ຂ່າວຫຼ້າສຸດ

ສາມສ່ຽວຫຼົງຜິດ ຮ່ວມກັນຄ້າຂາຍຢາເສບຕິດ

334 05 ກ.ຍ. 2018 ຂ່າວໜ້າ​ໜຶ່ງ
ສາມສ່ຽວຫຼົງຜິດ ຮ່ວມກັນຄ້າຂາຍຢາເສບຕິດ

    ຕຳ­ຫຼວດ​ພະ​ແນກ​ສະ­ກັດ​ກັ້ນ ແລະ ຕ້ານ​ຢາ​ເສບ​ຕິດ ປກສ ແຂວງ​ວຽງ​ຈັນ ໄດ້​ລົງ​ແກ້​ໄຂ​ບັນ­ຫາ​ປາ­ກົດ­ການ​ຫຍໍ້­ທໍ້ ໂດຍ​ສະ­ເພາະ​ຜູ້​ທີ່​ມີ​ການ­ເຄື່ອນ­ໄຫວ​ຊື້​ຂາຍ​ຢາ​ເສບ​ຕິດ ປະ­ເພດ​ຢາ​ບ້າ ຢູ່​ຂອບ​ເຂດ​ເມືອງ​ທຸ­ລະ­ຄົມ ແຂວງ​ວຽງ​ຈັນ ສາ­ມາດ​ຈັບ​ຕົວ​ເປົ້າ​ໝາຍ​ໄດ້ 3 ຄົນ​ຄື: ທ້າວ ໂນ່ ອາ­ຍຸ 28 ປີ ອາ­ຊີບ​ກຳ­ມະ­ກອນ ຢູ່​ບ້ານ​ເກີນ​ໃຕ້ ທ້າວ ຕ໋ອມ ອາ­ຍຸ 23 ປີ ອາ­ຊີບ​ກຳ­ມະ­ກອນ ຢູ່​ບ້ານ​ສີ​ບຸນ​ເຮືອງ ແລະ ທ້າວ ເກີ ອາ­ຍຸ 25 ປີ ອາ­ຊີບ​ກຳ­ມະ­ກອນ ຢູ່​ບ້ານ​ໂພນ​ແຮ່ ພ້ອມ​ຂອງ​ກາງ​ຢາ​ເສດ​ຕິດ​ປະ­ເພດ​ຢາ​ບ້າ ຈຳ­ນວນ 2.857 ເມັດ ທັງ 3 ຄົນ ຢູ່​ເມືອງ​ທຸ­ລະ­ຄົມ ແຂວງ​ວຽງ​ຈັນ ຖືກ​ກັກ​ຕົວ​ຄັ້ງ​ວັນ​ທີ 8 ສິງ­ຫາ 2018.

    ຜ່ານ​ການ​ສືບ­ສວນ-ສອບ​ສວນ​ຂອງ​ເຈົ້າ​ໜ້າ­ທີ່​ວິ­ຊາ​ສະ­ເພາະ ທັງ 3 ຄົນ​ໄດ້​ໃຫ້­ການ​ຮັບ​ສາ­ລະ­ພາບ​ວ່າ: ຢາ​ບ້າ 2.857 ເມັດ ເປັນ​ຂອງ​ພວກ​ກ່ຽວ​ແທ້ ທີ່​ໄດ້​ເຄື່ອນ​ໄຫວ​ພົວ­ພັນ​ຊື້-ຂາຍ​ຢາ​ເສບ​ຕິດ​ມາ​ແຕ່​ຕົ້ນ​ປີ 2018 ຈົນ​ເຖິງ​ປັດ­ຈຸ­ບັນ ພວກ​ກ່ຽວ​ທັງ 3 ຄົນ ໄດ້​ລົມ​ກັນ​ວ່າ​ມີ​ຄົນ​ສັ່ງ​ຊື້​ຢາ​ບ້າ​ນຳ​ພວກ​ກ່ຽວ ຫຼັງ​ຈາກ​ປຶກ­ສາ​ກັນ​ແລ້ວ ກໍ່​ໄດ້​ໂທລະ­ສັບ​ຫາ​ຜູ້​ຮ່ວມ​ຂະ​ບວນ​ການ​ນຳ​ກັນ ເພື່ອ​ສັ່ງ​ຊື້​ຢາ​ບ້າ​ຈຳ­ນວນ 14 ຖົງ ຊື້​ໃນ​ລາ­ຄາ​ຖົງ​ລະ 1,2 ລ້ານ​ກີບ ສ່ວນ​ເງິນ​ແມ່ນ​ເອົາ​ມາ​ຈ່າຍ​ຕາມ​ພາຍ­ຫຼັງ ເມື່ອ​ພວກ​ກ່ຽວ​ໄດ້​ຢາ​ບ້າ​ມາ​ແລ້ວ ກໍ່​ໄດ້​ອອກ​ໄປ​ສະ­ຖານ­ທີ່​ນັດ​ກັບ​ຄົນ​ທີ່​ສັ່ງ​ຊື້​ນຳ​ພວກ​ກ່ຽວ ໃນ​ຄະ­ນະ​ທີ່​ພວກ​ກ່ຽວ​ຈະ​ເອົາ​ຢາ​ເສບ​ຕິດ​ໄປ​ຂາຍ​ນັ້ນ ຖືກ​ເຈົ້າ​ໜ້າ­ທີ່​ຕຳ­ຫຼວດ​ສະ­ແດງ​ຕົວ​ເຂົ້າ​ກວດ​ຄົ້ນ​ພວກ​ກ່ຽວ ຈຶ່ງ​ພົບ​ຂອງ​ກາງ​ຢາ​ບ້າ 2.857 ເມັດ ຈາກ​ນັ້ນ ເຈົ້າ​ໜ້າ­ທີ່​ຈຶ່ງ​ໄດ້​ກັກ​ຕົວ​ພວກ​ກ່ຽວ​ມາ​ດຳ­ເນີນ​ຄະ­ດີ​ຕາມ​ກົດ­ໝາຍ.

    ເຈົ້າ​ໜ້າ­ທີ່​ຍັງ​ກ່າວ​ຕື່ມ​ວ່າ: ການ​ກະ­ທຳ​ຂອງ​ພວກ​ກ່ຽວ​ທັງ 3 ຄົນ ມີ​ເຈດ​ຕະ​ນາ​ຮ່ວມ​ກັນ​ຄ້າ­ຂາຍ​ຢາ​ເສບ​ຕິດ​ປະ­ເພດ​ຢາ​ບ້າ​ຢ່າງ​ແທ້​ຈິງ ເຊິ່ງ​ການ​ກະ­ທຳ​ຂອງ​ພວກ​ກ່ຽວ ໄດ້​ສ້າງ​ຄວາມ​ບໍ່​ສະ­ຫງົບ ແລະ ສ້າງ​ຄວາມ​ບໍ່​ເປັນ​ລະ­ບຽບ​ໃຫ້​ແກ່​ສັງ­ຄົມ ທັງ​ເປັນ​ການ​ກົດ​ໜ່ວງ​ທ່ວງ​ດຶງ​ການ​ສ້າງ­ສາ​ພັດ­ທະ­ນາ​ປະ­ເທດ​ຊາດ ແລະ ຜິດ​ຕໍ່​ກົດ­ໝາຍ​ອາ­ຍາ​ໃນ​ມາດ­ຕາ 146 ປັດ­ຈຸ­ບັນ ເຈົ້າ​ໜ້າ­ທີ່​ຍັງ​ສືບ­ຕໍ່​ດຳ­ເນີນ​ການ​ສືບ­ສວນ-ສອບ​ສວນ​ພວກ​ກ່ຽວ ເພື່ອ​ຂະ­ຫຍາຍ​ຜົນ​ຫາ​ກຸ່ມ​ແກ້ງ​ຜູ້​ຮ່ວມ​ຂະ​ບວນ​ການ ມາ​ລົງ­ໂທດ​ຕາມ​ລະ­ບຽບ​ກົດ­ໝາຍ.

ຂ່າວທີ່ກ່ຽວຂ້ອງ