ຂ່າວຫຼ້າສຸດ

ອິດ​ສະ​ຣາ​ແອນ ປະຕິບັດ​ການ​ໂຈມ​ຕີ​ທາງ​ອາກາດ​ຢູ່​ໃນ​ຊີ​ຣີ

160 06 ກ.ຍ. 2018 ຂ່າວຕ່າງປະເທດ
ອິດ​ສະ​ຣາ​ແອນ ປະຕິບັດ​ການ​ໂຈມ​ຕີ​ທາງ​ອາກາດ​ຢູ່​ໃນ​ຊີ​ຣີ

     ສຳນັກ​ຂ່າວສານ​ແຫ່ງ​ລັດ SANA ຂອງ​ຊີ​ຣີ ລາຍ​ງານ​ວ່າ ວັນ​ທີ 4 ກັນ​​ຍ​າ​ນີ້ ເຮືອບິນ ຂອງ​ອິດ​ສະ​ຣາ​ແອນ ໄດ້​ປະຕິບັດ​ການ​ໂຈມ​ຕີ​ໃສ່​ຖານ​ທີ່​ໝັ້ນ​ຕ່າງໆ​ດ້ານ​ການ​ທະຫານ ຢູ່​ໃນ​ແຂວງ ຕາ​ຕູ​​ສ ແລະ​ນະຄອນ​ຮາ​ມາ ໃນ​ຊີ​ຣີ ແຕ່​ວ່າ​ກອງ​ກຳລັງ​ປ້ອງ​ກັນ​ອາກາດ​ຂອງ​ຊີ​ຣີ ໄດ້​ຍິງ​ສະກັດ ຈະ​ຫຼວດ ແລະ​ລູກ​ສອນ​ໄຟ​ຫຼາຍ​ນັດ  ເຮັດ​ໃຫ້​ລູກ​ສອນ​ໄຟ​ຖືກ​ຍິງ​ຕົກ​ຈຳນວນ​ໜຶ່ງ. ໂທລະພາບ ແຫ່ງ​ລັດ​ຊີ​ຣີ ກໍ​ລາຍ​ງານ​ວ່າ ກອງ​ກຳລັງ​ປ້ອງ​ກັນ​ອາກາດ​ຂອງ​ຊີ​ຣີ ໄດ້​ຍິງ​ສະກັດ​ໃຫ້​ຈະ​ຫຼວດ​ຕົກ 5 ນັດ. ທາງ​ດ້ານ​ອົງການ​ຕິດຕາມ​ສິດທິ​ມະນຸດ​ຊີ​ຣີ (SOHR) ໃຫ້​ຮູ້​ວ່າ ໄດ້​ຍິນ​ສຽງ​ລະເບີດ​ແຕກ​ຂຶ້ນ ຢູ່​ໃນ​ເຂດ​ໃກ້​ກັບ​ນະຄອນ ຮາ​ມາ.

    ກ່ອນ​ໜ້າ​ນັ້ນ ໃນ​ວັນ​ດຽວ​ກັນ ເຮືອບິນ​ສູ້​ຮົບ​ຂອງ​ຣັດ​ເຊຍ ໄດ້​ເຊື່ອມ​ຕໍ່​ການ​ປະຕິບັດ​ການ ໂຈມ​ຕີ​ທາງ​ອາກາດ ຢູ່​ໃນ​ແຂວງ​ອິດ​ລິບ ຊຶ່ງ​ໃນ​ເວລາ​ນີ້​ຄວບ​ຄຸມ​ໂດຍ​ກອງ​ກຳລັງ​ລຸກ​ຮື​ຂຶ້ນ. ການ​ປະຕິບັດ​ການ​ດັ່ງກ່າວ ມີ​ຂຶ້ນ​ຫຼັງ​ຈາກ​ທີ່​ໄດ້​ງົດ​ບັ້ນ​ຮົບ​ມາ​ໄດ້ 22 ວັນ.

    ໃນ​ຂະນະ​ດຽວ​ກັນ ທ່ານ ອາ​ລາ ຊາ​ເອັດ ດິນ ຮາມ​ດານ ເລຂາທິການ​ທີ​ໜຶ່ງ ຂອງ​ກົມ ພົວພັນ​ສາກົນ ຂອງ​ກະຊວງ​ການ​ຕ່າງປະເທດ​ຊີ​ຣີ ກ່າວ​ຢູ່​ໃນ​ກອງ​ປະຊຸມ​ກ່ຽວ​ກັບ​ການ “ຕ້ານ​ການ ຄ້າ​ອາວຸດ​ເຖື່ອນ ທ່າມກາງ​ການ​ຕໍ່ຕ້ານ​ລັດທິ​ກໍ່​ການ​ຮ້າຍ​ສາກົນ” ຊຶ່ງ​ຈັດ​ຂຶ້ນ​ທີ່​ນະຄອນ​ຫຼວງ​​ມົສ​ກູ ຂອງ ຣັດ​ເຊຍ ເມື່ອ​ວັນ​ທີ 4 ກັນຍາ​ນີ້​ວ່າ ສ ອາ​ເມ​ຣິ​ກາ ແລະ ພັນທະ​ມິດ ພວມ​ສະໜອງ​ອາວຸດ ໃຫ້​ແກ່​ອົງການ​ກໍ່​ການ​ຮ້າຍ ລັດ​ອິ​ສລາມ (IS) ແລະ​ແນວ​ໂຮມ ນູ​ສຣາ ໂດຍ​ຜ່ານ​ບັນດາ​ປະເທດ​ທີ 3 ເຊັ່ນ​ວ່າ ບັນດາ​ປະເທດ​ໃນ​ເອີ​ຣົບ​ຕາເວັນ​ອອກ ອູ​ແກຣນ ຫຼື​ບັນດາ​ປະເທດ​ໃນ​ເຂດ​ບານ​ກັງ  ດັ່ງນີ້​ເປັນຕົ້ນ.

 

ຂ່າວທີ່ກ່ຽວຂ້ອງ