ຂ່າວຫຼ້າສຸດ

ບັນຫາປິ່ນອ້ອມສົກຮຽນໃໝ່

526 05 ກ.ຍ. 2018 ນານາສາລະ

    ເປີດ​ພາກ­ຮຽນ​ໃໝ່ ພໍ່​ແມ່​ຜູ້​ປົກ­ຄອງ​ນັກ­ຮຽນ​ກໍ່​ໄດ້​ກະ­ກຽມ​ອຸ­ປະ­ກອນ​ການ​ຮຽນ ເຊັ່ນ: ປື້ມ​ຕຳ­ລາ​ຮຽນ ແລະ ຊຸດ​ນັກ­ຮຽນ ຫວັງ​ວ່າ​ພໍ່­ຄ້າ ແມ່​ຂາຍ ຄົງ​ຊິ​ບໍ່​ສວຍ­ໂອ­ກາດ​ຂຶ້ນ​ລາ­ຄາ​ຍາມ​ນີ້ ເຊິ່ງ​ຜ່ານ​ມາ​ການ­ຈັດ­ຕັ້ງ​ພາກ​ລັດ ກໍ່​ໄດ້​ອອກ​ແຈ້ງ​ການ​ເປັນ​ໄລ­ຍະ​ເຊິ່ງ​ລວມ​ທັງ​ລາ­ຄາ​ຄ່າ​ອາ­ຫານ​ການ​ກິນ​ນຳ ທັງ​ເຝີ​ທັງ​ເຂົ້າ­ປຽກ ຫຼື ວ່າ​ເຂົ້າ­ຜັດ ເພາະ​ຖ້າ​ບໍ່​ຄຸ້ມ​ຄອງ​ລາ­ຄາ​ຢ່າງ​ເຂັ້ມ​ງວດ ກໍ່​ຈະ​ເຮັດ​ໃຫ້​ຄ່າ​ຄອງ​ຊີບ​ສູງ​ໂດຍ​ບໍ່​ຈຳ­ເປັນ.

    ສຳ­ລັບ​ບັນ­ຫາ​ອາ­ຫານ​ໃນ​ໂຮງ­ຮຽນ ແລະ ສະ­ຖານ­ທີ່​ອາ­ຄານ​ຮຽນ​ຕາມ​ຫາງ​ສຽງ​ສັງ­ຄົມ​ສ່ວນ​ໃຫຍ່ ກໍ່​ແມ່ນ​ຢາກ​ໃຫ້​ການ­ຈັດ­ຕັ້ງ​ທີ່​ຮັບ­ຜິດ­ຊອບ​ໂດຍ​ກົງ ໄດ້​ກວດ­ກາ​ຢ່າງ​ເຂັ້ມ​ງວດ ວ່າ​ໄດ້​ມາດ­ຕະ­ຖານ ແລະ ຖືກ​ຫຼັກ​ອະ­ນາ­ໄມ​ພຽງ­ພໍ ເພາະ​ເປັນ​ຮ່ວງ​ສຸ­ຂະ­ພາບ​ເຍົາ­ວະ​ຊົນ ເຊິ່ງ​ຕ້ອງ​ຄິດ​ເຫັນ​ອະ­ນາ­ຄົດ​ຂອງ​ພວກ​ເຂົາ​ນຳ​ກັນ ເຊິ່ງ​ບັນ­ຫາ​ນີ້​ມັນ​ກໍ່​ພົວ­ພັນ​ເຖິງ​ປະ­ເດັນ​ຂອງ​ການ​ສຶກ​ສາ​ແບບ​ຍືນ​ຍົງ (SED: Sustainable Education Development) ເພາະ​ມັນ​ໄດ້​ກວມ​ເອົາ​ຫຼາຍ​ມິ​ຕິ ເຊັ່ນ: ການ​ພັດ­ທະ­ນາ​ຄູ ການ​ສ້າງ​ຫຼັກ­ສູດ ການ​ຂຽນ​ຕຳ­ລາ ການ​ພັດ­ທະ­ນາ​ສະ­ຖານ­ທີ່​ສຶກ​ສາ (ອາ­ຄານ​ຮຽນ) ແລະ ຂາດ​ບໍ່​ໄດ້​ກໍ່​ແມ່ນ​ຫ້ອງ​ສະ­ໝຸດ ຫຼາຍ​ອັນ​ແມ່ນ​ສຳ­ຄັນ​ພໍໆກັນ ຍົກ​ຕົວ­ຢ່າງ: ຫ້ອງ​ສະ­ໝຸດ ຖ້າ​ບໍ່​ມີ​ປື້ມ​ອ່ານ​ພຽງ­ພໍ ຫຼື ບໍ່​ເປີດ​ໃຫ້​ເວ­ລາ​ພຽງ­ພໍ​ຍ່ອມ​ບໍ່­ເກີດ​ປະ­ໂຫຍດ​ເທົ່າ​ທີ່​ຄວນ ດັ່ງ­ນັ້ນ ພວກ​ເຮົາ​ລອງ​ຄິດ​ໃຫ້​ຄັກໆ​ເບິ່ງ​ວ່າ ຖ້າ​ຫ້ອງ​ສະ­ໝຸດ​ຂາດ​ປື້ມ​ຕ່ຳ​ລາ​ບໍ່​ພຽງ­ພໍ ຈະ​ໃຫ້​ນັກ­ຮຽນ​ໄປ​ອ່ານ ແລະ ຄົ້ນ­ຄວ້າ​ຢູ່​ໃສ ? ດັ່ງ­ນັ້ນ ມັນ​ຈິ່ງ​ຮຽກ­ຮ້ອງ​ເຖິງ​ຜູ້​ບໍ­ລິ­ຫານ​ການ​ສຶກ​ສາ ຕ້ອງ​ໄດ້​ທົບ​ທວນ­ຄືນ​ວ່າ ຢາກ​ພັດ­ທະ­ນາ​ການ​ສຶກ​ສາ​ຢາກ​ໄດ້​ຄຸ­ນະ­ພາບ​ຂອງ​ການ​ສຶກ​ສາ ເຮົາ​ໄດ້​ເອົາ­ໃຈ­ໃສ່​ພຽງ­ພໍ​ຫຼື​ຍັງ ? ຍັງ​ມີ​ສິ່ງ​ໃດ​ທີ່​ຍັງ​ບົກ​ຜ່ອງ ເຊິ່ງ​ຄວນ​ຫຼີກ­ເວັ້ນ ແບບ​ເອົາ​ຫູ​ໄປ​ນາ ເອົາ​ຕາ​ໄປ​ໄຮ່.

    ຫວັງ​ວ່າ­ການ​ເປີດ​ພາກ­ຮຽນ​ໃໝ່ ຫຼາຍ​ພາກ­ສ່ວນ​ຈະ​ເຫັນ­ແກ່​ປະ­ໂຫຍດ​ສ່ວນ​ລວມ​ຂອງ​ຊາດ ຜູ້​ຄ້າ­ຂາຍ​ບໍ່​ສວຍ­ໂອ­ກາດ​ຂຶ້ນ​ລາ­ຄາ​ສິນ­ຄ້າ ຜູ້​ຄຸ້ມ​ຄອງ​ກໍ່​ໄດ້​ລົງ​ກວດ­ກາ ຜູ້​ຈະ​ເຂົ້າ​ຮຽນ​ກໍ່​ໄດ້​ຕັ້ງ­ໃຈ​ຮຽນ ສົມ​ກັບ​ພໍ່​ແມ່­ຈ້າງ​ໃຫ້​ຮຽນ ແລະ ສຳ­ຄັນ​ກໍ່​ແມ່ນ ຄູ ຕຳ­ລາ ຜູ້​ບໍ­ລິ­ຫານ​ການ​ສຶກ​ສາ ຫ້ອງ​ສະ­ໝຸດ​ທີ່​ມີ​ໜັງ­ສື​ພຽງ­ພໍ ເພື່ອ​ສະ­ໜອງ​ໃຫ້​ພວກ​ນັກ­ຮຽນ​ໄດ້​ຄົ້ນ­ຄວ້າ​ຢ່າງ​ເຕັມ­ທີ່ ແລະ ບໍ່​ເຮັດ​ແບບ​ມ້າມ​ແປະ​ພຸງ ໃນ​ການ​ບໍ­ລິ­ຫານ !

ຂ່າວທີ່ກ່ຽວຂ້ອງ