ຂ່າວຫຼ້າສຸດ

ໄພ​ທຳ​ມະ​ຊາດ​ເຮັດ​ໃຫ້​ເກີດ​ຄວາມ​ເສຍ​ຫາຍ​ຢູ່​ໃນ​ຫຼາຍ​ປະເທດ

96 06 ກ.ຍ. 2018 ຂ່າວຕ່າງປະເທດ
ໄພ​ທຳ​ມະ​ຊາດ​ເຮັດ​ໃຫ້​ເກີດ​ຄວາມ​ເສຍ​ຫາຍ​ຢູ່​ໃນ​ຫຼາຍ​ປະເທດ

     ສື່ສານ​ໃນ​ຍີ່ປຸ່ນ ອ້າງ​ຕາມ​ການ​ລາຍ​ງານ​ຂອງ​ເຈົ້າ​ໜ້າທີ່ ແຈ້ງ​ໃຫ້​ຮູ້ເມື່ອ​ວັນ​ທີ 4 ກັນຍາ​ນີ້​ວ່າ ມີ​ຜູ້​ເສຍ​ຊີວິດ​ແລ້ວ​ຢ່າງ​ໜ້ອຍ 6 ຄົນ ແລະ ​ບາດເຈັບ​ອີກ 160 ກວ່າ​ຄົນ ເມື່ອ​ພາຍຸ ເຈ​ບີ (Jebi) ດ້ວຍ​ລົມ​ພັດ​ຢ່າງ​ແຮງ​ຜ່ານ​ພາກ​ຕາເວັນຕົກ​ຍີ່ປຸ່ນ. ອົງການ​ອຸຕຸນິຍົມ​ຍີ່ປຸ່ນ ໃຫ້​ຮູ້​ວ່າ ພາຍຸ​ເຈ​ບີ ຈະ​ເຄື່ອນ​ຍ້າຍ​ໄປ​ທາງ​ທິດຕາເວັນຕົກ​ຮອກ​ໄກ​ໂດ ກ່ອນ​ທີ່​ຈະ​ອ່ອນ​ຕົວ​ລົງ​ໃນ​ຕອນ​ແລງ​ຂອງ​ວັນ​ທີ 5 ກັນຍາ. ຂ່າວ​ແຈ້ງວ່າ​ພາຍຸ​ຫົວ​ນີ້ ນັບ​ວ່າ​ຮ້າຍ​ແຮງ ທີ່​ສຸດ ທີ່​ພັດ​ຜ່ານ​ຍີ່ປຸ່ນ​ໃນ​ຮອບ 25 ປີ​ທີ່​ຜ່ານ​ມາ ໂດຍ​ມີ​ກຳລັງ​ແຮງ​ຂອງ​ລົມ​ເຖິງ 216 ​ກມ/ຊົ່ວໂມງ.

    ທີ່​ກຳປູເຈຍ ທ່ານ ກາວ​ວາຍ ຫົວໜ້າ​ຫ້ອງການ​ຄະນະ​ກຳມະການ​ຄຸ້ມ​ຄອງ​ໄພພິບັດ​ທຳ​ມະ​ຊາດ​ແຫ່ງ​ຊາດ ກຳປູເຈຍ ກ່າວ​ຕໍ່​ສື່​ມວນ​ຊົນ​ວ່າ ໄລ່​ມາ​ຮອດ​ຕອນ​ບ່າຍ​ວັນ​ທີ 3 ກັນຍາ​ນີ້  ລະດັບ​ນ້ຳ​ໃນ​ແມ່​ແມ່ນ້ຳ​ຂອງ ສືບຕໍ່​ເພີ່ມ​ຂຶ້ນ ເປັນ​ເຫດ​ໃຫ້​ມີ 8 ແຂວງ​ປະສົບ​ໄພ ແລະ ​ມີ 32 ຄົນ​ເສຍ​ຊີວິດ​ແລ້ວ. ນອກຈາກ​ນັ້ນແລ້ວ ຍັງ​ມີ​ຫຼາຍ​ກວ່າ 100.000 ຄອບຄົວ ປະສົບ​ໄພ ມີ 9960 ຄອບຄົວ ຖືກ​ຍົກຍ້າຍ​ໄປ​ສະຖານທີ່​ປອດ​ໄພ ແລະ​ ມີນາ​ເຂົ້າ 44,8 ພັນ​ເຮັກຕາ ເສັ້ນທາງ 1.252 ກິໂລແມັດ ໄດ້​ຖືກ​ທຳລາຍ.

    ທີ່​ປະເທດ​ມຽນ​ມາ ພາກສ່ວນ​ຄຸ້ມ​ຄອງ​ໄພພິບັດ​ຂອງ​ມຽນ​ມາ ເປີດເຜີຍ​ໃນ​ວັນ​ທີ 3 ກັນຍາ​ນີ້​ວ່າ ນັບ​ແຕ່​ເດືອນ​ກໍລະກົດ​ປີ​ນີ້​ເປັນຕົ້ນ​ມາ ອຸ​ທົກ​ກະ​ໄພ​ທີ່​ເກີດ​ຈາກ​ຝົນຕົກ​ໜັກ​ຢູ່​ໃນ​ປະເທດ​ນີ້ ໄດ້​ເຮັດ​ໃຫ້​ມີ​ຜູ້​ເສຍ​ຊີວິດ 31 ຄົນ ແລະ​ມີ 300.000 ກວ່າ​ຄົນ​ໄດ້​ຮັບ​ຜົນ​ກະທົບ. ທົ່ວ​ປະເທດ​ມຽນ​ມາ​ມີ​ກວ່າ 10 ແຂວງ ແລະ ​ລັດ ໄດ້​ຮັບ​ຜົນ​ກະທົບ​ຈາກ​ອຸ​ທົກ​ກະ​ໄພ ໃນ​ຂະນະ​ທີ່​ມີ​ເກືອບ 340.000 ຄົນ​ຈຳ​ຕ້ອງ​ຍົກຍ້າຍ​ໄປ​ຫາ​ສະຖານທີ່​ປອດ​ໄພ ໃນ​ນັ້ນ​ມີ​ປະມານ 50.000 ຄົນ ຈຳ​ຕ້ອງ​ຍົກຍ້າຍ​ຍ້ອນ​ປ່ອງ​ລະບາຍ​ນ້ຳຂອງ​ເຂື່ອນ​ແຫ່ງ​ໜຶ່ງ​ຢູ່​ແຂວງ​ບາ​ໂກ (ພາກ​ໃຕ້​ມຽນ​ມາ) ພັງ​ໃນ​ວັນ​ທີ 29 ສິງຫາ​ຜ່ານ​ມາ. ອຸ​ທົກ​ກະ​ໄພ​ຢູ່​ແຂວງ​ບາ​ໂກ ສ້າງ​ຜົນ​ເສຍ​ຫາຍ​ໜັກໜ່ວງ​ທີ່​ສຸດ ໂດຍ​ມີ​ຜູ້​ເສຍ​ຊີວິດ 9 ຄົນ.
ພາກສ່ວນ​ຄຸ້ມ​ຄອງ​ໄພພິບັດ​ມຽນ​ມາ ຍັງ​ເປີດເຜີຍ​ຕື່ມ​ວ່າ ອຸ​ທົກ​ກະ​ໄພ​ເຮັດ​ໃຫ້​ເຮືອນ​ປະຊາຊົນ​ພັງ​ທະ​ລາຍ​ເປັນ​ຈຳນວນ​ຫຼາຍ. ໄລ່​ມາ​ຮອດ​ວັນ​ທີ 2 ກັນຍາ​ນີ້ ທົ່ວ​ປະເທດ​ມຽນ​ມາ ຍັງ​ມີ 60.000 ກວ່າ​ຄົນ ຕ້ອງ​ອາໄສ​ຢູ່​ສະຖານທີ່​ພັກຊົ່ວຄາວ ທີ່​ອົງການ​ປົກຄອງ​ຈັດ​ຂຶ້ນ 100 ກວ່າ​ແຫ່ງ.

 

ຂ່າວທີ່ກ່ຽວຂ້ອງ