ຂ່າວຫຼ້າສຸດ

ເຈົ້າເມືອງຫາດຊາຍຟອງ ລົງຕິດຕາມເບິ່ງສະພາບນໍ້າຂອງ

300 05 ກ.ຍ. 2018 ຂ່າວໜ້າ​ໜຶ່ງ
ເຈົ້າເມືອງຫາດຊາຍຟອງ ລົງຕິດຕາມເບິ່ງສະພາບນໍ້າຂອງ

    ວັນ​ທີ 3 ກັນ­ຍາ 2018 ຄະ­ນະ​ນຳ​ເມືອງ​ຫາດ​ຊາຍ​ຟອງ ນະ­ຄອນ­ຫຼວງ​ວຽງ​ຈັນ ນຳ​ໂດຍ​ທ່ານ ແກ່ນ ວໍ­ລະ​ສານ ເຈົ້າ­ເມືອງ​ຫາດ​ຊາຍ​ຟອງ ໄດ້​ລົງ​ຕິດ­ຕາມ​ສຳ​ຫຼວດ​ເບິ່ງ​ສະ­ພາບ​ນ້ຳ­ຂອງ ທີ່​ເພີ່ມ​ຂຶ້ນ​ຢູ່​ເຂດ​ໃຕ້​ຂອງ​ເມືອງ ເພື່ອ​ກວດ­ກາ​ເບິ່ງ​ລະ­ດັບ​ນ້ຳ​ຢູ່​ປະ­ຕູ​ນ້ຳ­ໝາກ​ຮຽວ-ນາ­ລ້ອງ ແລະ ບ່ອນ​ອື່ນໆ​ລຽບ​ຕາມ​ຄູ​ກັ້ນ​ນ້ຳ ປັດ­ຈຸ­ບັນ​ເຫັນ​ວ່າ​ສະ­ພາບ​ນ້ຳ­ຂອງ​ໄດ້​ເພີ່ມ​ຢ່າງ​ໄວ­ວາ​ເປັນ​ເທື່ອ​ທີ​ສອງ ແລະ ກໍ່​ເພີ່ມ​ຂຶ້ນ​ຫຼາຍ​ກວ່າ​ເກົ່າ​ໄດ້​ໄຫຼ​ເຂົ້າ​ຖ້ວມ​ບ້ານ​ເຮືອນ​ຂອງ​ປະ­ຊາ­ຊົນ​ຈຳ­ນວນ​ໜຶ່ງ ທີ່​ອາ­ໄສ​ຢູ່​ແຄມ​ນ້ຳ­ຂອງ ແລະ ເນື້ອ­ທີ່​ນາ​ຮົ້ວ​ສວນ​ເຮັດ​ໃຫ້​ຜົນ​ຜະ­ລິດ​ຕ່າງໆ ໄດ້​ຮັບ​ຄວາມ​ເສຍ​ຫາຍ​ຫຼາຍ​ສົມ­ຄວນ ສ່ວນ​ຢູ່​ຟາກ​ເບື້ອງ​ໃນ​ຂອງ​ຄູ​ກັ້ນ​ນ້ຳ ບ່ອນ​ທີ່​ເປັນ​ພື້ນ​ທີ່​ຕ່ຳ​ຢູ່​ເຂດ​ບ້ານ​ນາ­ລ້ອງ​ນ້ຳ ໄດ້​ເພີ່ມ​ຂຶ້ນ​ຖ້ວມ​ເນື້ອ­ທີ່​ນາ​ຫຼາຍ​ໄລ່​ໄດ້​ຮັບ​ຄວາມ​ເສຍ​ຫາຍ.

    ຈາກ​ນັ້ນ ທ່ານ​ເຈົ້າ­ເມືອງ​ໄດ້​ເລາະ​ຕິດ­ຕາມ​ເບິ່ງ​ລະ­ດັບ​ນ້ຳ ຢູ່​ທີ່​ສວນ​ວັດ­ທະ­ນະ­ທຳ​ຊຽງ​ຄວນ ເຫັນ​ວ່າ​ລະ­ດັບ​ນ້ຳ­ຂອງ​ໄດ້​ໄຫຼ​ເຂົ້າ​ຖ້ວມ​ເຂດ​ພື້ນ​ທີ່​ຕ່ຳ​ຂອງ​ສວນ ສົ່ງ​ຜົນ​ເຮັດ​ໃຫ້​ເຈົ້າ​ຂອງ​ຜູ້​ສຳ​ປະ­ທານ​ສວນ​ທ່ອງ​ທ່ຽວ ຕ້ອງ​ໄດ້​ນຳ​ເອົາ​ກຳ­ລັງ​ຊາວ​ໜຸ່ມ​ຈາກ​ທະ­ຫານ​ເມືອງ ມາ​ຊ່ວຍ​ຮ່າຍ​ຊາຍ​ໃສ່​ເປົາ ເພື່ອ​ນຳ​ມາ​ວາງ​ເຮັດ​ເປັນ​ຄູ​ກັ້ນ​ນ້ຳ​ຢູ່​ບ່ອນ​ທາງ​ຍ່າງ ແລະ ອ້ອມ​ຮອບ​ບໍ­ລິ­ເວນ​ນອກ​ສວນ ເພື່ອ​ບໍ່​ໃຫ້​ນ້ຳ​ໄຫຼ​ຊືມ​ເຂົ້າ​ຖ້ວມ​ເຂດ​ທາງ​ໃນ​ສະ­ຖານ­ທີ່​ທ່ອງ​ທ່ຽວ ປັດ­ຈຸ­ບັນ​ນ້ຳ­ຂອງ​ເພີ່ມ​ຂຶ້ນ​ແທກ​ໄດ້​ລະ­ດັບ​ສູງ 11,50 ແມັດ ເຫັນ​ວ່າ​ລະ­ດັບ​ນ້ຳ​ໄດ້​ຂຶ້ນ​ສູງ​ກາຍ​ເຂດ​ລະ­ວັງ​ໄພ​ແລ້ວ ດັ່ງ­ນັ້ນ ການ​ນຳ​ເມືອງ​ໄດ້​ເອົາ­ໃຈ­ໃສ່​ຢ່າງ​ຂຸ້ນ­ຂ້ຽວ​ຕໍ່​ວຽກ​ງານ​ດັ່ງ­ກ່າວ ໂດຍ​ທີ່​ທ່ານ​ເຈົ້າ­ເມືອງ​ໄດ້​ຊີ້​ນຳ​ຢ່າງ​ໃກ້­ຊິດ ແລະ ມອບ​ໃຫ້​ຄະ­ນະ​ພັກ​ເມືອງ ຜູ້​ທີ່​ຮັບ­ຜິດ­ຊອບ​ຊີ້​ນຳ​ຢູ່​ແຕ່​ລະ​ເຂດ​ຂອງ​ຕົນ ໂດຍ​ສະ­ເພາະ​ຢູ່​ເຂດ​ບໍ­ລິ­ເວນ​ແຄມ​ນ້ຳ ໃຫ້​ເອົາ­ໃຈ­ໃສ່​ຕິດ­ຕາມ​ສະ­ພາບ​ນ້ຳ​ຂຶ້ນ​ຢ່າງ​ໃກ້­ຊິດ​ເປັນ​ປົກ­ກະ­ຕິ ແລະ ກຽມ​ຄວາມ​ພ້ອມ​ຮັບ​ມື​ກັບ​ສະ­ຖາ­ນະ​ການ​ທີ່​ຮ້າຍ​ແຮງ​ທີ່​ອາດ​ຈະ​ເກີດ​ຂຶ້ນ ສ່ວນ​ປະ­ຊາ­ຊົນ​ທີ່​ອາ­ໄສ​ຢູ່​ເຂດ​ພື້ນ​ທີ່​ຕ່ຳ​ແຄມ​ນ້ຳ­ຂອງ ໃຫ້​ກຽມ​ຍົກ­ຍ້າຍ​ເຄື່ອງ​ຂອງ​ມີ­ຄ່າ ແລະ ສັດ­ລ້ຽງ​ຂອງ​ຕົນ​ອອກ​ໄປ​ໄວ້​ບ່ອນ​ສູງ ແລະ ທີ່​ປອດ​ໄພ ພ້ອມ​ທັງ​ເຕືອນ​ໃຫ້​ມີ​ສະ­ຕິ​ຢູ່​ຕະ­ຫຼອດ​ເວ­ລາ ແລະ ໃຫ້​ຕິດ­ຕາມ​ເບິ່ງ​ຂ່າວ​ລາຍ​ງານ​ສະ­ພາບ​ພະ­ຍາ­ກອນ​ອາ­ກາດ​ຢ່າງ​ເປັນ​ປະ­ຈຳ ເພື່ອ​ໃຫ້​ຮູ້​ທັນ​ເຫດ­ການ ແລະ ພ້ອມ​ກັນ​ໃຫ້​ມີ​ຄວາມ​ລະ­ມັດ­ລະ­ວັງ​ໄພ​ນ້ຳ​ຖ້ວມ​ໃຫ້​ຫຼາຍ​ຂຶ້ນ.

ຂ່າວທີ່ກ່ຽວຂ້ອງ