ຂ່າວຫຼ້າສຸດ

ຫຼາຍບ້ານຢູ່ເມືອງໄຊທານີ ໄດ້ຮັບເຄື່ອງຊ່ວຍເຫຼືອ

272 04 ກ.ຍ. 2018 ຂ່າວໜ້າ​ໜຶ່ງ
ຫຼາຍບ້ານຢູ່ເມືອງໄຊທານີ ໄດ້ຮັບເຄື່ອງຊ່ວຍເຫຼືອ

    ດ້ວຍ​ຄວາມ​ເປັນ​ຫ່ວງ​ເປັນ​ໄຍ​ຂອງ​ການ​ນຳ​ນະ­ຄອນ­ຫຼວງ​ວຽງ​ຈັນ ທັງ​ເປັນ​ການ​ຊ່ວຍ­ເຫຼືອ​ພໍ່​ແມ່​ປະ­ຊາ­ຊົນ​ຜູ້​ປະ­ສົບ​ໄພ­ພິ­ບັດ​ນ້ຳ​ຖ້ວມ ທີ່­ຢູ່​ລຽບ​ແຄມ​ຝັ່ງ​ແມ່­ນ້ຳ​ງື່ມ ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ ພະ​ແນກ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ນະ­ຄອນ­ຫຼວງ​ວຽງ​ຈັນ ພ້ອມ​ດ້ວຍ​ບັນ­ດາ​ຫ້ອງ­ການ​ກ່ຽວ­ຂ້ອງ ໄດ້​ນຳ​ເຄື່ອງ​ອຸ­ປະ­ໂພກ-ບໍ­ລິ­ໂພກ ມອບ​ຊ່ວຍ­ເຫຼືອ​ຜູ້​ປະ­ສົບ​ໄພ​ນ້ຳ​ຖ້ວມ​ບ້ານ​ທ່າ​ດິນ​ແດງ ບ້ານ​ເວີນ​ແທ່ນ ແລະ ບ້ານ​ສົມ​ສະ­ໄໝ ເມືອງ​ດັ່ງ­ກ່າວ ໃນ​ວັນ​ທີ 1 ກັນ­ຍາ 2018 ຜ່ານ​ມາ ໂດຍ​ການ​ມອບ​ຂອງ​ທ່ານ ສີ​ຫຸນ ສິດ­ທິ​ລື​ໄຊ ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ທັງ​ເປັນ​ປະ­ທານ​ກຳ­ມະ­ການ​ປ້ອງ​ກັນ ແລະ ຄວບ​ຄຸມ​ໄພ­ພິ­ບັດ​ຂັ້ນ​ນະ­ຄອນ­ຫຼວງ​ວຽງ​ຈັນ ແລະ ຕາງ­ໜ້າ​ຮັບ​ຂອງ​ທ່ານ​ນາຍ­ບ້ານ​ທັງ 3 ບ້ານ ມີ​ທ່ານ ນາງ ລຳ​ພອຍ ສີ​ອັກ​ຄະ​ຈັນ ຫົວ­ໜ້າ​ພະ​ແນກ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ນະ­ຄອນ­ຫຼວງ​ວຽງ​ຈັນ ທ່ານ ບຸນ​ວັນ ຈະ​ສົ໋ວ​ເກົ້າ ຮອງ​ເຈົ້າ­ເມືອງ​ໄຊ​ທາ­ນີ ແລະ ພໍ່​ແມ່​ປະ­ຊາ­ຊົນ​ເຂົ້າ​ຮ່ວມ.

    ເຄື່ອງ​ທີ່​ມອບ​ໃຫ້​ບ້ານ​ທ່າ​ດິນ​ແດງ ປະ­ກອບ​ມີ ນ້ຳ​ດື່ມ 183 ແພັກ ໝີ່ 61 ແກັດ ເຂົ້າ­ສານ 21 ເປົາ ເຄື່ອງ​ຊູ​ກຳ­ລັງ​ຈຳ­ນວນ 4 ແພັກ ເຄື່ອງ­ນຸ່ງ​ຫົ່ມ​ຈຳ­ນວນ​ໜຶ່ງ ແລະ ເງິນ​ຈຳ­ນວນ 2 ລ້ານ​ກີບ ບ້ານ​ເວີນ​ແທ່ນ ມີ​ນ້ຳ​ດື່ມ 90 ແພັກ ໜີ່ 30 ແກັດ ເຂົ້າ­ສານ 10 ເປົາ ເຄື່ອງ​ຊູ​ກຳ­ລັງ 3 ແພັກ ແລະ ເງິນ​ຈຳ­ນວນ 3 ລ້ານ​ກີບ ສ່ວນ​ບ້ານ​ສົມ​ສະ­ໄໝ​ມີ ນ້ຳ​ດື່ມ 75 ແພັກ ໝີ່ 25 ແກັດ ເຂົ້າ­ສານ 8 ເປົາ ເຄື່ອງ​ດື່ມ​ຊູ​ກຳ­ລັງ 2 ແພັກ ເຄື່ອງ­ນຸ່ງ​ຫົ່ມ​ຈຳ­ນວນ​ໜຶ່ງ ແລະ ເງິນ­ສົດ 3 ລ້ານ​ກີບ ນອກ​ນີ້ ທ່ານ​ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ຍັງ​ໄດ້​ຂີ່​ເຮືອ​ສຳ​ຫຼວດ​ເບິ່ງ​ສະ­ພາບ​ນ້ຳ​ຖ້ວມ​ເຮືອນ​ຂອງ​ປະ­ຊາ­ຊົນ​ຕື່ມ​ອີກ.

    ສຳ­ລັບ​ຜົນ​ເສຍ​ຫາຍ​ຂອງ​ບ້ານ​ທ່າ​ດິນ​ແດງ ມີ​ນ້ຳ​ຖ້ວມ​ເຮືອນ​ຂອງ​ປະ­ຊາ­ຊົນ​ຈຳ­ນວນ 34 ຫຼັງ­ຄາ ພົນ­ລະ­ເມືອງ​ທີ່​ໄດ້​ຮັບ​ຜົນ​ກະ­ທົບ​ຈຳ­ນວນ 176 ຄົນ ຍິງ 81 ຄົນ ແລະ ຖ້ວມ​ເນື້ອ­ທີ່​ນາ ສວນ ໜອງ​ປາ ມີ 81 ຄອບ­ຄົວ ເຊິ່ງ​ມີ​ເນື້ອ­ທີ່​ນາ​ທັງ​ໝົດ 121,3 ເຮັກ­ຕາ ເນື້ອ­ທີ່​ສວນ 2,3 ໄລ່ ແລະ ໜອງ​ປາ ມີ​ເນື້ອ­ທີ່ 1 ເຮັກ­ຕາ ບ້ານ​ເວີນ​ແທ່ນ ນ້ຳ​ຖ້ວມ​ເຮືອນ​ພໍ່​ແມ່​ປະ­ຊາ­ຊົນ​ຈຳ­ນວນ 89 ຄອບ­ຄົວ ມີ​ພົນ­ລະ­ເມືອງ​ທີ່​ໄດ້​ຮັບ​ຜົນ​ກະ­ທົບ​ຈຳ­ນວນ 429 ຄົນ ຍິງ 196 ຄົນ ນ້ຳ​ຖ້ວມ​ເນື້ອ­ທີ່​ນາ​ທັງ​ໝົດ 117 ໄລ່ ເທົ່າ​ກັບ 19,5 ເຮັກ­ຕາ ສວນ​ເນື້ອ­ທີ່ 8,5 ເຮັກ­ຕາ ສ່ວນ​ບ້ານ​ສົມ​ສະ­ໄໝ​ມີ​ຈຳ­ນວນ​ຄອບ­ຄົວ​ທີ່​ໄດ້​ຮັບ​ຜົນ​ກະ­ທົບ​ທັງ​ໝົດ 25 ຄອບ­ຄົວ ເນື້ອ­ທີ່​ນາ​ຈຳ­ນວນ 95 ເຮັກ­ຕາ ແລະ ໜອງ​ປາ 5 ເຮັກ­ຕາ.

    ທ່ານ​ນາງ ລຳ​ພອຍ ສີ​ອັກ​ຄະ​ຈັນ ກ່າວ​ວ່າ: ປັດ­ຈຸ­ບັນ​ເຫັນ​ວ່າ​ລະ­ດັບ​ນ້ຳ​ງື່ມ​ຍັງ​ສືບ­ຕໍ່​ເພີ່ມ​ຂຶ້ນ​ເລື້ອຍໆ ແລະ ຍັງ​ຈະ​ສືບ­ຕໍ່​ຖ້ວມ​ເຮືອນ​ຊານ ໄຮ່­ນາ ຮົ້ວ​ສວນ​ຂອງ​ພໍ່​ແມ່​ປະ­ຊາ­ຊົນ​ທີ່​ອາ­ໄສ​ລຽບ​ຕາມ​ແຄມ​ແມ່­ນ້ຳ​ງື່ມ ແລະ ບ່ອນ​ທີ່​ມີ​ພື້ນ​ທີ່​ຕ່ຳ ສະ­ນັ້ນ ເພື່ອ​ເປັນ​ການ​ຊ່ວຍ­ເຫຼືອ​ປະ­ຊາ­ຊົນ​ຂໍ​ຮຽກ­ຮ້ອງ​ມາ​ຍັງ​ບັນ­ດາ​ຫົວ­ໜ່ວຍ​ທຸ­ລະ​ກິດ ກໍ່​ຄື ພໍ່​ແມ່​ປະ­ຊາ­ຊົນ​ຜູ້​ທີ່​ມີ​ເງື່ອນ­ໄຂ​ໃຫ້​ປະ­ກອບ­ສ່ວນ​ເຄື່ອງ​ອຸ­ປະ­ໂພກ ເປັນ­ຕົ້ນ ເຂົ້າ­ສານ ນ້ຳ ແລະ ອາ­ຫານ​ແຫ້ງ ເພື່ອ​ປະ­ກອບ­ສ່ວນ​ຊ່ວຍ­ເຫຼືອ​ເຊິ່ງ​ກັນ ແລະ ກັນ ສາ­ມາດ​ມອບ​ໄດ້​ທີ່​ພະ​ແນກ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ນະ­ຄອນ­ຫຼວງ​ວຽງ​ຈັນ.

    ຂ່າວ​ແຈ້ງ​ອີ​ກວ່າ: ວັນ​ທີ 31 ສິງ­ຫາ 2018 ພະ​ແນກ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ນະ­ຄອນ­ຫຼວງ​ວຽງ​ຈັນ ໄດ້​ນຳ​ເອົາ​ເຄື່ອງ​ຊ່ວຍ­ເຫຼືອ​ໄປ​ມອບ​ໃຫ້​ບ້ານ​ດ່ານ​ຊ້າງ ປະ­ກອບ​ມີ ເຂົ້າ­ສານ 10 ເປົາ ໝີ່ 20 ແກັດ ແລະ ນ້ຳ​ດື່ມ 60 ແພັກ ກ່າວ​ມອບ​ຂອງ​ທ່ານ​ນາງ ລຳ​ພອຍ ສີ​ອັກ​ຄະ​ຈັນ ຫົວ­ໜ້າ​ພະ​ແນກ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ນະ­ຄອນ­ຫຼວງ​ວຽງ​ຈັນ ແລະ ກ່າວ​ຮັບ​ຂອງ​ທ່ານ ບົວ​ສີ ເສີດ​ຜາດ ນາຍ­ບ້ານ​ດ່ານ​ຊ້າງ ມີ​ພະ­ນັກ­ງານ​ກ່ຽວ­ຂ້ອງ ແລະ ປະ­ຊາ­ຊົນ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ