ຂ່າວຫຼ້າສຸດ

ມາ​ເລ​ເຊຍ - ສິງກະໂປ ບັນລຸ​ຂໍ້​ຕົກລົງ​ກ່ຽວ​ກັບ​ໂຄງການ​ທາງ​ລົດໄຟ​ຄວາມ​ໄວ​ສູງ

131 05 ກ.ຍ. 2018 ຂ່າວຕ່າງປະເທດ
ມາ​ເລ​ເຊຍ - ສິງກະໂປ ບັນລຸ​ຂໍ້​ຕົກລົງ​ກ່ຽວ​ກັບ​ໂຄງການ​ທາງ​ລົດໄຟ​ຄວາມ​ໄວ​ສູງ

    ໜັງສືພິມ Star ອ້າງ​ຕາມ​ຄຳ​ເວົ້າ​ຂອງ​ທ່ານ ໂມ​ຮາ​ເມັດ ອາ​​ສ​ມິນ ອາລີ ລັດຖະມົນຕີ ເສດຖະກິດ​ຂອງ​ມາ​ເລ​ເຊຍ ໃຫ້​ຮູ້ເມື່ອ​ວັນ​ທີ 3 ກັນຍາ​ນີ້​ວ່າ ມາ​ເລ​ເຊຍ​ຈະ​ບໍ່​ຕ້ອງ​ຈ່າຍ​ຄ່າ​ຊົດ​ເຊີຍ ໃຫ້​ແກ່​ສິງກະໂປ ຢູ່​ໃນ​ໄລຍະ​ໂຄງການ​ທາງ​ລົດໄຟ​ຄວາມ​ໄວ​ສູງ (HSR) ເຊື່ອມ​ຈອດ​ກົວ​ລາ ລຳ​ເປີ ກັບ​ສິງກະໂປ ທີ່​ຖືກ​ຢຸດ​ເປັນ​ການ​ຊົ່ວຄາວ​ນັ້ນ.

    ທ່ານ ອາ​​ສ​ມິນ ເວົ້າ​ວ່າ ເລື່ອງ​ດັ່ງກ່າວ ໄດ້​ຮັບ​ຄວາມ​ເຫັນ​ພ້ອມ​ຈາກ​ຝ່າຍ​ສິງກະໂປ​ແລ້ວ ໃນ​ຂະນະ​ທີ່​ເວລາ​ທີ່​ໂຄງການ​ຖືກ​ໂຈະ​ເປັນ​ການ​ຊົ່ວຄາວ​ນັ້ນ ຍັງ​ບໍ່​ທັນ​ກຳນົດ​ໄດ້​ໃນ​ເວລາ​ນີ້. ມາ​ເລ​ເຊຍ ຫວັງ​ວ່າ​ພື້ນຖານ​ເສດຖະກິດ ຈະ​ໄດ້​ຮັບ​ການ​ແກ້​ໄຂ​ດີ​ຂຶ້ນ ແລະ​ ເມື່ອ​ຮອດ​ເວລາ​ນັ້ນ ກໍ​ອາດ​ຈະ​ເຊື່ອມ​ຕໍ່ ໂຄງການ​ດັ່ງກ່າວ​ໄດ້.

    ທ່ານ ອາ​​ສ​ມິນ ກໍ​ໃຫ້​ຮູ້​ວ່າ ໃນ​ກໍລະນີ​ວ່າ​ໂຄງການ​ນັ້ນ​ຖືກ​ຍົກເລີກ ມາ​ເລ​ເຊຍ ກໍ​ຈະ​ໄດ້​ຈ່າຍ​ຄ່າ​ປັບ​ໃໝ​ເປັນ​ບ້ວງ​ເງິນ​ຊົດ​ເຊີຍ. ແຫຼ່ງ​ຂ່າວ​ຈາກ​ສື່​ມວນ​ຊົນ​ໃນ​ມາ​ເລ​ເຊຍ ໃຫ້​ຮູ້​ວ່າ ຈຳນວນ​ເງິນ​ຊົດ​ເຊີຍ​ດັ່ງກ່າວ​ຢູ່​ທີ່ 500 ລ້ານ​ຣິງ​ກິດ (ເທົ່າ​ກັບ​ກວ່າ 120 ລ້ານ​ໂດ​ລາ​ສະຫະລັດ).

    HSR ເປັນ​ໂຄງການ​ທີ່​ໄດ້​ຮັບ​ການ​ລົງ​ນາມ​ເມື່ອ​ເດືອນ​ທັນວາ ປີ 2016 ໃນ​ສະໄໝ ອະດີດ​ນາຍົກລັດຖະມົນຕີ​ມາ​ເລ​ເຊຍ ນາ​ຈິບ ຣາ​ຊັກ ໂດຍ​ມີ​ຍອດ​ການ​ລົງທຶນ​ທີ່​ປະມານ 17 ຕື້​ໂດ​ລາ ສະຫະລັດ. ຫຼັງ​ຈາກ​ທີ່​ກາຍເປັນ​ນາຍົກລັດຖະມົນຕີ​ເມື່ອ​ຕົ້ນ​ເດືອນ​ພຶດສະພາ​ທີ່​ຜ່ານ​ມາ ທ່ານ ມາ​ຮາ​ເຍ ມໍ​ຮາ​ມັດ ກໍ​ໄດ້​ປະກາດ​ຍົກເລີກ​ໂຄງການ​ນັ້ນ​ໄປ ເພື່ອ​ປະຕິບັດ​ແຜນ​ນະໂຍບາຍ​ຕັດ​ຫຼຸດ​ໜີ້​ສິນ​ຂອງ​ຊາດ. ເຖິງ​ຢ່າງໃດ​ກໍ​ຕາມ ໃນ​ເວລາ​ຕໍ່​ມາ ທ່ານ ມາ​ຮາ​ເຍ ມໍ​ຮາ​ມັດ ເວົ້າ​ວ່າ ໂຄງການ​ດັ່ງກ່າວ ອາດ​ຈະ​ຖືກ​ຢຸດ​ໄວ້​ເປັນ​ການ​ຊົ່ວຄາວ ແລະ​ຈະ​ບໍ່​ຖືກ​ຍົກເລີກ ພ້ອມ​ທັງ​ໃຫ້​ຮູ້​ວ່າ ຈະ​ສົ່ງ​ຄະນະ ປະຕິບັດ​ງານ​ໄປ​ຍັງ​ສິງກະໂປ ເພື່ອ​ເຈລະຈາ​ກ່ຽວ​ກັບ​ບັນຫາ​ນີ້.

 

ຂ່າວທີ່ກ່ຽວຂ້ອງ