ເບິ່ງບ້ານເຂົາເອົາບົດຮຽນ 05/09/2018

255 05 ກ.ຍ. 2018 ຫົວຂໍ້ຂ່າວອື່ນໆ

    ພົບ​ກັນ​ວັນ​ນີ້ ຂໍ​ເລີ່ມ​ຈາກ​ຂ່າວ​ທາງ​ການ​ຈີນ ເຂັ້ມ​ງວດ​ກັບ​ສິນ­ຄ້າ​ປອມ​ແປງ ເລື່ອງ ສ ເກົາ­ຫຼີ ສັ່ງ​ຫ້າມ​ຜະ­ລິດ​ຈຳ­ໜ່າຍ​ຢາ​ປົວ​ພະ­ຍາດ​ທີ່​ເປັນ​ອັນ­ຕະ­ລາຍ ແລະ ເລື່ອງ​ຜົນ­ສຳ­ເລັດ​ເບື້ອງ​ຕົ້ນ ໃນ​ການ​ຈຳ­ກັດ​ການ​ໃຊ້​ຖົງ​ຢາງ ທີ່ ອັງ­ກິດ.

    ທີ່ ສປ ຈີນ: ຂ່າວ​ຕ່າງ­ປະ­ເທດ​ໃນ​ຕົ້ນ​ເດືອນ​ສິງ­ຫາ​ປີ​ນີ້ ໃຫ້​ຮູ້​ວ່າ ຄະ­ນະ​ກຳ­ມະ­ການ​ຄຸ້ມ​ຄອງ​ຕະ­ຫຼາດ​ຈີນ ໄດ້​ອອກ​ແຈ້ງ​ການ​ເຖິງ​ຄວາມ​ໝາຍ​ໝັ້ນ​ປັ້ນ​ມື ໃນ​ການ​ປາບ​ປາມ​ຢ່າງ​ເດັດ­ຂາດ ການ​ຜະ­ລິດ ແລະ ການ­ຈຳ­ໜ່າຍ​ສິນ­ຄ້າ​ປອມ ກໍ່​ຄື​ສິນ­ຄ້າ​ທີ່​ບໍ່​ໄດ້​ມາດ­ຕະ­ຖານ ໃນ​ນັ້ນ ລວມ​ທັງ​ປະ­ເພດ​ສິນ­ຄ້າ​ລອກ​ລຽນ​ແບບ​ຜະ­ລິດ​ຕະ​ພັນ​ຍີ່­ຫໍ້​ທີ່​ມີ​ຊື່​ສຽງ ເຈົ້າ​ໜ້າ­ທີ່​ຮັບ­ຜິດ­ຊອບ​ຄຸ້ມ​ຄອງ​ຕະ­ຫຼາດ​ໃຫ້​ລາຍ​ລະ­ອຽດ​ຕື່ມ​ວ່າ: ມາດ​ຕະ­ການ​ຈະ​ລົງ​ເລິກ​ທັບ​ມ້າງ​ການ­ເຄື່ອນ­ໄຫວ​ທຸກ​ຮູບ​ການ​ຜະ­ລິດ ແລະ ຈຳ­ໜ່າຍ​ສິນ­ຄ້າ​ປອມ​ແປງ ແລະ ການ​ໂຄ­ສະ­ນາ​ຫຼອກ​ລວງ ຫຼື ຜິດ​ກົດ­ໝາຍ​ທີ່​ພົວ­ພັນ​ກັບ​ສິນ­ຄ້າ​ປອມ ທາງ​ຄະ­ນະ​ກຳ­ມະ­ການ​ໄດ້​ຮຽກ­ຮ້ອງ​ໃຫ້​ມີ​ການ​ກວດ​ສອບ​ຮອບ­ດ້ານ ແລະ ລະ­ອຽດ​ສິນ­ຄ້າ​ປອມ ນັບ​ແຕ່​ຂອດ​ການ​ຜະ­ລິດ ຮອດ​ຂັ້ນ​ຕອນ​ການ­ຈຳ­ໜ່າຍ​ສິນ­ຄ້າ​ດັ່ງ­ກ່າວ ແນ­ໃສ່​ລົງ­ໂທດ​ຜູ້​ກະ­ທຳ​ຜິດ​ແບບ​ເຖິງ​ຮາກ​ເຖິງ​ເຫງົ້າ.

    ທີ່ ສ ເກົາ­ຫຼີ: ໃນ​ວັນ​ທີ 6 ເດືອນ​ສິງ­ຫາ​ປີ​ນີ້ ອົງ­ການ​ຄຸ້ມ​ຄອງ​ການ​ຢາ​ປົວ​ພະ­ຍາດ​ຂອງ ສ ເກົາ­ຫຼີ ໄດ້​ອອກ​ຄຳ​ສັ່ງ​ໃຫ້​ບໍ­ລິ­ສັດ​ການ​ຢາ 22 ແຫ່ງ​ຂອງ​ທົ່ວ​ປະ­ເທດ​ຢຸດ ຈຳ­ໜ່າຍ​ຜະ­ລິດ​ຕະ​ພັນ​ການ​ຢາ ຈຳ­ນວນ 59 ລາຍ­ການ ທີ່​ມີ​ສ່ວນ​ປະ­ສົມ​ຂອງ​ສານ​ທີ່​ອາດ​ກໍ່­ໃຫ້­ເກີດ​ພະ­ຍາດ​ມະ​ເຮັງ​ໄດ້ ຂ່າວ​ບອກ​ວ່າ ບໍ­ລິ­ສັດ ແຕ​ບົງ (Daebong) ທີ່​ຜະ­ລິດ​ທາດ​ວານ​ຊາ​ຕານ (ທາດ​ທີ່​ໃຊ້​ເປັນ​ສ່ວນ​ປະ­ກອບ​ຂອງ​ຢາ​ປິ່ນ­ປົວ​ຄວາມ­ດັນ­ເລືອດ­ສູງ) ໄດ້​ຮັບ​ຜົນ​ກະ­ທົບ​ໂດຍ​ກົງ​ຈາກ​ມາດ​ຕະ­ການ​ຫ້າມ​ຄັ້ງ​ນີ້ ທາດ​ວານ​ຊາ​ຕານ (Valsartan) ທີ່​ຜະ­ລິດ​ໂດຍ​ບໍ­ລິ­ສັດ ແຕ​ບົງ ນັ້ນ​ມີ​ສ່ວນ​ປະ­ສົມ​ຂອງ​ທາດ​ເອັນ​ໂນ​ໂຕຼ​ໂຊ ດິ​ເມ​ທີ­ລາ​ມິນ (N-Nitrosodime thylamine) ເຊິ່ງ​ອົງ­ການ​ອະ­ນາ­ໄມ​ໂລກ ໄດ້​ຈັດ​ໃຫ້​ຢູ່​ໃນ​ປະ­ເພດ​ທາດ​ທີ່​ສາ­ມາດ​ກໍ່­ໃຫ້­ເກີດ​ພະ­ຍາດ​ມະ​ເຮັງ​ໃນ​ມະ­ນຸດ​ໄດ້.

    ທີ່ ອັງ­ກິດ: ເມື່ອ 3 ປີ​ກ່ອນ​ໜ້າ​ນີ້ ທາງ​ການ​ຂອງ​ປະ­ເທດ​ອັງ­ກິດ ໄດ້​ເລີ່ມ​ນຳ​ໃຊ້​ມາດ​ຕະ­ການ​ກຳ​ຈັດ­ການ​ໃຊ້​ຖົງ​ຢາງ (ປາ​ລາ​ສະ​ຕິກ) ທີ່​ໃຊ້​ບັນ­ຈຸ​ສິ່ງ​ຂອງ​ຢູ່​ຮ້ານ​ສັບ­ພະ​ສິນ­ຄ້າ​ໃຫຍ່ໆ 7 ແຫ່ງ ດ້ວຍ​ຮູບ​ການ​ໃຫ້​ລູກ​ຄ້າ​ຊື້​ຖົງ​ຢາງ​ເອົາ​ເອງ ໃນ​ລາ­ຄາ​ປະ­ມານ 0,07 ໂດ​ລາ​ສະ­ຫະ­ລັດ​ຕໍ່ 1 ຖົງ ກ່ອນ​ໜ້າ​ນັ້ນ ທາງ​ຮ້ານ​ສັບ­ພະ​ສິນ­ຄ້າ​ໃຫ້​ບໍ­ລິ­ການ​ຖົງ​ຢາງ​ລ້າໆ​ສຳ­ລັບ​ລູກ​ຄ້າ​ທີ່​ມາ​ຈັບ​ຈ່າຍ​ຊື້​ສິ່ງ​ຂອງ ພາກ­ສ່ວນ​ທີ່​ເປັນ​ເຈົ້າ​ການ­ຈັດ­ຕັ້ງ​ປະ­ຕິ­ບັດ​ມາດ​ຕະ­ການ “ໃຫ້​ລູກ​ຄ້າ​ຊື້​ຖົງ​ຢາງ​ເອົາ​ເອງ” ນີ້​ໄດ້­ແກ່​ກົມ​ສິ່ງ­ແວ­ດລ້ອມ ອາ­ຫານ ແລະ ກິດ­ຈະ­ການ​ຊົນ­ນະ­ບົດ​ຂອງ​ອັງ­ກິດ ພາຍ­ຫຼັງ​ໄດ້​ປະ­ຕິ­ບັດ​ມາ​ເປັນ​ເວ­ລາ 3 ປີ ທາງ​ກົມ​ກ່ຽວ­ຂ້ອງ​ໄດ້​ປະ­ກາດ​ໃຫ້​ຮູ້​ວ່າ: ບັນ­ດາ​ລູກ​ຄ້າ​ໃນ​ເຄືອ​ຄ່າຍ​ຮ້ານ​ສັບ­ພະ​ສິນ­ຄ້າ​ໃຫຍ່ໆ 7 ແຫ່ງ​ທົ່ວ​ອັງ­ກິດ ໄດ້​ຫຼຸດ​ການ​ຊື້​ຖົງ​ຢາງ​ລົງ​ເຖິງ 1/4 ເມື່ອ​ທຽບ​ກັບ​ໄລ­ຍະ​ປີ 2016-2017 ເຊິ່ງ​ເທົ່າ​ກັບ 300 ລ້ານ​ຖົງ ໃນ​ປັດ­ຈຸ­ບັນ​ໂດຍ ສະ­ເລ່ຍ​ແລ້ວ​ຄົນ​ອັງ­ກິດ​ໃຊ້​ຖົງ​ຢາງ​ພຽງ 19 ຖົງ​ຕໍ່​ຄົນ ທຽບ​ກັບ 140 ຖົງ ໃນ​ເວ­ລາ​ເລີ່ມ​ນຳ​ໃຊ້​ມາດ​ຕະ­ການ​ດັ່ງ­ກ່າວ ໃນ​ປີ 2015.

ຂ່າວທີ່ກ່ຽວຂ້ອງ