ຊຸກຍູ້ເປີດສົກຮຽນໃໝ່ ໂດຍເນັ້ນຊ່ວຍເຫຼືອໂຮງຮຽນ ຄູ ນັກຮຽນ ທີ່ປະສົບໄພນ້ຳຖ້ວມ

215 04 ກ.ຍ. 2018 ຂ່າວໜ້າ​ໜຶ່ງ

    ທ່ານ​ນາງ ແສງ​ເດືອນ ຫຼ້າ​ຈັນ­ທະ​ບູນ ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ (ສສກ) ໄດ້​ຖະ­ແຫຼງ​ຂ່າວ​ກ່ຽວ​ກັບ​ການ​ເປີດ​ສົກ­ຮຽນ​ໃໝ່ 2018-2019 ວັນ​ທີ 24 ສິງ­ຫາ 2018 ຜ່ານ​ມາ​ວ່າ: ການ​ກະ­ກຽມ​ເປີດ​ສົກ­ຮຽນ​ໃໝ່ 2018-2019 ໄດ້​ເລີ່ມ​ມາ​ແຕ່​ເດືອນ​ກໍ­ລະ­ກົດ ໂດຍ​ໄດ້​ຈັດ​ກອງ​ປະ­ຊຸມ​ຜູ້​ບໍ­ລິ­ຫານ​ທົ່ວ​ປະ­ເທດ ເພື່ອ​ກະ­ກຽມ​ການ​ເປີດ​ສົກ­ຮຽນ​ໃໝ່ ແລະ ວາງ​ແຜນ​ພັດ­ທະ­ນາ​ການ​ສຶກ​ສາ ຈາກ​ນັ້ນ ຕົ້ນ​ເດືອນ​ສິງ­ຫາ ພະ​ແນກ ສສກ ແຂວງ ສະ​ຖາ​ບັນ​ການ​ສຶກ​ສາ​ຕ່າງໆ ກໍ່​ໄດ້​ເອົາ​ເນື້ອ​ໃນ​ຈິດ­ໃຈ​ຂອງ​ກອງ​ປະ­ຊຸມ​ດັ່ງ­ກ່າວ ໄປ​ຈັດ​ຕັ້ງ​ຜັນ​ຂະ­ຫຍາຍ ປັດ­ຈຸ­ບັນ​ໄດ້​ມີ​ການ​ກຽມ​ຄວາມ​ພ້ອມ​ສົມ­ຄວນ ກະ­ຊວງ ສສກ ໄດ້​ສົ່ງ​ພະ­ນັກ­ງານ​ໄປ​ຊຸກ­ຍູ້​ການ​ໄຂ​ສົກ­ຮຽນ​ໃໝ່​ຢູ່ 17 ແຂວງ 1 ນະ­ຄອນ­ຫຼວງ ແລະ 40 ເມືອງ​ເປົ້າ​ໝາຍ​ໂຄງ­ການ​ຍົກ​ສູງ​ຄຸ­ນະ­ພາບ​ການ​ສຶກ​ສາ ແລະ 20 ເມືອງ ທີ່​ໄດ້​ຮັບ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ.

    ປີ 2018 ຫຼາຍ​ແຂວງ​ທົ່ວ​ປະ­ເທດ ໄດ້​ຮັບ​ຜົນ​ກະ­ທົບ​ຈາກ​ໄພ­ພິ­ບັດ ໂດຍ​ສະ­ເພາະ ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ເຮັດ​ໃຫ້​ໂຮງ­ຮຽນ​ໄດ້​ຮັບ​ຄວາມ​ເສຍ​ຫາຍ ເຊິ່ງ​ກະ­ຊວງ ສສກ ໄດ້​ລະ­ດົມ​ທຶນ​ຈາກ​ຄູ-ອາ­ຈານ ແລະ ພາກ­ສ່ວນ​ຕ່າງໆ 232 ລ້ານ​ກີບ ແລະ ເຄື່ອງ​ອຸ­ປະ­ໂພກ-ບໍ­ລິ­ໂພກ 180 ລ້ານ​ກີບ ໄປ​ຊ່ວຍ­ເຫຼືອ ພ້ອມ​ນີ້ ຍັງ​ໄດ້​ສົ່ງ​ວິ­ຊາ​ການ​ຮ່ວມ​ກັບ​ພາກ­ສ່ວນ​ຄູ ແລະ ອົງ​ການ­ຈັດ­ຕັ້ງ​ສາ­ກົນ​ຕ່າງໆ ໄປ​ຊ່ວຍ​ກິດ­ຈະ­ກຳ​ຟື້ນ​ຟູ​ສະ­ພາບ​ຈິດ­ໃຈ​ຂອງ​ເດັກ­ນ້ອຍ ເພື່ອ​ກຽມ​ເຂົ້າ​ສູ່​ສົກ­ຮຽນ​ໃໝ່ ແລະ ສົ່ງ​ນັກ​ສຶກ​ສາ​ໄປ​ຊ່ວຍ​ແຕ່ງ­ອາ­ຫານ​ຢູ່​ສູນ​ພັກ­ຊົ່ວ­ຄາວ​ຂອງ​ຜູ້​ປະ­ສົບ​ໄພ​ນ້ຳ​ຖ້ວມ ໃນ​ວັນ​ທີ 3 ກັນ­ຍາ 2018 ເມືອງ​ສະ­ໜາມ​ໄຊ ຈະ​ເປີດ​ສົກ­ຮຽນ​ໃໝ່​ແຕ່​ຊັ້ນ ມ4 ແລະ ມ7 ເພື່ອ​ໃຫ້​ເປັນ​ເອ­ກະ​ພາບ​ກັບ​ແຂວງ​ອື່ນໆ ສ່ວນ​ຊັ້ນ​ອື່ນໆ​ຈະ​ທະ­ຍອຍ​ເປີດ​ຕາມ​ລຳ­ດັບ ໃນ​ນີ້​ກະ­ຊວງ ສສກ ຈະ​ໄດ້​ມອບ​ປື້ມ​ແບບ­ຮຽນ ປື້ມ​ຂຽນ ບິກ ຖົງ​ປື້ມ ແລະ ຊຸດ​ເຄື່ອງ​ແບບ​ນັກ­ຮຽນ.

    ກະ­ຊວງ ສສກ ໄດ້​ກະ­ກຽມ​ຄູ​ຈາກ​ວິ­ທະ­ຍາ­ໄລ​ຕ່າງໆ​ໃນ​ແຂວງ​ຈຳ­ປາ​ສັກ ໄປ​ຊ່ວຍ​ສອນ​ແທນ​ຄູ​ຜູ້​ບໍ່​ທັນ​ພ້ອມ​ໃນ​ການ​ສິດ­ສອນ ພ້ອມ​ທັງ​ໄດ້​ນຳ​ເງິນ​ທີ່​ໄດ້​ຈາກ​ການ​ບໍ­ລິ­ຈາກ 480 ລ້ານ​ກີບ ເພື່ອ​ນຳ​ໃຊ້​ແກ້​ໄຂ​ຜົນ​ກະ­ທົບ​ໃນ​ຂະ­ແໜງ​ສຶກ​ສາ ໂດຍ​ສະ­ເພາະ ການ​ຟື້ນ​ຟູ ແລະ ຊ່ວຍ­ເຫຼືອ​ຄູ-ອາ­ຈານ​ທີ່​ໄດ້​ຮັບ​ຜົນ​ກະ­ທົບ ເຊິ່ງ​ຈະ​ມອບ​ເງິນ​ໃຫ້​ຄູ​ຢູ່​ເມືອງ​ສະ­ໜາມ​ໄຊ 67 ຄົນ ຜູ້​ລະ 1 ລ້ານ​ກີບ ສ່ວນ​ທີ່​ເຫຼືອ​ຈະ​ຊ່ວຍ​ສ້ອມ­ແປງ​ໂຮງ­ຮຽນ​ທີ່​ໄດ້​ຮັບ​ຜົນ​ກະ­ທົບ ແລະ ພະ­ນັກ­ງານ​ຂະ­ແໜງ​ສຶກ​ສາ​ທີ່​ໄດ້​ຮັບ​ຜົນ​ກະ­ທົບ ກະ­ຊວງ ສສກ ຍັງ​ມີ​ແຜນ​ຄັດ​ເລືອກ​ເອົາ​ນັກ­ຮຽນ​ທີ່​ມີ​ຄະ­ແນນ​ດີ​ທີ່​ສາ­ມາດ​ເຂົ້າ​ຮຽນ​ມະ­ຫາ­ວິ­ທະ­ຍາ­ໄລ ຫຼື​ອາ­ຊີ­ວະ​ສຶກ​ສາ ໂດຍ​ສະ­ເພາະ ນັກ­ຮຽນ​ທີ່​ເປັນ​ກຳ­ພ້າ ກຳ­ພອຍ ພໍ່​ແມ່​ເສຍ​ຊີ­ວິດ​ຈາກ​ເຫດ​ໄພ​ນ້ຳ​ຖ້ວມ ເກັບ​ກຳ​ລາຍ​ຊື່​ເຂົ້າ​ບັນ­ຊີ ເພື່ອ​ໄປ​ຝາກ​ຢູ່​ໂຮງ­ຮຽນ​ເດັກ​ກຳ­ພ້າ ໂຮງ­ຮຽນ​ກິນ­ນອນ​ຊົນ­ເຜົ່າ​ແຂວງ​ເຊ​ກອງ ສາ­ລະ​ວັນ ຈຳ­ປາ​ສັກ ແລະ ຈະ​ໃຫ້​ເບ້ຍ­ລ້ຽງ​ເປັນ​ກໍ­ລະ­ນີ​ພິ­ເສດ.

ຂ່າວທີ່ກ່ຽວຂ້ອງ