ຂ່າວຫຼ້າສຸດ

ບ້ານນາກຸງ ໄດ້ຮັບເຄື່ອງຊ່ວຍເຫຼືອບັນເທົາທຸກເບື້ອງຕົ້ນ

178 06 ກ.ຍ. 2018 ຂ່າວໜ້າ​ໜຶ່ງ

    ວັນ​ທີ 4 ກັນ­ຍາ 2018 ພະ​ແນກ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ນະ­ຄອນ­ຫຼວງ​ວຽງ​ຈັນ (ນວ) ໄດ້​ນຳ​ເອົາ​ເຄື່ອງ​ມາ​ມອບ​ໃຫ້​ປະ­ຊາ­ຊົນ​ບ້ານ​ນາ​ກຸງ ເມືອງ​ໄຊ​ທາ­ນີ ນວ ທີ່​ໄດ້​ຮັບ​ຜົນ​ກະ­ທົບ​ຈາກ​ນ້ຳ​ຖ້ວມ ກ່າວ​ມອບ​ໂດຍ​ທ່ານ​ນາງ ລຳ​ພອຍ ສີ​ອັກ​ຄະ​ຈັນ ຫົວ­ໜ້າ​ພະ​ແນກ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ນວ ແລະ ກ່າວ​ຮັບ​ໂດຍ​ທ່ານ ບຸນ​ລຳ ແກ້ວ​ວັນ​ທອງ ເລ­ຂາ​ພັກ​ບ້ານ​ນາ​ກຸງ ມີ​ທ່ານ ຈັນ­ທະ​ລາ ອິນ​ທະ­ລັງ​ສີ ເຈົ້າ­ເມືອງ​ໄຊ​ທາ­ນີ ອຳ­ນາດ​ການ​ປົກ­ຄອງ​ບ້ານ ແລະ ຂະ­ແໜງ­ການ​ກ່ຽວ­ຂ້ອງ​ເຂົ້າ​ຮ່ວມ. 

    ເຄື່ອງ​ທີ່​ນຳ​ມາ​ມອບ​ຄັ້ງ​ນີ້ ປະ­ກອບ​ມີ​ເຄື່ອງ­ນຸ່ງ​ຫົ່ມ​ຈຳ­ນວນ 3 ຖົງ ນ້ຳ​ດື່ມ 300 ແພັກ ໝີ່ 193 ແກັດ ເຂົ້າ­ສານ 5 ເປົາ ນ້ຳ­ຫວານ 5 ແກັດ ປ່ອງ​ປາ 3 ແກັດ ແລະ ຊຸດ​ຢາ­ຖູ­ແຂ້ວ 1 ແກັດ ໂອ­ກາດ​ດັ່ງ­ກ່າວ ທ່ານ​ເລ­ຂາ​ພັກ​ບ້ານ​ນາ​ກຸງ ໄດ້​ສະ­ແດງ​ຄວາມ​ຂອບ­ໃຈ​ມາ​ຍັງ​ພະ​ແນກ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ນວ ທີ່​ເຫັນ​ໄດ້​ຄວາມ​ສຳ­ຄັນ​ເວ­ລາ​ປະ­ຊາ­ຊົນ​ພົບ​ຄວາມ​ຫຍຸ້ງ­ຍາກ ທີ່​ໄດ້​ນຳ​ເອົາ​ເຄື່ອງ​ມາ​ຊ່ວຍ­ເຫຼືອ​ເພື່ອ​ບັນ­ເທົາ​ທຸກ​ເບື້ອງ​ຕົ້ນ ໃຫ້​ກັບ​ປະ­ຊາ­ຊົນ​ຜູ້​ທີ່​ໄດ້​ຮັບ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ​ຈາກ​ນ້ຳ​ງື່ມ​ເພີ່ມ​ຂຶ້ນ ພ້ອມ​ທັງ​ຢືນ­ຢັນ​ວ່າ​ຈະ​ນຳ​ເອົາ​ເຄື່ອງ​ຊ່ວຍ­ເຫຼືອ​ຈຳ­ນວນ​ນີ້ ໄປ​ແຈກ​ຢາຍ​ໃຫ້​ປະ­ຊາ­ຊົນ​ຢ່າງ​ທົ່ວ​ເຖິງ.

    ບ້ານ​ນາ​ກຸງ ໄດ້​ຮັບ​ຜົນ​ກະ­ທົບ​ຈາກ​ລະ­ດັບ​ນ້ຳ​ງື່ມ ເພີ່ມ​ຂຶ້ນ​ໃນ​ວັນ​ທີ 19 ສິງ­ຫາ 2018 ແລະ ໄຫຼ​ເຂົ້າ​ເນື້ອ­ທີ່​ທຳ​ການ​ຜະ­ລິດ ແລະ ບ້ານ​ເຮືອນ​ປະ­ຊາ­ຊົນ​ຈຳ­ນວນ 193 ຄອບ­ຄົວ ໃນ​ນີ້​ປະ­ຊາ­ຊົນ​ໄດ້​ຖືກ​ຍົກ­ຍ້າຍ 45 ຄອບ­ຄົວ ເນື້ອ­ທີ່​ເສຍ​ຫາຍ 56,5 ເຮັກ­ຕາ ເນື້ອ­ທີ່​ໜອງ​ປາ 13 ເຮັກ­ຕາ ເນື້ອ­ທີ່​ສວນ 43,5 ເຮັກ­ຕາ ເພື່ອ​ເປັນ​ການ​ຮັບ​ມື​ກັບ​ພະ­ຍາດ​ທີ່​ຈະ​ເກີດ​ຂຶ້ນ ຫ້ອງ­ການ​ສາ­ທາ­ລະ­ນະ​ສຸກ​ເມືອງ​ໄຊ​ທາ­ນີ ໄດ້​ລົງ​ໄປ​ໃຫ້​ສຸ​ຂະ​ສຶກ​ສາ ແລະ ເບິ່ງ­ແຍງ​ສຸ­ຂະ­ພາບ​ຂອງ​ປະ­ຊາ­ຊົນ ເຊິ່ງ​ປັດ­ຈຸ­ບັນ​ມີ​ຄວາມ​ຕ້ອງ­ການ​ຊ່ວຍ­ເຫຼືອ​ທາງ​ດ້ານ​ວິດ­ຖ່າຍ ນ້ຳ​ສະ­ອາດ ແລະ ອື່ນໆ.

ຂ່າວທີ່ກ່ຽວຂ້ອງ