ເບິ່ງບ້ານເຂົາເອົາບົດຮຽນ 06/09/2018

161 06 ກ.ຍ. 2018 ຫົວຂໍ້ຂ່າວອື່ນໆ

    ມື້­ນີ້​ມີ​ເລື່ອງ​ທາງ​ການ​ຂອງ ມຽນ​ມາ ຈັດ​ຂາຍ​ເຮືອນ​ລາ­ຄາ​ຕ່ຳ ແລະ ລາ­ຄາ​ຖືກ​ໃຫ້​ພະ­ນັກ­ງານ-ປະ­ຊາ­ຊົນ ແລະ ເລື່ອງ ປາ​ນາ​ມາ ຈັດ​ຕັ້ງ​ກອງ​ກຳ­ລັງ​ປົກ​ປ້ອງ​ແມ່­ຍິງ​ຈາກ​ການ​ໃຊ້​ຄວາມ​ຮຸນ​ແຮງ.

    ທີ່ ມຽນ​ມາ: ອີງ​ຕາມ​ແຫຼ່ງ​ຂ່າວ ເອ​ລິ​ເວັນ ເມ​ເດຍ (Eleven Media Group) ຂອງ​ມຽນ​ມາ ໜັງ­ສື­ພິມ​ວຽງ​ຈັນ​ທາມ ສະ­ບັບ​ວັນ​ທີ 28 ເດືອນ​ກໍ­ລະ­ກົດ​ປີ​ນີ້ ໃຫ້​ຮູ້​ວ່າ: ໂຄງ­ການ​ສະ­ໜອງ​ທີ່​ພັກ​ຂອງ​ເຂດ ນະ­ຄອນ​ຢາງ​ກຸ້ງ ມຽນ​ມາ ໄດ້​ສຳ­ເລັດ​ການ​ຂາຍ​ເຮືອນ​ຢູ່​ລາ­ຄາ​ຕ່ຳ ແລະ ລາ­ຄາ​ຖືກ ຈຳ­ນວນ 864 ຫົວ­ໜ່ວຍ ໂຄງ­ການ​ສະ­ໜອງ​ທີ່​ພັກ​ນີ້ ມີ​ເປົ້າ​ໝາຍ​ເພື່ອ​ຂາຍ​ໃຫ້​ພະ­ນັກ­ງານ​ລັດ ພະ­ນັກ­ງານ ກຳ­ມະ­ກອນ​ຂອງ​ບໍ­ລິ­ສັດ​ຕ່າງໆ ແລະ ພະ­ນັກ­ງານ​ບຳ­ນານ ເນື່ອງ​ຈາ​ກວ່າ ຈຳ­ນວນ​ຜູ້​ທີ່​ຕ້ອງ­ການ​ທີ່​ພັກ​ມີ​ຫຼາຍ​ກວ່າ​ຈຳ­ນວນ​ເຮືອນ ດັ່ງ­ນັ້ນ ການ​ຂາຍ​ຈຶ່ງ​ດຳ­ເນີນ​ໄປ​ດ້ວຍ​ວິ­ທີ​ຈົກ​ສະ­ຫຼາກ ເຊິ່ງ​ມີ​ຂຶ້ນ​ໃນ​ວັນ​ທີ 25 ແລະ 26 ເດືອນ​ກໍ­ລະ­ກົດ​ປີ​ນີ້ ຜູ້​ທີ່​ຕ້ອງ­ການ​ຊື້​ເຮືອນ​ດັ່ງ­ກ່າວ ຕ້ອງ​ໄດ້​ຍື່ນ​ຄຳ​ຮ້ອງ​ເຖິງ​ຄະ­ນະ​ກຳ­ມະ­ການ​ຮັບ­ຜິດ­ຊອບ​ຂາຍ​ທີ່​ພັກ ເພື່ອ​ຮັບ­ປະ­ກັນ​ຄວາມ​ໂປ່ງ​ໃສ ຍຸ­ຕິ​ທຳ ແລະ ຄວາມ​ເປັນ​ລະ­ບຽບ​ຮຽບ​ຮ້ອຍ​ບັນ­ດາ​ນັກ​ສຶກ​ສາ ໄດ້​ຖືກ​ແຕ່ງ­ຕັ້ງ​ໃຫ້​ເປັນ​ຜູ້​ຈົກ​ສະ­ຫຼາກ ແທນ​ທີ່​ຈະ​ແມ່ນ​ບັນ­ດາ​ເຈົ້າ​ຂອງ​ຄຳ​ຮ້ອງ​ທີ່​ພັກ ທັງ 864 ຫົວ­ໜ່ວຍ ທີ່​ຈັດ​ຈຳ­ໜ່າຍ​ດ້ວຍ​ວິ­ທີ​ຈົກ​ສະ­ຫຼາກ​ນີ້ ຕັ້ງ​ຢູ່ 6 ເຂດ​ຂອງ​ນະ­ຄອນ​ຢາງ​ກຸ້ງ ສ່ວນ​ແບ່ງ​ໃນ​ການ​ຂາຍ​ທີ່​ພັກ​ຊຸດ​ທຳ​ອິດ​ນີ້ ຈັດ​ເປັນ​ພູດ​ດັ່ງ­ນີ້: 35% ສຳ­ລັບ​ປະ­ຊາ­ຊົນ​ທົ່ວ​ໄປ 25% ສຳ­ລັບ​ພະ­ນັກ­ງານ-ກຳ­ມະ­ກອນ ບໍ­ລິ­ສັດ 15% ສຳ­ລັບ​ພະ­ນັກ­ງານ​ບຳ­ນານ ຜູ້​ທີ່​ມີ​ລາຍ​ຮັບ​ຕ່ຳ​ກວ່າ 500.000 ຈາດ ມີ​ສິດ​ຊື້​ທີ່​ພັກ​ລາ­ຄາ​ຕ່ຳ ຜູ້​ທີ່​ມີ​ລາຍ​ຮັບ​ສູງ​ກວ່າ 500.000 ຈາດ ມີ​ສິດ​ຊື້​ທີ່​ພັກ​ລາ­ຄາ​ຖືກ.

    ທີ່ ປາ​ນາ​ມາ: ໜຶ່ງ​ໃນ​ບັນ­ດາ​ບັນ­ຫາ​ສັງ­ຄົມ​ທີ່​ພວມ​ກາຍ­ເປັນ​ສິ່ງ​ທ້າ​ທາຍ​ສຳ­ຄັນ​ຂອງ​ປາ​ນາ​ມາ-ປະ­ເທດ​ໃນ​ອາ​ເມ​ຣິ​ກາ​ກາງ ແຫ່ງ​ນີ້ ກໍ່​ຄື​ເລື່ອງ​ຄວາມ​ປອດ​ໄພ​ຂອງ​ເພດ​ຍິງ ເຊິ່ງ​ໄດ້​ຕົກ​ເປັນ​ເຫຍື່ອ​ຂອງ​ເຫດ­ການ​ຮຸນ​ແຮງ​ນັບ​ມື້​ເພີ່ມ​ຂຶ້ນ ສະ­ຖິ­ຕິ​ທາງ​ການ​ຂອງ​ປະ­ເທດ​ນີ້​ໄດ້​ຊີ້​ອອກ​ວ່າ ນັບ​ແຕ່​ປີ 2015 ມາ​ເຖິງ​ປັດ­ຈຸ­ບັນ ເຫດ­ການ​ໃຊ້​ຄວາມ​ຮຸນ​ແຮງ​ໄດ້​ເກີດ​ຂຶ້ນ​ຫຼາຍ​ກວ່າ 63.000 ກໍ­ລະ­ນີ ໃນ​ນັ້ນ ຈຳ­ນວນ​ຜູ້​ເຄາະ​ຮ້າຍ ສ່ວນ​ໃຫຍ່​ແມ່ນ​ແມ່­ຍິງ​ຄື​ຖືກ​ຂ້າ​ຕາຍ 72 ຄົນ ສ່ວນ​ແມ່­ຍິງ​ທີ່​ຖືກ​ປອງ​ຮ້າຍ ແລະ ຂົ່ມ­ຂູ່​ເອົາ​ຊີ­ວິດ​ນັ້ນ ມີ​ຈຳ­ນວນ 37 ຄົນ ຍ້ອນ​ແນວ​ນີ້​ເອງ ທາງ​ກອງ​ກຳ­ລັງ​ຕຳ­ຫຼວດ ປາ​ນາ​ມາ ຈຶ່ງ​ໄດ້​ລິ​ເລີ່ມ​ສ້າງ­ຕັ້ງ​ໜ່ວຍ​ປະ­ຕິ­ບັດ​ງານ​ພິ­ເສດ ທີ່​ເຮັດ​ໜ້າ­ທີ່​ປ້ອງ​ກັນ ແລະ ປາບ​ປາມ​ທຸກ​ຮູບ​ການ​ທຳ­ຮ້າຍ​ຕໍ່​ແມ່­ຍິງ ໜ່ວຍ​ປະ­ຕິ­ບັດ​ງານ​ພິ­ເສດ​ນີ້ ມີ​ເຈົ້າ​ໜ້າ­ທີ່​ຕຳ­ຫຼວດ ຈຳ­ນວນ 200 ຄົນ ທີ່​ຜ່ານ​ການ​ເຝິກ­ອົບ­ຮົມ​ພິ­ເສດ ເປັນ​ເວ­ລາ 2 ປີ ໜ້າ­ທີ່​ຕົ້ນ­ຕໍ​ຂອງ​ໜ່ວຍ​ງານ​ນີ້ ກໍ່​ຄື ປ້ອງ​ກັນ​ສະ­ກັດ​ກັ້ນ ແລະ ກ້າວ​ໄປ​ສູ່​ການ​ລຶ­ບລ້າງ​ທຸກ​ຮູບ​ການ​ໃຊ້​ຄວາມ​ຮຸນ​ແຮງ​ຕໍ່​ເພດ​ຍິງ ນອກ­ຈາກ​ນັ້ນ ຍັງ​ເຮັດ​ໜ້າ­ທີ່​ສືບ­ສວນ-ສອບ​ສວນ ບັນ­ດາ​ຄະ­ດີ​ຕ່າງໆ​ທີ່​ພົວ­ພັນ​ກັບ​ການ​ໃຊ້​ຄວາມ​ຮຸນ​ແຮງ​ຕໍ່​ເພດ​ຍິງ​ອີກ​ດ້ວຍ.

ຂ່າວທີ່ກ່ຽວຂ້ອງ