ຂ່າວຫຼ້າສຸດ

ເຂື່ອນໄຟຟ້ານ້ຳງື່ມ 1 ເພີ່ມປະລິມານນ້ຳປ່ອຍອອກປະຕູ

393 06 ກ.ຍ. 2018 ຂ່າວໜ້າ​ໜຶ່ງ

    ເນື່ອງ​ຈາກ​ປັດ­ຈຸ­ບັນ​ມີ​ຮ່ອງ​ມໍ​ລະ​ສຸມ (ຮ່ອງ​ຝົນ) ພັດ​ຜ່ານ​ພາກ​ເໜືອ ແລະ ພາກ​ກາງ­ຂອງ​ປະ­ເທດ​ລາວ ​ສົມ­ທົບ​ກັບ​ລົມ​ມໍ​ລະ​ສຸມ​ຕາ­ເວັນ​ອອກ­ສຽງ​ໃຕ້​ ທີ່​ມີ​ກຳ­ລັງ​ແຮງ​ພັດ​ຜ່ານ​ເຮັດ​ໃຫ້​ບໍ­ລິ­ເວນ​ອ່າງ​ນ້ຳ​ງື່ມ 1 ແຂວງ​ວຽງ​ຈັນ ເກີດ​ມີ​ຝົນ­ຕົກ​ຕໍ່​ເນື່ອງ​ກັນ​ມາ​ແຕ່​ວັນ​ທີ 3 ສິງ­ຫາ 2018 ຈົນ​ເຖິງ​ປັດ­ຈຸ­ບັນ​ຍັງ​ບໍ່​ມີ​ທ່າ​ຈະ​ຢຸດ​ເຊົາ ແລະ ຈະ​ສືບ­ຕໍ່​ຕົກ​ໄປ​ເຖິງ​ວັນ​ທີ 9 ກັນ­ຍາ 2018 ຕາມ​ການ​ພະ­ຍາ­ກອນ​ຂອງ​ກົມ​ອຸ­ຕຸ­ນິ­ຍົມ ແລະ ອຸ​ທົກ​ກະ​ສາດ ສົມ­ທົບ​ກັບ​ເຂື່ອນ​ໄຟ­ຟ້າ​ນ້ຳ​ງື່ມ 2 ປ່ອຍ​ນ້ຳ​ລົງ​ມາ​ເປັນ​ຈຳ­ນວນ​ຫຼວງ­ຫຼາຍ.

    ນັບ​ແຕ່​ເວ­ລາ 0:00 ໂມງ​ຂອງ​ວັນ​ທີ 4 ກັນ­ຍາ 2018 ມີ​ປະ­ລິ­ມານ​ນ້ຳ​ໄຫຼ​ເຂົ້າ​ອ່າງ​ນ້ຳ​ງື່ມ 1 ສະ­ເລ່ຍ 2.777 ແມັດ​ກ້ອນ​ຕໍ່​ວິ­ນາ­ທີ ໄດ້​ເຮັດ​ໃຫ້​ລະ­ດັບ​ນ້ຳ­ໜ້າ​ເຂື່ອນ​ສູງ​ຂຶ້ນ 1 ຊັງ​ຕີ​ແມັດ​ຕໍ່​ຊົ່ວ­ໂມງ ມາ​ຮອດ​ເວ­ລາ 8:00 ໂມງ​ຂອງ​ວັນ​ທີ 4 ກັນ­ຍາ 2018 ລະ­ດັບ​ນ້ຳ​ຂຶ້ນ​ເຖິງ​ຈຸດ​ສູງ​ສຸດ 213 ແມັດ ເພື່ອ​ຮັກ­ສາ​ຄວາມ​ປອດ​ໄພ​ຂອງ​ໂຕ​ເຂື່ອນ ຈຶ່ງ​ມີ​ຄວາມ​ຈຳ­ເປັນ​ເປີດ​ປະ­ຕູ​ນ້ຳ​ຂຶ້ນ​ຈາກ 3,50 ແມັດ ມາ​ເປັນ 3,80 ແມັດ ໃນ​ເວ­ລາ 7:30 ໂມງ ໃນ​ປະ­ລິ­ມານ​ນ້ຳ​ທີ່​ລະ­ບາຍ​ຜ່ານ​ປະ­ຕູ​ນ້ຳ​ລົ້ນ 1.479 ແມັດ​ກ້ອນ​ຕໍ່​ວິ­ນາ­ທີ ໃນ​ຂະ­ນະ​ດຽວ​ກັນ​ນີ້​ລະ­ດັບ​ນ້ຳ​ຢູ່​ປາກ​ຂະ​ຍຸງ​ຈະ​ສູງ​ເພີ່ມ​ຂຶ້ນ​ປະ­ມານ 10-20 ຊັງ​ຕີ​ແມັດ ໃນ​ເວ­ລາ 2-3 ຊົ່ວ­ໂມງ ແລະ ເຂດ​ເມືອງ​ທຸ­ລະ­ຄົມ​ຈະ​ເພີ່ມ​ຂຶ້ນ 5-10 ໂມງ​ໃນ​ເວ­ລາ​ຕໍ່​ມາ​ຂອງ​ວັນ​ດຽວ​ກັນ​ຕາມ​ໄລ­ຍະ​ຂອງ​ສາຍ​ນ້ຳ ສົມ­ທົບ​ກັບ​ນ້ຳ​ຊອງ​ທີ່​ມີ​ປະ­ລິ­ມານ​ການ​ໄຫຼ​ເພີ່ມ​ຂຶ້ນ​ຈາກ 488 ແມັດ​ກ້ອນ​ຕໍ່​ວິ­ນາ­ທີ​ໃນ​ເວ­ລາ 0:00 ໂມງ ມາ​ເປັນ 640 ແມັດ​ກ້ອນ​ຕໍ່​ວິ­ນາ­ທີ ໃນ​ເວ­ລາ 8:00ໂມງ ເມື່ອ​ລວມ​ກັບ​ສາຍ​ນ້ຳ​ລີກ ແລະ ແຫຼ່ງ​ນ້ຳ​ອື່ນໆ ມີ​ຄວາມ​ອາດ​ສາ­ມາດ​ຈະ​ເຮັດ​ໃຫ້​ນ້ຳ​ຖ້ວມ​ເປັນ​ບໍ­ລິ­ເວນ​ກວ້າງ​ໃນ​ເຂດ​ເມືອງ​ທຸ­ລະ­ຄົມ ແຂວງ​ວຽງ​ຈັນ ເມືອງ​ໄຊ​ທາ­ນີ ແລະ ເມືອງ​ປາກ​ງື່ມ ນະ­ຄອນ­ຫຼວງ​ວຽງ​ຈັນ.

    ດັ່ງ­ນັ້ນ ຈຶ່ງ​ແຈ້ງ​ມາ​ຍັງ​ອຳ­ນາດ​ການ​ປົກ­ຄອງ​ທ້ອງ­ຖິ່ນ​ທຸກ​ຂັ້ນ ປະ­ຊາ­ຊົນ ພະ­ນັກ­ງານ ທະ­ຫານ ຕຳ­ຫຼວດ​ທີ່​ດຳລົງ​ຊີ­ວິດ​ຢູ່​ລຽບ​ແຄມ​ນ້ຳ​ງື່ມ​ທີ່​ມີ​ຈຸດ​ພື້ນ​ທີ່​ຕ່ຳ ຈົ່ງ​ພ້ອມ​ກັນ​ເກັບ​ມ້ຽນ​ວັດ­ຖຸ​ສິ່ງ​ຂອງ ເຄື່ອນ​ຍ້າຍ​ສັດ­ລ້ຽງ​ໄປ​ໄວ້​ບ່ອນ​ທີ່​ສູງ ແລະ ບ່ອນ​ປອດ​ໄພ ພ້ອມ​ທັງ​ຕິດ­ຕາມ​ຂໍ້​ມູນ​ຂ່າວ­ສານ​ຈາກ​ທາງ​ເຂື່ອນ​ໄຟ­ຟ້າ​ນ້ຳ​ງື່ມ 1 ດ້ວຍ.

ຂ່າວທີ່ກ່ຽວຂ້ອງ