ຂ່າວຫຼ້າສຸດ

FIFA ປະກາດຜົນຈັບສະຫຼາກເຕະບານຊີງຂັນສະໂມສອນໂລກ 2018

251 07 ກ.ຍ. 2018 ວົງຈອນກີລາ
FIFA ປະກາດຜົນຈັບສະຫຼາກເຕະບານຊີງຂັນສະໂມສອນໂລກ 2018

    ສະຫະພັນ​ບານເຕະ​ນາໆຊາດ ຫຼື FIFA ໄດ້​ຈັບ​ສະຫຼາກ​ຈັບ​ຄູ່​ການ​ແຂ່ງຂັນ​ເຕະບານ​ຊີງ​ຂັນ​ສະໂມສອນ​ໂລກ ປະຈຳ​ປີ 2018 ທີ່​ນະຄອນ​ຊູ​ຣິກ ປະເທດ​ສະ​ວິດ ໃນ​ວັນ​ທີ 5 ກັນຍາ 2018 ມີ 7 ທີມ​ເຂົ້າ​ຮ່ວມ​ເໝືອນ​ເດີມ ຄື: ສະໂມສອນ​ຈາກ​ເຈົ້າພາບ​ຈັດການ​ແຂ່ງຂັນ ສະຫະລັດ​ອາ​ຣັບ​ເອ​ມີ​ເຣ​​ສ ແລະ 6 ທີມ​ແຊັມ​ຈາກ 6 ຂົງເຂດ ເຊັ່ນ: ອາຊີ ອາ​ຟຣິ​ກາ ເອີ​ຣົບ ອາ​ເມ​ຣິ​ກາ​ໃຕ້ ໂອ​ເຊ​ອາ​ນີ (ໂອ​ຊີ​ເນຍ) ແລະ ຄອນ​ຄາ​ເຄັຟ (CONCACAF).

    ສຳລັບ ຣິວ ມາດ​ຣິດ ແຊັມ​ເກົ່າ ທັງ​ເປັນ​ແຊັມ​ຢູ​ຟາ​ແຊັມ​ປຽນ​ລີກ​ຈາກ​ເອີ​ຣົບ ໄດ້​ສິດ​ຢືນ​ຖ້າ​ຮອບ 4 ທີມ​ສຸດ​ທ້າຍ​ເໝືອນ​ເດີມ ຕາມ​ຜົນງານ​ອັນ​ດັບ​ສະໂມສອນ ເຊັ່ນ​ດຽວ​ກັບ​ແຊັມ​ຈາກ​ອາ​ເມ​ຣິ​ກາ​ໃຕ້ ທີ່​ຍັງ​ບໍ່​ຮູ້​ວ່າ​ຈະ​ເປັນ​ທີມ​ໃດ ເພາະ​ກຳລັງ​ແຂ່ງຂັນ​ຮອບ 8 ທີມ ສ່ວນ​ທີມ​ຈາກ​ເຈົ້າພາບ ສະຫະລັດ​ອາ​ຣັບ​ເອ​ມີ​ເຣ​​ສ ສະໂມສອນ​ອາວ​ໄອ (Al Ain) ແຊັມ​ລີກ​ສູງ​ສຸດ​ຂອງ​ເຈົ້າພາບ ຕ້ອງ​ມາ​ແຂ່ງຂັນ​ໃນ​ຮອບ​ເພລ​​ອັອຟ​ກັບ​ສະໂມສອນ​ເວວ​ລິງ​ຕັນ ທີມ​ນ້ອງ​ໃໝ່ ແຊັມ​ສະໂມສອນ​ຂົງເຂດ​ໂອ​ເຊ​ອາ​ນີ ທີມ​ໃດ​ຊະນະ​ຈະ​ເຂົ້າ​ຮອບ 8 ທີມ​ສຸດ​ທ້າຍ ພົບ​ກັບ​ແຊັມ​ຈາກ​ທະວີບ​ອາ​ຟຣິ​ກາ ທີ່​ຍັງ​ບໍ່​ຮູ້​ວ່າ​ຈະ​ແມ່ນ​ທີມ​ໃດ ເພາະ​ກຳລັງ​ແຂ່ງຂັນ​ຮອບ 8 ທີມ ແລະ ຖ້າ​ທີມ​ໃດ​ຊະນະ ຈະ​ໄປ​ພົບ​ກັບ​ແຊັມ​ຈາກ​ຂົງເຂດ​ອາ​ເມ​ຣິ​ກາ​ໃຕ້.

    ສ່ວນ​ອີກ​ສາຍ​ໜຶ່ງ​ໃນ​ຮອບ 8 ທີມ ແຊັມ​ຂົງເຂດ​ຄອນ​ຄາ​ເຄັຟ ຫຼື ເອີ້ນ​ວ່າ​ເຂດ​ອາ​ເມ​ຣິ​ກາ​ເໜືອ ອາ​ເມ​ຣິ​ກາ​ກາງ ແລະ ຄາ​ຣິບ​ບຽນ ຄື ສະໂມສອນ Guadalajara ທີມ​ນ້ອງ​ໃໝ່​ຈາກ​ເມັກ​ຊິ​ໂກ ຈະ​ພົບ​ກັບ​ແຊັມ​ສະໂມສອນ​ອາຊີ ທີ່​ຍັງ​ບໍ່​ຮູ້​ວ່າ​ຈະ​ແມ່ນ​ທີມ​ໃດ ເພາະ​ກຳລັງ​ແຂ່ງຂັນ​ຮອບ 8 ທີມ ແລະ ຖ້າ​ທີມ​ໃດ​ຊະນະ​ຈະ​ໄປ​ພົບ​ກັບ​ແຊັມ ຣິວ ມາດ​ຣິດ ໂດຍ​ການ​ແຂ່ງຂັນ​ຈະ​ມີ​ຂຶ້ນ​ໃນ​ວັນ​ທີ 12-22 ທັນວາ 2018 ທີ່​ນະຄອນຫຼວງ Abu Dhabi ປະເທດ​ສະຫະລັດ​ອາ​ຣັບ​ເອ​ມີ​ເຣ​​ສ.

ຂ່າວທີ່ກ່ຽວຂ້ອງ