ນໍ້າງື່ມ ສືບຕໍ່ເພີ່ມສູງຂຶ້ນ ແລະ ໄຫຼເຂົ້າຖ້ວມ 56 ບ້ານຂອງເມືອງໄຊທານີ

301 06 ກ.ຍ. 2018 ຂ່າວໜ້າ​ໜຶ່ງ
ນໍ້າງື່ມ ສືບຕໍ່ເພີ່ມສູງຂຶ້ນ ແລະ ໄຫຼເຂົ້າຖ້ວມ 56 ບ້ານຂອງເມືອງໄຊທານີ

    ນັບ​ແຕ່​ວັນ​ທີ 19 ສິງ­ຫາ 2018 ເປັນ­ຕົ້ນ​ມາ ລະ­ດັບ​ນ້ຳ​ງື່ມ ໄດ້​ເພີ່ມ​ຂຶ້ນ​ຢ່າງ​ຕໍ່​ເນື່ອງ ແລະ ໄຫຼ​ເຂົ້າ​ຖ້ວມ​ເນື້ອ­ທີ່​ທຳ​ການ​ຜະ­ລິດ ເຮືອນ​ປະ­ຊາ­ຊົນ​ຢູ່​ລຽບ​ແຄມ​ແມ່­ນ້ຳ​ງື່ມ ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ ນອກ​ນີ້​ຍັງ​ມີ​ເສັ້ນ­ທາງ​ຫຼາຍ​ເສັ້ນ​ບໍ່​ສາ­ມາດ​ສັນ­ຈອນ​ໄປ-ມາ​ໄດ້.

    ຄະ­ນະ​ກຳ­ມະ­ການ​ປ້ອງ​ກັນ ແລະ ຄວບ​ຄຸມ​ໄພ­ພິ­ບັດ​ເມືອງ​ໄຊ​ທາ­ນີ ໃຫ້​ສຳ­ພາດ​ວັນ​ທີ 4 ກັນ­ຍາ 2018 ວ່າ: ປັດ­ຈຸ­ບັນ ລະ­ດັບ​ນ້ຳ​ງື່ມ​ຢູ່​ເມືອງ​ໄຊ​ທາ­ນີ ແທກ​ໄດ້ 13,12 ແມັດ ກາຍ​ລະ­ດັບ​ອັນ­ຕະ­ລາຍ (12 ແມັດ) ເນື່ອງ​ຈາກ​ຝົນ­ຕົກ​ຕິດ­ຕໍ່​ກັນ​ຫຼາຍ​ວັນ ເຮັດ​ໃຫ້​ເຮືອນ​ປະ­ຊາ­ຊົນ​ໄດ້​ຮັບ​ຜົນ​ກະ­ທົບ 56 ບ້ານ 1.876 ຄອບ­ຄົວ ເນື້ອ­ທີ່​ການ​ຜະ­ລິດ​ເສຍ​ຫາຍ 2.902 ເຮັກ­ຕາ ໃນ​ນີ້​ເນື້ອ­ທີ່​ນາ 2.176 ເຮັກ­ຕາ ໜອງ​ປາ 184 ເຮັກ­ຕາ ສວນ 542 ເຮັກ­ຕາ ເສັ້ນ­ທາງ​ເສຍ​ຫາຍ 15 ເສັ້ນ ມູນ​ຄ່າ​ເສຍ​ຫາຍ​ເບື້ອງ​ຕົ້ນ 12 ຕື້​ກວ່າ​ກີບ.

    ພາຍ­ຫຼັງ​ທີ່​ນ້ຳ​ໄດ້​ໄຫຼ​ເຂົ້າ​ຖ້ວມ ອຳ­ນາດ​ການ​ປົກ­ຄອງ​ເມືອງ ກໍ່​ຄື​ຄະ­ນະ​ກຳ­ມະ­ການ​ປ້ອງ​ກັນ ແລະ ຄວບ​ຄຸມ​ໄພ­ພິ­ບັດ​ເມືອງ ກໍ່​ໄດ້​ເຂົ້າ​ຊ່ວຍ­ເຫຼືອ​ຍົກ­ຍ້າຍ​ຜູ້​ໄດ້​ຮັບ​ຜົນ​ກະ­ທົບ​ອອກ​ມາ​ຢູ່​ສະ­ຖານ­ທີ່​ພັກ­ຊົ່ວ­ຄາວ ໂດຍ​ສະ­ເພາະ​ໂຮງ­ຮຽນ​ທີ່​ມີ​ຄວາມ​ປອດ​ໄພ ຈຳ­ນວນ​ໜຶ່ງ​ກໍ່​ໄດ້​ຍົກ­ຍ້າຍ​ໄປ​ຢູ່​ນຳ​ຍາດ​ພີ່­ນ້ອງ ພ້ອມ​ນີ້​ກໍ່​ໄດ້​ໃຫ້­ການ​ຊ່ວຍ­ເຫຼືອ​ບັນ­ເທົາ​ທຸກ​ເບື້ອງ​ຕົ້ນ ໂດຍ​ສະ­ເພາະ​ເຄື່ອງ​ອຸ­ປະ­ໂພກ-ບໍ­ລິ­ໂພກ ເຄື່ອງ­ໃຊ້​ທີ່​ຈຳ­ເປັນ ແລະ ເງິນ​ບັນ­ເທົາ​ທຸກ​ຈຳ­ນວນ​ໜຶ່ງ ແລະ ໄດ້​ໃຫ້​ແພດ​ຫ້ອງ­ການ​ສາ­ທາ­ລະ­ນະ​ສຸກ​ເມືອງ ລົງ​ໄປ​ໃຫ້​ສຸ​ຂະ​ສຶກ​ສາ ແລະ ເບິ່ງ­ແຍງ​ສຸ­ຂະ­ພາບ​ຂອງ​ຜູ້​ໄດ້​ຮັບ​ຜົນ​ກະ­ທົບ​ຕື່ມ​ອີກ.

    ເພື່ອ​ກຽມ​ຄວາມ​ພ້ອມ​ຮັບ​ມື້​ກັບ​ລະ­ດັບ​ນ້ຳ​ງື່ມ​ທີ່​ອາດ​ຈະ​ເພີ່ມ​ຂຶ້ນ ຄະ­ນະ​ກຳ­ມະ­ການ​ປ້ອງ​ກັນ ແລະ ຄວບ​ຄຸມ​ໄພ­ພິ­ບັດ ຈິ່ງ​ຮຽກ­ຮ້ອງ​ມາ​ຍັງ​ປະ­ຊາ­ຊົນ​ຈົ່ງ​ມີ​ສະ­ຕິ​ລະ­ວັງ​ຕົວ ເກັບ​ມ້ຽນ​ເຄື່ອງ​ຂອງ ສັດ­ລ້ຽງ ແລະ ວັດ­ຖຸ​ມີ­ຄ່າ ໄວ້​ບ່ອນ​ທີ່​ປອດ​ໄພ ສຳ­ລັບ​ແຜນ­ການ​ຟື້ນ​ຟູ​ພາຍ­ຫຼັງ​ນ້ຳ​ຫຼຸດ​ລົງ ແມ່ນ​ຈະ​ໄດ້​ເຂົ້າ​ຊ່ວຍ­ເຫຼືອ​ຜູ້​ໄດ້​ຮັບ​ຜົນ​ກະ­ທົບ​ທຳ​ຄວາມ​ສະ­ອາດ​ເຮືອນ ແລະ ອະ­ນາ­ໄມ​ພື້ນ​ທີ່​ທຳ​ການ​ຜະ­ລິດ ພ້ອມ​ຊ່ວຍ​ແນວ​ພັນ​ພືດ ສ້ອມ­ແປງ​ຊົນ­ລະ­ປະ­ທານ ສັກ​ຢາ​ປ້ອງ​ກັນ​ພະ­ຍາດ​ສັດ ແລະ ຢາ​ປາບ​ສັດ­ຕູ​ພືດ.

ຂ່າວທີ່ກ່ຽວຂ້ອງ