ສ ເກົາຫຼີ ປະກາດ​ເນື້ອ​ໃນ FTA ສະບັບ​ດັດແກ້​ກັບ ສ ອາ​ເມ​ຣິ​ກາ

184 06 ກ.ຍ. 2018 ຂ່າວຕ່າງປະເທດ
ສ ເກົາຫຼີ ປະກາດ​ເນື້ອ​ໃນ FTA ສະບັບ​ດັດແກ້​ກັບ ສ ອາ​ເມ​ຣິ​ກາ

     ກະຊວງ​ການ​ຄ້າ ອຸດສາຫະກຳ ແລະ ພະລັງງານ​ຂອງ ສ ເກົາຫຼີ ແຈ້ງ​ໃຫ້​ຮູ້ເມື່ອ​ວັນ​ທີ 3 ກັນຍາ​ນີ້​ວ່າ ສ ເກົາຫຼີ ຈະ​ດຳເນີນ​ການ​ເອົາ​ຄວາມ​ຄິດ​ຄວາມ​ເຫັນ​ຈາກ​ປວງ​ຊົນ ກ່ຽວ​ກັບ​ສັນຍາ​ການ​ຄ້າ ເສລີ​ກັບ ສ ອາ​ເມ​ຣິ​ກາ (KORUS FTA) ຊຶ່ງ​ຫາ​ກໍ​ໄດ້​ຮັບ​ການ​ດັດແກ້​ໄປ​ເມື່ອ​ບໍ່​ດົນ​ມາ​ນີ້ ກ່ອນ​ທີ່​ຈະ ນຳ​ສະເໜີ​ຕໍ່​ສະ​ພາ​​​ແຫ່ງ​ຊາດ ເພື່ອ​ໃຫ້​ສັດຕະຍາບັນ ໂດຍ​ຜ່ານ​ນັ້ນ​ກໍ​ວາງ​ຄາດໝາຍ ເຮັດ​ສຳເລັດ ເອກະສານ​ຕ່າງໆ​ຢູ່​ພາຍ​ໃນ​ປະເທດ​ໃນ​ປີ​ນີ້ ສຳລັບ​ສັນຍາ​ດັ່ງກ່າວ.

    ກະຊວງ​ດັ່ງກ່າວ ໄດ້​ປະກາດ​ບັນດາ​ຂໍ້ຄວາມ​ຂອງ​ສັນຍາ KORUS FTA ສະບັບ​ດັດແກ້ ເພື່ອ​ດຳເນີນ​ການ​ເອົາ​ຄວາມ​ເຫັນ​ຈາກ​ປວງ​ຊົນ ໄປ​ຮອດ​ວັນ​ທີ 10 ກັນຍາ​ນີ້ ຊຶ່ງ​ນີ້​ເປັນ​ການ ດຳເນີນ​ການ​ດ້ານ​ເອກະສານ​ແບບ​ບັງຄັບ ຕາມ​ກົດໝາຍ​ວ່າ​ດ້ວຍ​ການ​ຄ້າ​ຂອງ ສ ເກົາຫຼີ.

    ສັນຍາ​ສະບັບ​ດັດແກ້​ດັ່ງກ່າວ ລະບຸ​ວ່າ ສ ອາ​ເມ​ຣິ​ກາ​ຈະ​ແກ່ຍາວ​ເວລາ​ປະຕິບັດ​ພາສີ  25% ສຳລັບ​ລົດ​ກະບະ​ທີ່​ນຳ​ເຂົ້າ​ຈາກ ສ ເກົາຫຼີ ໄປ​ຕື່ມ​ອີກ 20 ປີ ຄື​ຮອດ​ປີ 2041. ສັນຍາ ດັ່ງກ່າວ​ກໍ​ຮຽກຮ້ອງ​ໃຫ້ ສ ເກົາຫຼີ ຍົກ​ລະດັບ​ກຳນົດ​ລົດຍົນ​ນຳ​ເຂົ້າ​ຈາກ ສ ອາ​ເມ​ຣິ​ກາ ຈຳນວນ 25.000 ຄັນ​ນັ້ນ​ຂຶ້ນ​ທົບ​ສອງ​ເທົ່າ​ຕົວ ຊຶ່ງ​ບໍ່​ຕ້ອງ​ປະຕິບັດ​ຂໍ້​ກຳນົດ​ຂອງ​ຂະແໜງການ​ຢູ່​ພາຍ​ໃນ​ປະເທດ ນັ້ນ​ກໍ​ໝາຍ​ຄວາມ​ວ່າ ການ​ນຳ​ເອົາ​ລົດຍົນ 50.000 ຄັນ ຈາກ ສ ອາ​ເມ​ຣິ​ກາ ເຂົ້າ​ໄປ​ໃນ ສ ເກົາຫຼີ ໄດ້​ຢ່າງ​ງ່າຍດາຍ​ຂຶ້ນ. ໃນ​ຂະນະ​ດຽວ​ກັນ ສ ເກົາຫຼີ ກໍ​ຈະ​ໂຍະຍານ​ດ້ານ​ມາດຕະຖານ ກ່ຽວ​ກັບ​ການ​ປ່ອຍ​ແກ​​ັສ ສຳລັບ​ລົດຍົນ​ທີ່​ນຳ​ເຂົ້າ ແຕ່​ປີ 2021-2025 ໃນ​ຂະນະ​ທີ່​ສ້າງ​ຂໍ້​ກຳນົດ ການ​ນຳ​ເຂົ້າ​ໃໝ່.

    ຢູ່​ໃນ​ຂົງເຂດ​ການ​ຢາ ສ ເກົາຫຼີ ເຫັນ​ດີ​ດັດແກ້​ນະໂຍບາຍ​ກຳນົດ​ລາຄາ​ສູງ ສຳລັບ​ຜະລິດ ຕະ​ພັນ​ການ​ຢາ​ຂອງ​ຕ່າງປະເທດ ເພື່ອ​ຮັບປະກັນ​ຄວາມ​ຍຸຕິ​ທຳ ແລະ ​ບໍ່​ຈຳແນກ​ການ​ປະພຶດ​ຕໍ່​ສິນຄ້າ ການ​ຢາ​ສົ່ງ​ອອກ​ຂອງ ສ ອາ​ເມ​ຣິ​ກາ.

ຂ່າວທີ່ກ່ຽວຂ້ອງ