ການນຳເຂົ້ານໍ້າມັນເຊື້ອໄຟ ອຸປະກອນກໍ່ສ້າງ ແລະ ພາຫະນະຮັບໃຊ້ໂຄງການກໍ່ສ້າງທາງລົດໄຟ ລາວ-ຈີນ ຖືກຕ້ອງຕາມລະບຽບການ

210 05 ກ.ຍ. 2018 ຂ່າວໜ້າ​ໜຶ່ງ

    ພາຍ­ຫຼັງ​ໜັງ­ສື­ພິມ​ວຽງ​ຈັນ​ໃໝ່ ສະ­ບັບ​ລົງ​ວັນ​ທີ 31 ກໍ­ລະ­ກົດ 2018 ອອກ​ຂ່າວ​ກ່ຽວ​ກັບ​ໂຄງ­ການ​ທາງ​ລົດ­ໄຟ​ລາວ-ຈີນ ທີ່​ມີ​ຫົວ­ຂໍ້​ວ່າ: ກວດ​ເຫັນ​ການ​ນຳ​ເຂົ້າ​ນ້ຳ­ມັນ​ເຊື້ອ​ໄຟ​ບໍ່​ສອດ­ຄ່ອງ​ໂຄງ­ການ​ກໍ່­ສ້າງ​ທາງ​ລົດ­ໄຟ​ລາວ-ຈີນ 8 ລ້ານ​ກວ່າ​ລິດ ເຮັດ​ໃຫ້​ສັງ­ຄົມ​ມີ​ຄວາມ​ເຂົ້າ­ໃຈ​ໄປ​ນຳ​ຫົວ­ຂໍ້​ຂ່າວ ພ້ອມ​ນີ້​ສື່​ອອນ​ລາຍ​ເຟ​ສ​ບຸກ​ຈຳ­ນວນ​ໜຶ່ງ ກໍ່​ໄດ້​ນຳ​ເອົາ​ຂໍ້​ມູນ​ດັ່ງ­ກ່າວ​ໄປ​ລົງ​ເຜີຍ­ແຜ່​ຂ່າວ​ຢູ່​ໃນ​ເຟ​ສ​ບຸກ​ຂອງ​ຕົນ ຍິ່ງ​ເຮັດ​ໃຫ້​ສັງ­ຄົມ​ເຂົ້າ­ໃຈ​ໂຄງ­ການ​ທາງ​ລົດ­ໄຟ​ລາວ-ຈີນ​ໄປ​ໃນ​ທາງ​ລົບ ໃນ​ການ​ນຳ​ເຂົ້າ​ນ້ຳ­ມັນ​ບໍ່​ສອດ​ຄອງ​ຕື່ມ​ອີກ ເມື່ອ​ເປັນ​ຄື​ແນວ​ນັ້ນ ທີມ​ງານ​ຂ່າວ​ໜັງ­ສື­ພິມ​ວຽງ​ຈັນ​ໃໝ່ ໄດ້​ລົງ​ໄປ​ເກັບ​ກຳ​ສອບ​ຖາມ​ຂໍ້​ມູນ​ລະ­ອຽດ​ຈາກ​ພະ​ແນກ​ຄຸ້ມ​ຄອງ​ການ​ຍົກ­ເວັ້ນ ແລະ ງົດ​ເກັບ​ພາ­ສີ ກົມ​ພາ­ສີ ກະ­ຊວງ​ການ​ເງິນ ໃນ​ວັນ​ທີ 10 ສິງ­ຫາ 2018 ເຊິ່ງ​ພະ­ນັກ­ງານ​ຮັບ­ຜິດ­ຊອບ​ວຽກ​ວິ­ຊາ​ສະ­ເພາະ​ນີ້ ກໍ່​ໄດ້​ໃຫ້​ຂໍ້​ມູນ​ຢ່າງ​ລະ­ອຽດ​ຈະ­ແຈ້ງ​ຕໍ່​ກັບ​ສັບ​ເຕັກ­ນິກ IM8 ດັ່ງ­ນີ້.

    ໂຄງ­ການ​ທາງ​ລົດ­ໄຟ​ລາວ-ຈີນ ເປັນ​ໂຄງ­ການ​ຮ່ວມ​ມື​ລາວ-ຈີນ ແລະ ໂຄງ­ການ​ນີ້ ໃນ​ເບື້ອງ​ຕົ້ນ​ແມ່ນ​ບໍ່​ທັນ​ມີ​ຫຍັງ ເພື່ອ​ເຮັດ​ໃຫ້­ການ​ກໍ່­ສ້າງ​ໂຄງ­ການ​ສຳ­ເລັດ​ປີ 2021 ລັດ­ຖະ­ບານ​ລາວ ໄດ້​ສັນ­ຍາ​ຈັດ​ຕັ້ງ​ປະ­ຕິ­ບັດ​ໂຄງ­ການ​ໂດຍ​ດ່ວນ ດັ່ງ­ນັ້ນ ຈຶ່ງ​ເຮັດ​ໃຫ້­ການ​ແລ່ນ​ເອ­ກະ­ສານ​ນຳ​ເຂົ້າ​ພາ­ຫະ­ນະ​ກົນ​ຈັກ ອຸ­ປະ­ກອນ​ຕ່າງໆ ແລະ ນ້ຳ­ມັນ​ເຊື້ອ​ໄຟ ເພື່ອ​ຮັບ​ໃຊ້​ໂຄງ­ການ​ບໍ່​ໄປ​ຕາມ​ກົດ­ໝາຍ​ຍ້ອນ​ວ່າ​ເລັ່ງ​ດ່ວນ ດັ່ງ­ນັ້ນ ກະ­ຊວງ​ການ​ເງິນ ຈຶ່ງ​ໄດ້​ສ້າງ​ເອ­ກະ­ສານ​ຂຶ້ນ​ມາ​ຊື່​ສັບ​ເຕັກ­ນິກ​ເອີ້ນ​ວ່າ IM8 ເພື່ອ​ນຳ​ເຂົ້າ​ພາ­ຫະ­ນະ ກົນ​ຈັກ ອຸ­ປະ­ກອນ​ຕ່າງໆ ແລະ ນ້ຳ­ມັນ​ເຊື້ອ​ໄຟ​ເຂົ້າ​ມາ​ຮັບ​ໃຊ້​ໂຄງ­ການ​ກ່ອນ ຫຼັງ​ຈາກ​ນັ້ນ ຈຶ່ງ​ແລ່ນ​ເອ­ກະ­ສານ​ຕາມ​ຫຼັງ​ໃຫ້​ຖືກ­ຕ້ອງ​ຕາມ​ກົດ­ໝາຍ ໂດຍ​ກະ­ຊວງ​ການ​ເງິນ ໄດ້​ມີ​ຂໍ້​ຕົກ­ລົງ​ໃຫ້​ລົບ​ລ້າງ IM8 ມາ​ເປັນ IM4 ການ​ນຳ​ເຂົ້າ​ເພື່ອ​ການ​ຊົມ­ໃຊ້​ພາຍ​ໃນ (ຖາ­ວອນ) ແລະ IM5 ການ​ນຳ​ເຂົ້າ​ຊົ່ວ­ຄາວ (ຖ້າ​ພາ­ຫະ­ນະ​ກົນ​ຈັກ ແລະ ອຸ­ປະ­ກອນ​ໃດ​ນຳ​ເຂົ້າ​ຮັບ​ໃຊ້​ໂຄງ­ການ​ຊົ່ວ­ຄາວ ຖ້າ​ສຳ­ເລັດ​ໂຄງ­ການ​ແລ້ວ​ແມ່ນ​ໃຫ້​ເອົາ​ກັບ​ຄືນ) ໝາຍ​ຄວາມ​ວ່າ ພາຍ­ຫຼັງ​ລົບ​ລ້າງ IM8 ແລ້ວ ຈະ​ໄດ້​ມາ​ແຍກ​ເປັນ IM4 ແລະ IM5 ເພື່ອ​ໃຫ້​ຖືກ­ຕ້ອງ​ຕາມ​ກົດ­ໝາຍ​ພາ­ສີ ມາດ­ຕາ​ທີ 27 ສ່ວນ​ເນື້ອ​ໃນ​ບົດ​ສະ­ຫຼຸບ​ຈາກ​ກະ­ຊວງ​ການ​ເງິນ ທີ່​ໜັງ­ສື­ພິມ​ວຽງ​ຈັນ​ໃໝ່​ເອົາ​ລົງ​ຂ່າວ ທີ່​ມີ​ເນື້ອ​ໃນ​ວ່າ​ພົບ​ເຫັນ​ການ​ນຳ​ເຂົ້າ​ນ້ຳ­ມັນ​ເຊື້ອ​ໄຟ ຮັບ​ໃຊ້​ໂຄງ­ການ​ລົດ­ໄຟ​ລາວ-ຈີນ​ຄ້າງ IM8 ຍ້ອນ​ວ່າ­ການ​ແລ່ນ​ເອ­ກະ­ສານ​ຄ້າງ​ຢູ່​ຫຼາຍ​ຈຸດ ເຮັດ​ໃຫ້​ຫຼ້າ​ຊ້າ ແລະ ຕາມ​ກົດ­ໝາຍ​ແລ້ວ ການ​ນຳ​ເຂົ້າ​ນ້ຳ­ມັນ​ເຊື້ອ​ໄຟ ຕ້ອງ​ໄດ້​ເສຍ​ພາ­ສີ​ອາ­ກອນ ແຕ່​ເນື່ອງ​ຈາກ​ໂຄງ­ການ​ທາງ​ລົດ­ໄຟ​ລາວ-ຈີນ ເປັນ​ໂຄງ­ການ​ບຸ­ລິ­ມະ­ສິດ ຈຶ່ງ​ໄດ້​ຍົກ­ເວັ້ນ​ພາ­ສີ​ນຳ​ເຂົ້າ​ທຸກ​ຢ່າງ.

    ສຳ­ລັບ​ເນື້ອ​ໃນ​ຂ່າວ​ທີ່​ລົງ​ໜ້າ 1 ຂອງ​ໜັງ­ສື­ພິມ​ວຽງ​ຈັນ​ໃໝ່ ອອກ​ສະ­ບັບ​ວັນ​ທີ 31 ກໍ­ລະ­ກົດ 2018 ທີ່​ພາດ​ຫົວ­ຂໍ້​ຂ່າວ​ວ່າ ກວດ​ເຫັນ​ການ​ນຳ​ເຂົ້າ​ນ້ຳ­ມັນ​ເຊື້ອ​ໄຟ​ທີ່​ບໍ່​ສອດ­ຄ່ອງ​ໂຄງ­ການ​ທາງ​ລົດ­ໄຟ​ລາວ-ຈີນ 8 ລ້ານ​ກວ່າ​ລິດ ພາຍ­ຫຼັງ​ທີ່​ລົງ​ຂ່າວ​ໄປ​ແລ້ວ ໄດ້​ເຮັດ​ໃຫ້​ສັງ­ຄົມ​ເຂົ້າ­ໃຈ​ວ່າ​ໂຄງ­ການ​ທາງ​ລົດ­ໄຟ​ລາວ-ຈີນ ນຳ​ເຂົ້າ​ນ້ຳ­ມັນ​ບໍ່​ຖືກ­ຕ້ອງ ແຕ່​ຄວາມ​ຈິງ​ແລ້ວ ໜັງ­ສື­ພິມ​ວຽງ​ຈັນ​ໃໝ່​ຕີ​ລາ­ຄາ​ເນື້ອ​ໃນ​ຂອງ​ບົດ​ສະ­ຫຼຸບ​ຈາກ​ກະ­ຊວງ​ການ​ເງິນ​ຜິດ­ພາດ (ເນື່ອງ​ຈາກ​ບາງ​ສັບ​ມັນ​ເປັນ​ສັບ​ເຕັກ­ນິກ) ເພາະ​ເນື້ອ​ໃນ​ໜັງ­ສື­ພິມ​ວຽງ​ຈັນ​ໃໝ່​ສະ­ບັບ​ດັ່ງ­ກ່າວ ໄດ້​ຂຽນ​ກ່ຽວ​ກັບ​ໂຄງ­ການ​ທາງ​ລົດ­ໄຟ​ລາວ-ຈີນ ມີ​ດັ່ງ­ນີ້​ວ່າ: ກວດ​ເຫັນ​ການ​ນຳ​ເຂົ້າ​ນ້ຳ­ມັນ​ເຊື້ອ​ໄຟ​ຮັບ​ໃຊ້​ໂຄງ­ການ​ກໍ່­ສ້າງ​ເສັ້ນ­ທາງ​ລົດ­ໄຟ​ລາວ-ຈີນ ຄ້າງ IM8 ແລະ ບໍ 53 (ຢູ່​ແຂວງ​ສະ­ຫວັນ​ນະ​ເຂດ ບໍ່​ແກ້ວ ແລະ ຫຼວງ​ນ້ຳ​ທາ ໂດຍ​ມີ​ຄ້າງ​ນ້ຳ­ມັນ 8,1 ລ້ານ​ລິດ ພາ­ຫະ­ນະ 1.116 ຄັນ ອຸ­ປະ­ກອນ​ຮັບ​ໃຊ້​ທາງ​ລົດ­ໄຟ ແລະ ອື່ນໆ​ອີກ 1.095 ຊຸດ).

    ດັ່ງ­ນັ້ນ ໜັງ­ສື­ພິມ​ວຽງ​ຈັນ​ໃໝ່ ຈຶ່ງ​ຂໍ​ຖື​ໂອ­ກາດ​ນີ້​ແຈ້ງ​ມາ​ຍັງ​ສັງ­ຄົມ​ທົ່ວ​ໄປ ທີ່​ເກີດ​ຄວາມ​ເຂົ້າ­ໃຈ​ຜິດ​ຕາມ​ທີ່​ເນື້ອ​ໃນ​ທີ່​ຂຽນ​ລົງ​ໜັງ­ສື­ພິມ​ວຽງ​ຈັນ​ໃໝ່​ສະ­ບັບ​ດັ່ງ­ກ່າວ ຕີ​ລາ­ຄາ​ວ່າ​ໂຄງ­ການ​ທາງ​ລົດ­ໄຟ​ລາວ-ຈີນ ນຳ​ເຂົ້າ​ນ້ຳ­ມັນ​ບໍ່​ສອດ­ຄ່ອງ ແຕ່​ຄວາມ​ຈິງ​ແລ້ວ​ແມ່ນ​ຖືກ­ຕ້ອງ​ຕາມ​ລະ­ບຽບ​ການ​ທຸກ​ຢ່າງ ແລະ ຮຽກ­ຮ້ອງ​ໃຫ້​ສັງ­ຄົມ​ອອນ​ລາຍ ໂດຍ​ສະ­ເພາະ Facebook ຕ່າງໆ ທີ່​ໄດ້​ໂພ​ສລົງ​ໃນ​ໜ້າ​ເພ​ສ​ຂອງ​ຕົນ ທີ່​ນຳ​ເອົາ​ແຫຼ່ງ​ຂໍ້​ມູນ​ທີ່​ລົງ​ຢູ່​ໃນ​ໜັງ­ສື­ພິມ​ວຽງ​ຈັນ​ໃໝ່​ມາ​ລົງ​ຕໍ່​ນັ້ນ ຈົ່ງ​ຊ່ວຍ​ກັນ​ແຈ້ງ​ຄືນ​ໃຫ້​ສັງ­ຄົມ​ໄດ້​ເຂົ້າ­ໃຈ ຕາມ​ຂໍ້​ມູນ​ທີ່​ກ່າວ​ມາ​ຂ້າງ​ເທິງ​ນີ້​ດ້ວຍ.

ຂ່າວທີ່ກ່ຽວຂ້ອງ