ແມ່ຍິງລາວທີ່ມີເງື່ອນໄຂ ສາມາດເຂົ້າຮ່ວມຄັດເລືອກນາງສາວລາວ 2018

277 06 ກ.ຍ. 2018 ຂ່າວໜ້າ​ໜຶ່ງ
ແມ່ຍິງລາວທີ່ມີເງື່ອນໄຂ ສາມາດເຂົ້າຮ່ວມຄັດເລືອກນາງສາວລາວ 2018

    ພິ­ທີ​ຖະ­ແຫຼງ​ຂ່າວ​ໂຄງ­ການ​ຄັດ​ເລືອກ​ນາງ​ສາວ​ລາວ ປະ­ຈຳ​ປີ 2018 ຈັດ​ຂຶ້ນ​ວັນ​ທີ 3 ກັນ­ຍາ 2018 ທີ່​ໂຮງ­ແຮມ​ຄຣາວ​ພລາ​ຊາ ນະ­ຄອນ­ຫຼວງ​ວຽງ​ຈັນ ມີ​ທ່ານ ບຸນ​ຕາ ເທບ​ພະ​ວົງ ຮອງ​ເລ­ຂາ​ຄະ­ນະ​ບໍ­ລິ­ຫານ​ງານ​ສູນ​ກາງ​ຊາວ​ໜຸ່ມ ປະ­ຊາ­ຊົນ​ປະ­ຕິ­ວັດ​ລາວ ທ່ານ ຄຳ​ພວງ ອິນ​ທະ​ວົງ​ສີ ຫົວ­ໜ້າ​ກົມ​ສິ­ລະ​ປະ ແລະ ການ­ສະ­ແດງ ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ພ້ອມ​ດ້ວຍ​ຕາງ­ໜ້າ​ຈາກ​ພາກ­ສ່ວນ​ກ່ຽວ­ຂ້ອງ ຜູ້​ໃຫ້­ການ​ສະ­ໜັບ­ສະ­ໜູນ ແລະ ແຂກ​ຖືກ​ເຊີນ​ເຂົ້າ​ຮ່ວມ.

    ທ່ານ ຄົມ​ປັນ­ຍາ ເພັງ​ວິ­ໄນ​ຍາ ອຳ­ນວຍ​ການ​ບໍ­ລິ­ສັດ ຄົມ​ປັນ­ຍາ​ເອັນ​ເຕີ​ເທນ​ເມັນ​ອີ​ເວັນ​ແອນ​ອໍ​ເກ​ໄນ​ເຊີ້ ຈຳ­ກັດ ທັງ​ເປັນ​ປະ­ທານ​ໂຄງ­ການ​ຄັດ​ເລືອກ​ນາງ​ສາວ​ລາວ ກ່າວ​ວ່າ: ການ​ຄັດ​ເລືອກ​ນາງ​ສາວ​ລາວ​ປີ 2018 ແມ່ນ​ສູນ​ກາງ​ຊາວ​ໜຸ່ມ ປປລ ຮ່ວມ​ກັບ​ບໍ­ລິ­ສັດ ຄົມ​ປັນ­ຍາ​ເອັນ​ເຕີ​ເທນ​ເມັນ​ອີ​ເວັນ​ແອນ​ອໍ​ເກ​ໄນ​ເຊີ້ ຈຳ­ກັດ ຈັດ​ຂຶ້ນ​ຕາມ​ໜັງ­ສື​ອະ­ນຸ­ມັດ​ໂຄງ­ການ​ຈາກ​ກົມ​ຂະ​ບວນ​ການ​ຊາວ​ໜຸ່ມ​ສູນ​ກາງ​ຊາວ​ໜຸ່ມ ປປລ ເພື່ອ​ເປັນ​ການ​ຄົ້ນ​ຫາ ແລະ ຈັດ­ການ​ຄັດ​ເລືອກ​ນາງ​ສາວ​ລາວ 2018 ໃຫ້​ໄດ້​ມາດ­ຕະ­ຖານ ຖືກ­ຕ້ອງ​ບັນ­ລຸ​ຈຸດ­ປະ­ສົງ ແລະ ເປົ້າ​ໝາຍ​ຕ່າງໆ​ຂອງ​ໂຄງ­ການ​ທີ່​ໄດ້​ວາງ​ໄວ້​ທົ່ວ​ປະ­ເທດ ເຊິ່ງ​ໂຄງ­ການ​ດັ່ງ­ກ່າວ​ມີ​ຄວາມ​ພ້ອມ​ແລ້ວ​ທີ່​ຈະ​ມອບ​ພາ­ລະ­ກິດ ບາດ­ກ້າວ​ອັນ​ສຳ­ຄັນ​ໃຫ້​ແກ່​ແມ່­ຍິງ​ລາວ​ທົ່ວ​ປະ­ເທດ​ພ້ອມ 3 ຕຳ­ແໜ່ງ​ຂອງ​ເວ­ທີ​ແຫ່ງ​ກຽດ­ຕິ­ຍົດ ແລະ ຄວາມ​ພາກ­ພູມ​ໃຈ​ຂອງ​ແມ່­ຍິງ​ລາວ ປະ­ກອບ​ມີ​ຕຳ­ແໜ່ງ​ນາງ​ສາວ​ລາວ 2018 ໃນ​ການ​ເປັນ​ແບບ­ຢ່າງ​ຂອງ​ແມ່­ຍິງ​ລາວ​ໃຫ້​ແກ່​ຄົນ​ຍຸກ​ສະ­ໄໝ ໃນ​ການ​ຮັກ­ສາ​ວັດ­ທະ­ນະ­ທຳ ແລະ ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ຊາດ​ລາວ ນອກ​ນີ້​ຍັງ​ມີ​ຕຳ­ແໜ່ງ​ນາງ​ສາວ​ທູດ​ວັດ­ທະ­ນະ­ທຳ ທ່ອງ​ທ່ຽວ​ລາວ ແລະ ຕຳ­ແໜ່ງ​ນາງ​ສາວ​ທູດ​ການ​ສຶກ​ສາ ສະ­ນັ້ນ ເພື່ອ​ຄົ້ນ​ຫາ​ຜູ້​ທີ່​ເໝາະ​ສົມ​ກັບ​ຕຳ­ແໜ່ງ​ດັ່ງ­ກ່າວ ທາງ​ຄະ­ນະ​ຮັບ­ຜິດ­ຊອບ​ໂຄງ­ການ ຈຶ່ງ​ຄົ້ນ​ຫາ​ຕົວ​ແທນ​ແມ່­ຍິງ​ລາວ​ທີ່​ມີ​ຄວາມ​ຮູ້ ຄວາມ​ສາ­ມາດ ກ້າ​ສະ­ແດງ​ອອກ ແລະ ຮັກ​ໃນ​ວັດ­ທະ­ນະ­ທຳ​ການ​ນຸ່ງ​ຖື​ຂອງ​ຊາດ​ລາວ ເຊິ່ງ​ມີ​ຂໍ້​ກຳ­ນົດ​ໄວ້​ຄື: ເປັນ​ຜູ້­ຍິງ​ໂດຍ​ກຳ­ເນີດ ມີ​ສັນ­ຊາດ​ລາວ ໂສດ (ບໍ່​ເຄີຍ​ແຕ່ງ­ດອງ​ມາ​ກ່ອນ) ບໍ່​ເຄີຍ​ຜ່ານ​ການ​ມີ​ລູກ​ມາ​ກ່ອນ ມີ​ອາ­ຍຸ​ລະ­ຫວ່າງ 18-26 ປີ ມີ​ຄວາມ​ສູງ 1,65 ແມັດ​ຂຶ້ນ​ໄປ ມີ​ຄວາມ​ຮູ້​ພື້ນ­ຖານ​ດີ​ໃນ​ດ້ານ​ຕ່າງໆ ເປັນ​ບຸກ­ຄົນ​ທີ່​ມີ​ປະ­ຫວັດ​ດີ ແລະ ການ​ປະ­ພຶດ​ຕົນ​ທີ່​ດີ​ຕໍ່​ສັງ­ຄົມ ເຊິ່ງ​ຜູ້​ທີ່​ມີ​ສ່ວນ​ຮ່ວມ​ໃນ​ໂຄງ­ການ​ປີ​ນີ້ ປະ­ກອບ​ມີ​ບໍ­ລິ­ສັດ ຄົມ​ປັນ­ຍາ​ເອັນ​ເຕີ​ເທນ​ເມັນ​ອີ​ເວັນ​ແອນ​ອໍ​ເກ​ໄນ​ເຊີ້ CASC ສູນ​ແນະ­ນຳ​ການ​ສຶກ​ສາ​ຕໍ່​ປະ­ເທດ​ຈີນ Miracle production Big Blue Agency Laos ໂຮງ­ພິມ​ເທບ​ປັນ­ຍາ ແລະ ເທບ​ປັນ­ຍາ​ປ້າຍ ໄອ​ເຕັກ​ມໍ Action Pro ແລະ Pixel Production.

    ເພື່ອ​ຄົ້ນ​ຫາ​ຕົວ​ແທນ​ຈາກ​ແຕ່​ລະ​ແຂວງ ທາງ​ໂຄງ­ການ​ຄັດ​ເລືອກ​ຈະ​ໄດ້​ຈັດ​ກິດ­ຈະ­ກຳ​ແຕ່​ລະ​ພາກ​ໃນ​ທົ່ວ​ປະ­ເທດ ເພື່ອ​ຮັບ​ສະ­ໝັກ​ພ້ອມ​ຈັດ​ຮອບ​ຄັດ​ເລືອກ​ຕັ້ງ­ແຕ່​ມື້​ຖະ­ແຫຼງ​ຂ່າວ ຈົນ​ຮອດ​ວັນ​ທີ 16 ຕຸ­ລາ 2018 ສ່ວນ​ວັນ​ທີ 2 ພະ­ຈິກ 2018 ຈະ​ໄດ້​ຈັດ​ງານ​ຖະ­ແຫຼງ​ຂ່າວ​ແນະ­ນຳ​ນາງ​ສາວ​ລາວ​ຜູ້​ເຂົ້າ​ຮອບ 40 ຄົນ​ສຸດ​ທ້າຍ ພ້ອມ​ກິດ­ຈະ­ກຳ​ເກັບ​ໂຕ ແລະ ເຝິກ­ຊ້ອມ​ຂອງ​ບັນ­ດາ​ຜູ້​ເຂົ້າ​ຮ່ວມ​ຄັດ​ເລືອກ ໂດຍ​ມີ​ການ​ສ້າງ​ລາຍ­ການ​ພິ­ເສດ​ຕາມ​ຊີ­ວິດ​ນາງ​ສາວ​ລາວ​ຜ່ານ Facebook Fan Page ນອກ​ນັ້ນ ເພື່ອ​ກຽມ​ຄວາມ​ພ້ອມ​ສຳ­ລັບ​ການ​ຄັດ​ເລືອກ​ຮອບ​ຕັດ­ສິນ​ທີ່​ຈະ​ຈັດ​ຂຶ້ນ​ວັນ​ທີ 7 ທັນ­ວາ 2018 ພ້ອມ​ການ­ສະ­ແດງ​ເວ­ທີ​ໄຟ​ແສງ​ສີ​ຢ່າງ​ເຕັມ​ຮູບ​ແບບ ແລະ ຕົວ​ແທນ​ຈາກ​ທົ່ວ​ປະ­ເທດ​ຕ້ອງ​ເຂົ້າ​ຮ່ວມ​ແຂ່ງ­ຂັນ​ຄວາມ​ງາມ ຄວາມ​ສາ­ມາດ​ເພື່ອ​ຕຳ­ແໜ່ງ​ອັນ​ຊົງ​ກຽດ ທີ່​ມີ​ເງິນ​ຫຼາຍ​ກວ່າ​ປະ­ຈຳ​ຕຳ­ແໜ່ງ​ມົງ​ກຸດ​ເພັດ​ຈາກ​ຮ້ານ​ຄຳ​ພູ​ວົງ ທຶນ​ການ​ສຶກ​ສາ​ຕໍ່​ລະ­ດັບ​ປະ­ລິນ­ຍາ​ຕີ​ທີ່ ສປ ຈີນ ແລະ ຫຼາຍ​ລາ­ງວັນ​ຈາກ​ຜູ້​ສະ­ໜັບ­ສະ­ໜູນ​ຕື່ມ​ອີກ.

ຂ່າວທີ່ກ່ຽວຂ້ອງ