ຍ້ອງຍໍນັກກີລາປັນຈັກສີລັດລາວ ທີ່ສ້າງຜົນງານໃນເອຊຽນເກມ

176 06 ກ.ຍ. 2018 ວົງຈອນກີລາ
ຍ້ອງຍໍນັກກີລາປັນຈັກສີລັດລາວ ທີ່ສ້າງຜົນງານໃນເອຊຽນເກມ

    ທ່ານ ອຸ່ນ​ເຮືອນ ສີ​ວົງ​ສົດ ຮອງ​ປະ­ທານ​ສະ­ຫະ­ພັນ​ປັນ​ຈັກ​ສີ​ລັດ​ແຫ່ງ​ຊາດ​ລາວ ແລະ ທ່ານ ທິບ​ພົງ​ພັດ ມະ­ນີ​ວັນ ເລ­ຂາ­ທິ­ການ​ສະ­ຫະ­ພັນ​ປັນ​ຈັກ​ສີ​ລັດ​ແຫ່ງ​ຊາດ​ລາວ ພ້ອມ​ດ້ວຍ​ຄູ​ເຝິກ ແລະ ນັກ­ກີ­ລາ ເຂົ້າ​ພົບ​ທ່ານ ປຣາ​ຕິ​ໂຕ ໂຊ​ຮາ​ໂຢ ທູດ​ອິນ​ໂດ​ເນ​ເຊຍ ປະ­ຈຳ​ລາວ ໃນ​ວັນ​ທີ 3 ກັນ­ຍາ 2018 ທີ່​ສະ­ຖານ­ທູດ​ອິນ​ໂດ​ເນ​ເຊຍ ຫຼັງ​ຈາກ​ສ້າງ​ຜົນ­ງານ​ຍາດ​ມາ​ໄດ້ 1 ຫຼຽນ​ເງິນ ແລະ 2 ຫຼຽນ​ທອງ ໃນ​ງານ​ມະ​ຫະ​ກຳ​ກີ­ລາ​ເອ​ຊຽນ ເກມ 2018.

   ໂອ­ກາດ​ນີ້ ທ່ານ ປຣາ​ຕິ​ໂຕ ໂຊ​ຮາ​ໂຢ ໄດ້​ສະ­ແດງ​ຄວາມ​ຍ້ອງ­ຍໍ​ຊົມ­ເຊີຍ​ມາ​ຍັງ​ບັນ­ດາ​ຄະ­ນະ​ນຳ ຄະ­ນະ​ຄູ​ເຝິກ ແລະ ນັກ­ກີ­ລາ​ທີ່​ພ້ອມ​ກັນ​ຕັດ­ສິນ​ໃຈ​ສູງ​ເສຍ­ສະ­ຫຼະ​ເວ­ລາ ສຸມ​ໃສ່​ເຂົ້າ​ໃນ​ການ​ເກັບ​ຕົວ​ເຝິກ ແລະ ແຂ່ງ­ຂັນ​ງານ​ມະ​ຫະ​ກຳ​ກີ­ລາ​ເອ​ຊຽນ​ເກມ 2018 ຈົນ​ສາ­ມາດ​ສ້າງ​ຜົນ­ສຳ­ເລັດ​ໄດ້​ເກີນ​ເປົ້າ​ໝາຍ​ທີ່​ວາງ​ໄວ້ ໂດຍ​ຍາດ​ມາ​ໄດ້ 1 ຫຼຽນ​ເງິນ ແລະ 2 ຫຼຽນ​ທອງ ຕໍ່​ຜົນ­ງານ​ດັ່ງ­ກ່າວ ຂໍ​ໃຫ້​ເຊື່ອ​ໝັ້ນ​ວ່າ​ໃນ­ຕໍ່­ໜ້າ ພວກ​ເຮົາ​ຈະ​ພະ­ຍາ­ຍາມ​ຢ່າງ​ສຸດ​ຄວາມ​ສາ­ມາດ ເພື່ອ​ຈະ​ໄດ້​ນຳ​ເອົາ​ຄູ​ເຝິກ​ທີ່​ມີ​ປະ­ສົບ​ການ​ດ້ານ​ກີ­ລາ​ດັ່ງ­ກ່າວ​ມາ​ເຝິກ​ສອນ​ໃຫ້ ແລະ ພ້ອມ​ຈະ​ສະ­ໜັບ­ສະ­ໜູນ​ການ​ຈັດ​ແຂ່ງ­ຂັນ​ກີ­ລາ​ປັນ​ຈັກ​ສີ​ລັດ ທົ່ວ​ປະ­ເທດ ຄັ້ງ​ທີ 1 ໃນ​ເດືອນ​ມີ­ນາ 2019.

   ຕໍ່​ຜົນ­ງານ​ດັ່ງ­ກ່າວ ນາງ ນ້ອງ​ອ້ອຍ ວົງ​ພັກ­ດີ ສາ­ມາດ​ຍາດ​ໄດ້ 1 ຫຼຽນ​ເງິນ ໄດ້​ຮັບ​ເງິນ​ໂບ​ນັດ 13 ລ້ານ​ກີບ ໃນ​ນັ້ນ ໄດ້​ຈາກ​ລັດ­ຖະ­ບານ 850 ໂດ​ລາ​ສະ­ຫະ­ລັດ ແລະ ບໍ­ລິ­ສັດ ເອັສ​ທີ ກຣຸບ 5 ລ້ານ​ກີບ ສ່ວນ 2 ຫຼຽນ​ທອງ ນາງ ອໍ­ລະ­ໄທ ສູນ​ທະ​ວົງ ແລະ ທ້າວ ໂບ້ ທຳ​ມະ​ວົງ­ສາ ໄດ້​ເງິນ​ໂບ​ນັດ​ຈາກ​ລັດ­ຖະ­ບານ​ຜູ້​ລະ 250 ໂດ​ລາ ແລະ ຈາກ​ບໍ­ລິ­ສັດ ເອັສ​ທີ ກຣຸບ ຜູ້​ລະ 5 ລ້ານ​ກີບ ນອກ​ນັ້ນ​ຍັງ​ຈະ​ໄດ້​ຮັບ​ເງິນ​ຈາກ​ລັດ­ຖະ­ບານ​ຕື່ມ​ອີກ ກໍ່​ຄື​ຫຼຽນ​ເງິນ ຫຼຽນ​ລະ 35 ລ້ານ​ກີບ ແລະ ຫຼຽນ​ທອງ ຫຼຽນ​ລະ 25 ລ້ານ​ກີບ.

ຂ່າວທີ່ກ່ຽວຂ້ອງ