ຂ່າວຫຼ້າສຸດ

ເປີດໂຄງການຟື້ນຟູພູມມີທັດປ່າໄມ້ ເພື່ອຫຼຸດຜ່ອນອາຍເຮືອນແກ້ວ

280 05 ກ.ຍ. 2018 ຂ່າວໜ້າ​ໜຶ່ງ
ເປີດໂຄງການຟື້ນຟູພູມມີທັດປ່າໄມ້ ເພື່ອຫຼຸດຜ່ອນອາຍເຮືອນແກ້ວ

    ພິ­ທີ​ເປີດ​ໂຄງ­ການ​ຟື້ນ​ຟູ​ພູມ​ມີ​ທັດ​ປ່າ­ໄມ້ ໂດຍ​ການ​ພັດ­ທະ­ນາ​ຜົນ​ຜະ­ລິດ ເພື່ອ​ຫຼຸດ­ຜ່ອນ​ທາດ​ອາຍ​ເຮືອນ​ແກ້ວ​ຈາກ​ການ​ທຳ­ລາຍ​ປ່າ­ໄມ້ ແລະ ເຮັດ​ໃຫ້​ປ່າ­ໄມ້​ເສື່ອມ​ໂຊມ (REDD+) ໂດຍ​ຜ່ານ​ການ​ເປັນ​ຄູ່​ຮ່ວມ​ງານ​ລະ­ຫວ່າງ​ພາກ​ເອ­ກະ​ຊົນ-ຊຸມ​ຊົນ ເພື່ອ​ເປັນ​ກໍ­ລະ­ນີ​ແລກ­ປ່ຽນ​ບົດ­ຮຽນ​ໃນ​ເຂດ​ພາກ​ພື້ນ​ອາ­ຊີ ໄດ້​ຈັດ​ຂຶ້ນ​ວັນ​ທີ 30 ສິງ­ຫາ 2018 ທີ່​ພະ​ແນກ​ກະ­ສິ­ກຳ ແລະ ປ່າ­ໄມ້​ແຂວງ​ໄຊ​ຍະ​ບູ​ລີ ເປັນ​ປະ­ທານ​ຂອງ​ທ່ານ ຄຳ​ຫຼ້າ ຜິວ​ວັນ­ນາ ຫົວ­ໜ້າ​ພະ​ແນກ​ກະ­ສິ­ກຳ ແລະ ປ່າ­ໄມ້​ແຂວງ ມີ​ທ່ານ ຈັນ​ດຣາ ສີ​ຣໍ​ລີ ຫົວ­ໜ້າ​ແຜນ​ງານ​ຂອງ​ອົງ­ການ​ລີ​ຄອບ​ປະ­ຈຳ​ພາກ​ພື້ນ ທ່ານ ບຸນ​ຍະ​ເດດ ພວງ­ມາ­ລາ ຫົວ­ໜ້າ​ອົງ­ການ​ລີ​ຄອບ​ປະ­ຈຳ​ລາວ ພ້ອມ​ດ້ວຍ​ຮອງ​ຫົວ­ໜ້າ​ພະ​ແນກ​ກະ­ສິ­ກຳ ແລະ ປ່າ­ໄມ້​ແຂວງ​ບໍ່​ແກ້ວ ແຂວງ​ຫຼວງ​ພະ​ບາງ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ຄຳ​ຫຼ້າ ຜິວ​ວັນ­ນາ ກ່າວ​ວ່າ: ສຳ­ລັບ​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ນີ້ ໄດ້​ຮັບ​ທຶນ​ຈາກ​ກະ­ຊວງ​ສິ່ງ­ແວ­ດລ້ອມ​ສະ­ຫງວນ​ທຳ​ມະ​ຊາດ ການ​ກໍ່­ສ້າງ ແລະ ການ​ປ້ອງ​ກັນ​ນິວ​ເຄຣຍ ປະ­ເທດ​ເຢຍ​ລະ​ມັນ ໂດຍ​ຜ່ານ​ອົງ­ການ​ລີ​ຄອບ ແລະ ສູນ​ເຝີກ​ອົບ­ຮົມ​ປ່າ­ໄມ້​ຊຸມ​ຊົນ​ໃນ​ເຂດ​ອາ­ຊີ​ຕາ­ເວັນ​ອອກ­ສຽງ​ໃຕ້ ແລະ ເຂດ​ປາ​ຊີ​ຟິກ ມີ​ມູນ​ຄ່າ 2,3 ລ້ານ​ເອີ​ໂຣ ແລະ ມີ​ໄລ­ຍະ​ການ​ປະ­ຕິ­ບັດ​ໂຄງ­ການ 48 ເດືອນ ແຕ່​ເດືອນ​ພຶດ­ສະ­ພາ 2018 ຫາ ເມ­ສາ 2022 ໂຄງ­ການ​ດັ່ງ­ກ່າວ ໄດ້​ກວມ​ເອົາ 3 ປະ­ເທດ​ຄື: ປະ­ເທດ​ລາວ ໄທ ແລະ ຫວຽດ­ນາມ ສະ­ເພາະ​ປະ­ເທດ​ລາວ ກວມ​ເອົາ 3 ແຂວງ​ຄື: ແຂວງ​ບໍ່​ແກ້ວ ຫຼວງ​ພະ​ບາງ ແລະ ແຂວງ​ໄຊ​ຍະ​ບູ​ລີ ຄາດ​ຜົນ​ໄດ້​ຮັບ ແລະ ເປົ້າ​ໝາຍ​ຂອງ​ໂຄງ­ການ ເພື່ອ​ສົ່ງ­ເສີມ​ການ​ຫຼຸດ­ຜ່ອນ ແລະ ການ​ປັບ​ຕົວ​ດ້ານ​ການ​ປ່ຽນ­ແປງ​ດິນ​ຟ້າ​ອາ­ກາດ ໃນ​ເຂດ​ພາກ​ພື້ນ​ລຸ່ມ​ແມ່­ນ້ຳ​ຂອງ.

    ສ່ວນ​ກິດ­ຈະ­ກຳ​ຫຼັກ​ຂອງ​ໂຄງ­ການ​ແມ່ນ​ການ​ພັດ­ທະ­ນາ​ຄຸ້ມ​ຄອງ ແລະ ການ​ປຸງ​ແຕ່ງ​ໄມ້​ສັກ ໄມ້­ປ່ອງ ເຄື່ອງ​ປ່າ​ຂອງ​ດົງ​ປໍ​ສາ ທີ່​ເຊື່ອມ​ໂຍງ​ກັບ​ພາກ​ທຸ­ລະ​ກິດ ການ​ວາງ​ແຜນ­ການ​ນຳ​ໃຊ້​ທີ່​ດິນ ການ​ຈັດ­ການ ແລະ ຫຼຸດ­ຜ່ອນ​ໄຟ​ໄໝ້​ລາມ​ປ່າ ການ​ວັດ​ແທດ​ກາກ​ບອນ ແລະ ອື່ນໆ ສະ­ເພາະ​ຢູ່​ແຂວງ​ໄຊ​ຍະ​ບູ​ລີ ໄດ້​ກຳ­ນົດ​ເອົາ​ເມືອງ​ໄຊ​ຍະ​ບູ​ລີ ເມືອງ​ພຽງ ແລະ ເມືອງ​ປາກ​ລາຍ ສ່ວນ​ສະ­ຖານ­ທີ່​ຫ້ອງ­ການ​ພາກ​ສະ­ໜາມ​ຂອງ​ໂຄງ­ການ​ຕັ້ງ​ຢູ່​ແຂວງ​ໄຊ​ຍະ​ບູ​ລີ.

ຂ່າວທີ່ກ່ຽວຂ້ອງ