ຂ່າວຫຼ້າສຸດ

ກອງ​ປະຊຸມ​ຄະນະ​ບໍລິຫານ​ງານ OANA ຄັ້ງ​ທີ 43 ຈັດ​ຂຶ້ນ​ທີ່​ອີ​ຣານ

122 05 ກ.ຍ. 2018 ຂ່າວຕ່າງປະເທດ
ກອງ​ປະຊຸມ​ຄະນະ​ບໍລິຫານ​ງານ OANA ຄັ້ງ​ທີ 43 ຈັດ​ຂຶ້ນ​ທີ່​ອີ​ຣານ

    ກອງ​ປະຊຸມ​ຄັ້ງ​ທີ 43 ຂອງ​ຄະນະ​ບໍລິຫານ​ງານ​ອົງການ​ບັນດາ​ສຳນັກງານ​ຂ່າວສານ ພາກ​ພື້ນ​ອາຊີ-ປາ​ຊີ​ຟິກ (OANA) ໄດ້​ໄຂ​ຂຶ້ນ​ເມື່ອ​ວັນ​ທີ 3 ກັນຍາ​ນີ້ ຢູ່​ທີ່​ນະຄອນຫຼວງ​ເຕ​ເຮ​ຣານ (ປະເທດ​ອີ​ຣານ) ເພື່ອ​ປຶກສາ​ຫາລື​ກ່ຽວ​ກັບ​ວິທີ​ການ​ແກ້​ໄຂ ກ່ຽວ​ກັບ​ການ​ຍົກ​ສູງ​ປະ​ສິດທິ​ຜົນ ການເຄື່ອນໄຫວ​ຂອງ​ອົງການ​ດັ່ງກ່າວ ໃນ​ສະພາບ​ການ​ປັດຈຸບັນ.

    ໃນ​ບົດ​ປາ​ໄສ​ຂ່ຳນັບ​ຊົມເຊີຍ​ກອງ​ປະຊຸມ​ດັ່ງກ່າວ ທ່ານ ເຊຍ ຮາ​ເຊ​ມີ ຜູ້ອຳນວຍການ​ຝ່າຍ ບໍລິຫານ​ຂອງ​ສຳນັກ​ຂ່າວສານ​ແຫ່ງ​ລັດ​ອີ​ຣານ (IRNA) ຢືນຢັນ​ວ່າ ຫຼັງ​ຈາກ​ທີ່​ກຳເນີດ ແລະ​ພັດທະນາ ມາ​ໄດ້ 57 ປີ ໃນ​ເວລາ​ນີ້ OANA ໄດ້​ກາຍເປັນ​ແຫຼ່ງ​ສະໜອງ 2/3 ຂອງ​ປະລິມານ​ຂໍ້​ມູນ​ຂ່າວສານ ທົ່ວ​ໂລກ ແຕ່​ວ່າ​ກໍ​ຍັງ​ບໍ່​ທັນ​ບັນລຸ​ລະດັບ​ອິດ​ທິ​ພົນ ຢູ່​ໃນ​ເວທີ​ສາກົນ​ຕາມ​ຄວາມ​ມຸ່ງ​ຫວັງ.   ທ່ານ ເຊຍ ຮາ​ເຊ​ມີ ເວົ້າ​ວ່າ OANA ຄວນ​ປັບ​ໂຄງ​ສ້າງ ແລະ​ເຮັດ​ໃໝ່​ໃຫ້​ຕົນ​ເອງ ດ້ວຍ​ວິທີ​ລະດົມ​ຄວາມ​ສາມາດ ຂອງ​ສະມາຊິກ​ທຸກໆ​ລາຍ ເພື່ອ​ໃຫ້​ກາຍເປັນ​ອົງການ​ທີ່​ມີ​ຄວາມ​ຂະຫຍັນ​ຂັນ​ເຄື່ອນ​ຫຼາຍ​ຂຶ້ນ.

    ທ່ານ ອາ​ສລັນ ອາ​ສລາ​ນອບ ປະທານ OANA ທັງ​ເປັນ​ຜູ້ອຳນວຍການ​ໃຫຍ່​ຂອງ ສຳນັກ​ຂ່າວສານ​ອາ​ແຊກ​ໄບ​ຊັງ (AZERTAC) ກ່າວ​ຕໍ່​ພິທີ​ໄຂ​ກອງ​ປະຊຸມ​ດັ່ງກ່າວ ໂດຍ​ໃຫ້​ທັດສະນະ ວ່າ OANA ຄວນ​ຖື​ສຳຄັນ​ຕໍ່​ການຈັດຕັ້ງ​ການ​ປະຊຸມ​ສຳ​ມະ​ນາ ເວທີ​ປາ​ໄສ​ດ້ານ​ວິຊາ​ການ​ຢູ່​ນອກ ກອງ​ປະຊຸມ​ຕ່າງໆ​ຂອງ​ຕົນ ແລະ ​ມີ​ການ​ເຂົ້າ​ຮ່ວມ​ຂອງ​ສຳນັກ​ຂ່າວສານ​ຕ່າງໆ ຕະຫຼອດ​ຮອດ​ບັນດາ ຊ່ຽວຊານ​ທີ່ຢູ່​ນອກ OANA. ໃນ​ຂະນະ​ດຽວ​ກັນ ທ່ານ ອາ​ສລັນ ອາ​ສລາ​ນອບ ກໍ​ໄດ້​ສະເໜີ​ໃຫ້​ສ້າງຕັ້ງ​ສະ​ຖາ​ບັນ​ບຳລຸງ​ສ້າງ​ຂອງ OANA ພ້ອມ​ທັງ​ຢືນຢັນ​ວ່າ ບັນດາ​ສະມາຊິກ​ຂອງ OANA ຄວນ​ໄດ້​ຮັບ​ການ​ປະກອບ​ແນວ​ຄວາມ​ຄິດ ແລະ ຄວາມ​ຮູ້​ທາງ​ດ້ານ​ເຕັກ​ໂນ​ໂລ​ຊີ​ຢ່າງ​ເຕັມທີ່ ເພື່ອ​ຮັບ​ມື​ກັບ​ສິ່ງ​ທ້າ​ທາຍ​ໃໝ່.

 

ຂ່າວທີ່ກ່ຽວຂ້ອງ