ຂ່າວຫຼ້າສຸດ

ອາ​ຟະ​ຣິກ​ກາ​ໃຕ້ ປະກາດ​ການ​ຢຸດຕິ​ການ​ລະບາດ​ເຊື້ອ​ພະຍາດ ລິ​​ສ​ເຕີ​ເຣຍ

171 05 ກ.ຍ. 2018 ຂ່າວຕ່າງປະເທດ
ອາ​ຟະ​ຣິກ​ກາ​ໃຕ້ ປະກາດ​ການ​ຢຸດຕິ​ການ​ລະບາດ​ເຊື້ອ​ພະຍາດ ລິ​​ສ​ເຕີ​ເຣຍ

      ທ່ານ ອາ​ຣອນ ມົດ​ຊົວ​ເລ​ດີ ລັດຖະມົນຕີ​ສາທາລະນະ​ສຸກ​ຂອງ​ອາ​ຟະ​ຣິກ​ກາ​ໃຕ້ ປະກາດ ເມື່ອ​ວັນ​ທີ 3 ກັນຍາ​ນີ້​ວ່າ ການ​ລະບາດ​ຂອງ​ເຊື້ອ​ພະຍາດ ລິ​​ສ​ເຕີ​ເຣຍ (Listeria) ຢູ່​ໃນ​ປະເທດ​ນີ້ ໄດ້​ຢຸດຕິ​ລົງ​ຢ່າງ​ເປັນ​ທາງ​ການ​ແລ້ວ ຫຼັງ​ຈາກ​ທີ່​ໄດ້​ລະບາດ​ມາ​ເປັນ​ເວລາ 6 ເດືອນ.

    ທ່ານ ອາ​ຣອນ ມົດ​ຊົວ​ເລ​ດີ ກ່າວ​ຢູ່​ໃນ​ກອງ​ປະຊຸມ​ຖະແຫຼງ​ຂ່າວ​ວ່າ ສະຖິຕິ​ຊີ້​ໃຫ້​ເຫັນ​ວ່າ ບໍ່​ມີ​ກໍລະນີ​ໃດ​ຕິດພະຍາດ​ດັ່ງກ່າວ​ຕື່ມ​ອີກ ພາຍ​ໃນ 3 ເດືອນ​ທີ່​ຜ່ານ​ມາ.

   ເຖິງ​ວ່າ​ຄຳ​ຖະແຫຼງ​ດັ່ງກ່າວ ມີ​ຄວາມ​ໝາຍວ່າ​ຜູ້​ບໍລິໂພກ ສາມາດ​ນຳ​ໃຊ້ ຜະລິດ​ຕະ​ພັນ​ຊີ້ນ ທີ່​ປຸງ​ແຕ່ງ​ແລ້ວ​ນັ້ນ​ກໍ​ຕາມ ແຕ່​ທ່ານ ອາ​ຣອນ ມົດ​ຊົວ​ເລ​ດີ ກໍ​ຍັງ​ແຈ້ງ​ເຕືອນ​ປະຊາຊົນ​ວ່າ ຄວນ​ໃສ່ໃຈ​ເຖິງ​ບັນຫາ​ຄວາມ​ປອດ​ໄພ​ຂອງ​ອາຫານ ເພາະວ່າ​ຈຸດ​ລະບາດ​ຂອງ​ພະຍາດ​ອາດ​ຈະ​ໝົດ​ໄປ ແຕ່​ກໍ​ຍັງ​ບໍ່​ຮັບປະກັນ​ໄດ້​ວ່າ​ເຊື້ອ​ພະຍາດ ລິ​​ສ​ເຕີ​ເຣຍ ໄດ້​ຫາຍ​ໄປ​ຢ່າງ​ສິ້ນ​ເຊີງ.

    ເຊື້ອ​ພະຍາດ ລິ​​ສ​ເຕີ​ເຣຍ ໄດ້​ປະກົດ​ຂຶ້ນ​ມາ​ຕັ້ງແຕ່​ວັນ​ທີ 4 ມີນາ​ທີ່​ຜ່ານ​ມາ ເມື່ອ​ບັນດາ ຊ່ຽວຊານ​ດ້ານ​ການ​ແພດ ພົບ​ເຫັນ​ເຊື້ອ​ພະຍາດ​ດັ່ງກ່າວ ຢູ່​ໃນ​ອາຫານ​ປະເພດ​ຊີ້ນ​ທີ່​ໄດ້​ປຸງ​ແຕ່ງ​ແລ້ວ. ກ່ອນ​ໜ້າ​ນັ້ນ​ໜຶ່ງ​ອາທິດ ມີ​ນັກຮຽນ​ຊັ້ນ​ປະຖົມ​ສຶກ​ສາ​ຈຳນວນ​ໜຶ່ງ ຢູ່​ໃນ​ນະຄອນ ໂຈ​ຮັນ​ແນ​​ສ​ເບີກ (ອາ​ຟະ​ຣິກ​ກາ​ໃຕ້)  ເກີດ​ມີ​ອາການ​ເຈັບ​ກະ​ເພະ​ອາຫານ​ກະທັນຫັນ ແລະ​ຫຼັງ​ຈາກ​ກວດເບິ່ງ​ແລ້ວ ເຈົ້າ​ໜ້າທີ່​ການ​ແພດ ກໍ​ໄດ້​ກວດ​ພົບ​ເຊື້ອ​ພະຍາດ ລິ​​ສ​ເຕີ​ເຣຍ ຢູ່​ໃນ​ກະເພາະ​ອາຫານ​ຂອງ​ນັກຮຽນ ເຫຼົ່ານັ້ນ. ຫຼັງ​ຈາກ​ນັ້ນ ຫຼາຍ​ປະເທດ​ໃນ​ເຂດ​ທິດໃຕ້​ທະວີບ​ອາ​ຟະ​ຣິກ​ກາ ກໍ​ໄດ້​ປະກາດ​ຄຳ​ສັ່ງ​ຫ້າມ ນຳ​ເຂົ້າ​ອາຫານ​ປຸງ​ແຕ່ງ​ຈາກ​ອາ​ຟະ​ຣິກ​ກາ​ໃຕ້.

    ເຊື້ອ​ພະຍາດ ລິ​​ສ​ເຕີ​ເຣຍ ມັກ​ພົບ​ເຫັນ​ຢູ່​ໃນ​ຜະລິດ​ຕະ​ພັນ​ນົມ​ສົ້ມ​ທີ່​ຜ່ານ​ການ​ຂ້າ​ເຊື້ອ ເນີຍ​ປະເພດ​ອ່ອນ ຊີ້ນ​ເຢັນ ສິນ​ທະເລ​ຢ້າງ (ຮົມ​ຄວັນ) ແລະ​ບັນຈຸ​ໃນ​ກະປ່ອງ ຕະຫຼອດ​ຮອດ​ຜັກ ແລະ​ໝາກ​ໄມ້. ບັນດາ​ຊ່ຽວຊານ​ເວົ້າ​ວ່າ ເຊື້ອ​ພະຍາດ​ດັ່ງກ່າວ ເຮັດ​ໃຫ້​ເກີດ​ອາຫານ​ເປັນ​ພິດ ທີ່​ອາດ​ຈະ​ເຮັດ​ໃຫ້​ເກີດ​ຜົນ​ຕາມ​ມາ​ຢ່າງ​ຮ້າຍ​ແຮງ ຊຶ່ງ​ອັດຕາ​ສ່ວນ​ການ​ເສຍ​ຊີວິດ​ຢູ່​ທີ່​ປະມານ 20%. ເຊື້ອ​ພະຍາດ​ດັ່ງກ່າວ ມັກ​ໂຈມ​ຕີ​ຜູ້​ທີ່​ມີ​ລະບົບ​ພູມ​ຕ້ານທານ​ອ່ອນແອ ເຊັ່ນ​ຄົນ​ອາຍຸ​ສູງ ແມ່ຍິງ​ຖືພາ​ມານ ແລະ​ເດັກ​ເກີດ​ໃໝ່.

    ອົງການ​ອະນາໄມ​ໂລກ (WHO) ໃຫ້​ຮູ້​ວ່າ​ການລະບາດພະຍາດ​ທີ່​ຕິດເຊື້ອ​ລິ​​ສ​ເຕີ​ເຣຍ ຄັ້ງ​ໃຫຍ່​ສຸດ​ໃນ​ປະຫວັດສາດ ເກີດ​ຂຶ້ນ​ທີ່​ອາ​ຟະ​ຣິກ​ກາ​ໃຕ້ ເມື່ອ​ເດືອນ​ມັງກອນ ປີ 2017 ໂດຍ​ມີ​ຜູ້​ຕິດ ພະຍາດ​ນີ້ 948 ຄົນ ແລະ​ເປັນ​ເຫດ​ໃຫ້​ມີ​ຜູ້​ເສຍ​ຊີວິດ 180 ຄົນ.

 

ຂ່າວທີ່ກ່ຽວຂ້ອງ