທົ່ວ​ປະ­ເທດ ດັ່ງ­ນັ້ນ ຈຶ່ງ​ສາ­ມາດ​ຄັດ​ເລືອກ​ໄດ້​ຈຳ­ນວນ 31 ຄົນ ຍິງ 11 ຄົນ ເຂົ້າ​ສູນ​ເຝິກ­ຊ້ອມ​ແຕ່​ເດືອນ​ເມ­ສາ​ເປັນ­ຕົ້ນ​ມາ ຈົນ​ຮອດ​ວັນ​ທີ 16 ສິງ­ຫາ ພວກ​ເຮົາ​ກໍ່​ໄດ້​ເດີນ­ທາງ​ເຂົ້າ​ຮ່ວມ​ການ​ແຂ່ງ­ຂັນ​ດັ່ງ­ກ່າວ.

    ສຳ­ລັບ​ກະ­ຕໍ້​ທີມ​ຊາດ​ລາວ ສົ່ງ​ເຂົ້າ​ຮ່ວມ 4 ລາຍ­ການ ຍິງ 2 ລາຍ­ການ ຄື: ທີມ 4 ຄົນ ແລະ ທີມ​ຊຸດ ສຳ­ລັບ​ກະ­ຕໍ້​ຊາຍ ທີມ​ຊາດ​ລາວ​ຖືກ​ຈັດ​ຢູ່​ໃນ​ກຸ່ມ​ບີ ປະ­ກອບ​ມີ ໄທ ມຽນ​ມາ ສ່ວນ​ລາຍ­ການ​ທີມ 4 ຄົນ ຖືກ​ຈັດ​ຢູ່​ກຸ່ມ​ບີ ເຊັ່ນ​ດຽວ​ກັນ ຮ່ວມ​ກັບ​ເຈົ້າ­ພາບ​ອິນ​ໂດ​ເນ​ເຊຍ ຢີ່​ປຸ່ນ ມຽນ​ມາ ຈີນ ຜ່ານ​ການ​ແຂ່ງ­ຂັນ ນັກ­ກີ­ລາ​ຂອງ​ພວກ​ເຮົາ​ສາ­ມາດ​ຍາດ​ໄດ້ 1 ຫຼຽນ​ເງິນ​ຈາກ​ທີມ​ຊຸດ​ຊາຍ ສ່ວນ​ຫຼຽນ​ທອງ ໄດ້​ຈາກ​ທີມ 4 ຄົນ​ຍິງ ຈາກ​ຜົນ­ງານ​ດັ່ງ­ກ່າວ ແມ່ນ​ໄດ້​ສ້າງ​ຊື່​ສຽງ​ໃຫ້​ແກ່​ວົງ​ການ​ກີ­ລາ​ກະ­ຕໍ້​ລາວ​ໃນ​ເວ­ທີ​ພາກ​ພື້ນ ແລະ ສາ­ກົນ ພ້ອມ​ທັງ​ສ້າງ​ຄວາມ​ພາກ­ພູມ​ໃຈ​ຕໍ່​ຄະ­ນະ​ນຳ​ຄູ​ເຝິກ ທີ່​ໄດ້​ນຳ­ພາ​ນັກ­ກີ­ລາ​ເຂົ້າ​ຮ່ວມ​ລາຍ­ການ​ດັ່ງ­ກ່າວ.

    ການ​ແຂ່ງ­ຂັນ​ດັ່ງ­ກ່າວ ນັກ­ກີ­ລາ​ທີມ​ຊາດ​ລາວ ສາ­ມາດ​ຍາດ​ໄດ້ 2 ຫຼຽນ​ເງິນ ໄດ້​ຈາກ​ກະ­ຕໍ້​ທີມ​ຊຸດ​ຊາຍ ແລະ ຈາກ​ປັນ​ຈັກ​ສີ​ລັດ​ຍິງ ປະ­ເພດ​ຕໍ່­ສູ້ ສ່ວນ 3 ຫຼຽນ​ທອງ ໄດ້​ຈາກ​ປັນ​ຈັກ​ສີ​ລັດ 2 ຫຼຽນ ແລະ ຈາກ​ກະ­ຕໍ້​ທີມ 4 ຄົນ​ຍິງ.

ຂ່າວທີ່ກ່ຽວຂ້ອງ