ແຂ່ງຂັນກີລາກະຕໍ້ ຊີງຂັນເຈົ້າແຂວງໄຊຍະບູລີ

203 05 ກ.ຍ. 2018 ວົງຈອນກີລາ
ແຂ່ງຂັນກີລາກະຕໍ້ ຊີງຂັນເຈົ້າແຂວງໄຊຍະບູລີ

    ການ​ແຂ່ງ­ຂັນ​ກີ­ລາ​ກະ­ຕໍ້​ຊາຍ ເພື່ອ​ຊີງ​ຂັນ​ທ່ານ​ເຈົ້າ­ແຂວງ​ໄຊ​ຍະ​ບູ​ລີ ທັງ​ເປັນ​ການ​ຄັດ​ເລືອກ​ເອົາ​ນັກ­ກີ­ລາ​ກະ­ຕໍ້​ຜູ້​ທີ່​ມີ​ພອນ​ສະ­ຫວັນ ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ XI ທີ່​ແຂວງ​ຊຽງ​ຂວາງ ຈັດ​ຂຶ້ນ​ວັນ​ທີ 29-31 ສິງ­ຫາ 2018 ຢູ່​ທີ່​ເດີ່ນ​ກີ­ລາ​ໃນ​ຮົ່ມ​ຂອງ​ແຂວງ​ໄຊ​ຍະ​ບູ​ລີ ມີ​ທ່ານ ເພັງ​ນິ​ລັນ ຄຳ​ພັນ​ເພັງ ຮອງ​ເຈົ້າ­ແຂວງ​ໄຊ​ຍະ​ບູ​ລີ ທ່ານ ອາ​ເມ ຊົງ​ເຢຍ​ເລັ່ງ ຫົວ­ໜ້າ​ພະ​ແນກ​ຍຸ­ຕິ​ທຳ​ແຂວງ​ໄຊ​ຍະ​ບູ​ລີ ປະ­ທານ​ສະ­ຫະ­ພັນ​ກີ­ລາ​ກະ­ຕໍ້​ແຂວງ ແລະ ນັກ­ກີ­ລາ​ເຂົ້າ​ຮ່ວມ.

    ການ​ແຂ່ງ­ຂັນ​ກີ­ລາ​ຄັ້ງ​ນີ້ ສະ­ຫະ­ພັນ​ກີ­ລາ​ກະ­ຕໍ້​ແຂວງ​ໄຊ​ຍະ​ບູ​ລີ ໄດ້​ສົມ­ທົບ​ກັບ​ພະ​ແນກ​ສຶກ​ສາ ແລະ ກີ­ລາ​ແຂວງ ກໍ່​ຄື​ຄະ­ນະ​ຮັບ­ຜິດ­ຊອບ​ຄັດ​ເລືອກ​ກະ­ກຽມ​ຄູ​ເຝີກ ແລະ ນັກ­ກີ­ລາ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ​ທີ່​ແຂວງ​ຊຽງ​ຂວາງ ເຊິ່ງ​ມີ​ທີມ​ນັກ­ກີ­ລາ​ກະ­ຕໍ້​ເຂົ້າ​ຮ່ວມ​ທັງ​ໝົດ 8 ທີມ ຄື: ທີມ​ເມືອງ​ພຽງ ເມືອງ​ແກ່ນ​ທ້າວ ກອງ​ບັນ­ຊາ​ການ​ທະ­ຫານ​ແຂວງ ອົງ­ການ​ໄອ​ຍະ​ການ​ປະ­ຊາ­ຊົນ​ແຂວງ ບ້ານ​ກິ່ວ​ແຄ່ມ ບ້ານ​ແກ້ງ ບ້ານ​ດອນ​ໃໝ່​ປະ­ສົມ ແລະ ທີມ​ກອງ​ພົນ­ທະ­ຫານ​ຮາບ​ທີ 2 ສຳ­ລັບ​ການ​ແຂ່ງ­ຂັນ ໄດ້​ແບ່ງ​ອອກ​ເປັນ 2 ສາຍ ແຕ່​ລະ​ສາຍ​ໄດ້​ພົບ​ກັນ​ໝົດ ຈາກ​ນັ້ນ ກໍ່​ເອົາ​ທີມ​ທີ 1 ແລະ ທີ 2 ທີ່​ເຂົ້າ​ຮອບ 4 ທີມ ມາ​ເຕະ​ໄຂວ່​ກັນ​ຄັດ​ເລືອກ​ເອົາ​ທີມ​ຊະ­ນະ​ພົບ​ເພື່ອ​ຊີງ​ເອົາ​ທີ 1.

    ຜ່ານ​ການ​ແຂ່ງ­ຂັນ​ຜົນ​ປາ­ກົດ​ວ່າ ທີມ​ຊະ­ນະ​ເລີດ​ອັນ​ດັບ​ທີ 1 ໄດ້­ແກ່​ທີມ​ເມືອງ​ພຽງ ຮັບ​ເງິນ­ສົດ 1 ລ້ານ​ກີບ ພ້ອມ​ຂັນ 1 ໜ່ວຍ ອັນ​ດັບ​ທີ 2 ທີມ​ບ້ານ​ດອນ​ໃໝ່​ປະ­ສົມ ໄດ້​ຮັບ​ເງິນ­ສົດ 7 ແສນ​ກີບ ພ້ອມ​ຂັນ 1 ໜ່ວຍ ແລະ ອັນ​ດັບ 3 ທີມ​ອົງ­ການ​ໄອ​ຍະ​ການ​ປະ­ຊາ­ຊົນ​ແຂວງ ໄດ້​ຮັບ​ເງິນ 5 ແສນ​ກີບ ພ້ອມ​ຂັນ 1 ໜ່ວຍ ນອກ​ນັ້ນ​ແມ່ນ​ລາ­ງວັນ​ຊົມ­ເຊີຍ​ຕາມ​ລຳ­ດັບ.

ຂ່າວທີ່ກ່ຽວຂ້ອງ