ຂ່າວຫຼ້າສຸດ

ທີມກີລາກະຕໍ້າລາວ ສ້າງຜົນງານໃນເອຊຽນເກມ ນຳເອົາຊື່ສຽງມາສູ່ປະເທດຊາດ

228 05 ກ.ຍ. 2018 ວົງຈອນກີລາ
ທີມກີລາກະຕໍ້າລາວ ສ້າງຜົນງານໃນເອຊຽນເກມ ນຳເອົາຊື່ສຽງມາສູ່ປະເທດຊາດ

    ນັກກີລາກະຕໍ້ທີມຊາດລາວ ທີ່ສາມາດສ້າງປະຫວັດສາດ ຍາດມາໄດ້ 1 ຫຼຽນເງິນ ແລະ 1 ຫຼຽນທອງ ໃນການແຂ່ງຂັນງານມະຫະກຳກີລາເອຊຽນເກມ ຄັ້ງທີ 18 ທີ່ປະເທດອິນໂດເນເຊຍ ຮັບກຽດເປັນເຈົ້າພາບ ໄດ້ກັບເຖິງບ້ານເກີດເປັນທີ່ຮຽບຮ້ອຍແລ້ວ ໃນວັນທີ 2 ກັນຍາ 2018 ທີ່ສະໜາມບິນສາກົນວັດໄຕ ນະຄອນຫຼວງວຽງຈັນ ໂດຍໄດ້ຮັບການຕ້ອນຮັບຢ່າງອົບອຸ່ນຈາກການນໍາກະຊວງສຶກສາທິການ ແລະ ກີລາ ຜູ້ປົກຄອງ ແລະ ຊາວນະຄອນຫຼວງວຽງຈັນ.

    ສຳລັບກີລາກະຕໍ້ທີມຊາດລາວ ເປັນ 1 ໃນຈຳນວນ 19 ປະເພດກີລາ ທີ່ລາວເຮົາໄດ້ສົ່ງເຂົ້າຮ່ວມການແຂ່ງຂັນກີລາເອຊຽນເກມ ຄັ້ງທີ 18 ທີ່ປະເທດອິນໂດເນເຊຍ ແລະ ເຮັດໃຫ້ນັກກີລາລາວບໍ່ຜິດຫວັງ ສາມາດຍາດມາໄດ້ 1 ຫຼຽນເງິນຈາກປະເພດທີມຄູ່ຊາຍ ແລະ 1 ຫຼຽນທອງ ຈາກປະເພດທີມຍິງ 4 ຄົນ ສົ່ງຜົນໃຫ້ນັກກີລາລາວສາມາດສ້າງປະຫວັດສາດໜ້າໃໝ່ ດ້ວຍການຄອງ 2 ຫຼຽນເງິນ ແລະ 3 ຫຼຽນທອງ ຫຼາຍກວ່າທຸກປີທີ່ເຂົ້າຮ່ວມລາຍການດັ່ງກ່າວຜ່ານມາ ເຮັດໃຫ້ຖືກຈັດຢູ່ອັນດັບທີ 31 ຈາກທັງໝົດ 45 ປະເທດເຂົ້າຮ່ວມ ໃນນັ້ນມີ 10 ປະເທດທີ່ບໍ່ສາມາດສ້າງຜົນງານໄດ້ຈັກຫຼຽນ ຕໍ່ຜົນງານດັ່ງກ່າວ ນັກກີລາກະຕໍ້ທີມຊາດ ຈະໄດ້ຮັບເງິນໂບນັດສະເພາະປະເພດທີມຈາກລັດຖະບານ ຄາດວ່າປະມານ 100 ລ້ານກີບ ແຕ່ຖ້າເປັນຜົນງານປະເພດບຸກຄົນ ສຳລັບຫຼຽນຄຳ 50 ລ້ານກີບ ຫຼຽນເງິນ 35 ລ້ານກີບ ແລະ ຫຼຽນທອງ 25 ລ້ານກີບ.

ຂ່າວທີ່ກ່ຽວຂ້ອງ