ເກີດ​ພະຍາດ​ລະບາດ​ຫຼັງ​ນ້ຳ​ຖ້ວມ​ໃນ​ອິນ​ເດຍ

174 06 ກ.ຍ. 2018 ຂ່າວຕ່າງປະເທດ
ເກີດ​ພະຍາດ​ລະບາດ​ຫຼັງ​ນ້ຳ​ຖ້ວມ​ໃນ​ອິນ​ເດຍ

      ນັບ​ແຕ່​ເດືອນ​ສິງຫາ​ເປັນຕົ້ນ​ມາ ມີ​ຜູ້​ເສຍ​ຊີວິດ​ແລ້ວ​ຢ່າງ​ໜ້ອຍ 12 ຄົນ ຢູ່​ໃນ​ລັດ ເກ​ຣາ​ລາ (ພາກ​ໃຕ້​ອິນ​ເດຍ) ຍ້ອນ​ຕິດພະຍາດ​ໄຂ້​ຈາກ​ການ​ຖືກ​ໜູ​ກັດ ແລະ​ຍັງ​ມີ​ອີກ 54 ຄົນ ສົງ​ໃສ​ວ່າ ຕິດພະຍາດ​ດັ່ງກ່າວ ຫຼັງ​ຈາກ​ທີ່​ລັດ​ດັ່ງກ່າວ ປະ​ເຊີນ​ກັບ​ສະພາບ​ຝົນຕົກ​ໜັກ ເຮັດ​ໃຫ້​ເກີດ​ນ້ຳ​ຖ້ວມ ຮ້າຍ​ແຮງ​ທີ່​ສຸດ​ໃນ​ຮອບ 100 ປີ​ທີ່​ຜ່ານ​ມາ.

    ສະຖິຕິ​ຂອງ​ອຳນາດ​ການ​ປົກຄອງ​ທ້ອງຖິ່ນ ຊຶ່ງ​ນຳ​ອອກ​ມາ​ເປີດເຜີຍ​ເມື່ອ​ວັນ​ທີ 4 ກັນຍາ​ນີ້ ໃຫ້​ຮູ້​ວ່າ ມີ​ປະມານ 372 ຄົນ ໄດ້​ຮັບ​ຜົນ​ກະທົບ​ຈາກ​ພະຍາດ “ໄຂ້​ໜູ”. ຜູ້ຕາງໜ້າ​ຂອງ​ອົງການ ອະນາໄມ​ໂລກ (WHO) ໃຫ້​ຮູ້​ວ່າ ເຊື້ອ​ພະຍາດ​ຕິດຕໍ່​ຂອງ “ໄຂ້​ໜູ” ສາມາດ​ແຊກ​ຊຶມ​ເຂົ້າ​ໄປ ໃນ​ຮ່າງກາຍ​ຂອງ​ຄົນ​ຜ່ານ​ຮອຍ​ກັດ ຫຼື​ຮອຍ​ຄູດ​ເທິງ​ຜີວ​ໜັງ ຫຼື​ບໍ່​ກໍ​ຜ່ານ​ການ​ສຳ​ພັດ​ຜ່ານ​ປາກ ດັງ ແລະ​ຕາ. ຜູ້​ທີ່​ຕິດພະຍາດ​ດັ່ງກ່າວ ມີ​ອາການ​ໄຂ້​ສູງ ເຈັບ​ກ້າມຊີ້ນ ແລະ​ຮາກ.

    ຄຽງ​ຄູ່​ກັນ​ນັ້ນ ພະຍາດ​ອື່ນໆ ອັນ​ລວມ​ເຖິງ​ໄຂ້ເລືອດອອກ ກໍ​ລະບາດ​ຢູ່​ໃນ​ລັດ ເກ​ຣາ​ລາ ຊຶ່ງ​ໄດ້​ເຮັດ​ໃຫ້​ມີ​ຜູ້​ເສຍ​ຊີວິດ​ແລ້ວ 28 ຄົນ. ໃນ​ຂະນະ​ດຽວ​ກັນ ຍັງ​ມີ​ອີກ 50.000 ກວ່າ​ຄົນ​ຢູ່​ໃນ​ລັດ ເກ​ຣາ​ລາ ເປັນ​ພະຍາດ​ຖອກທ້ອງ​ຮຸນ​ແຮງ ໃນ​ຂະນະ​ທີ່​ມີ​ຫຼາຍ​ກໍລະນີ ຕິດພະຍາດ​ມາລາ​ເຣຍ ແລະ ພະຍາດ​ອື່ນໆ.

    ເມື່ອ​ປີ 2017 ຢູ່​ໃນ​ລັດ​ເກ​ຣາ​ລາ ກໍ​ເກີດ​ການ​ລະບາດ​ຂອງ​ໄວ​ຣັດ ນີ​ປາ (Nipah) ຊຶ່ງ​ຕົ້ນຕໍ​ແມ່ນ​ຕິດຕໍ່​ມາ​ຈາກ​ພວກ​ໂຕ​ເຈຍ ເປັນ​ເຫດ​ໃຫ້​ມີ​ຜູ້​ເສຍ​ຊີວິດ 13 ຄົນ.

   ທາງ​ດ້ານ​ກະຊວງ​ພາຍ​ໃນ​ຂອງ​ອິນ​ເດຍ ແຈ້ງ​ໃຫ້​ຮູ້​ວ່າ ມີ​ຜູ້​ເສຍ​ຊີວິດ 1.400 ກວ່າ​ຄົນ ຈາກ​ສະພາບ​ຝົນຕົກ​ໜັກ ນ້ຳ​ຖ້ວມ ແລະ ດິນ​ເຈື່ອນ​ຮ້າຍ​ແຮງ​ທີ່​ສຸດ​ໃນ​ຮອບ 100 ປີ​ທີ່​ຜ່ານ​ມາ ຊຶ່ງ​ເກີດ​ຂຶ້ນ​ຢູ່​ໃນ 10 ລັດ ຂອງ​ອິນ​ເດຍ.

 

ຂ່າວທີ່ກ່ຽວຂ້ອງ