ຂ່າວຫຼ້າສຸດ

ຂ່າວ​ສັ້ນ

192 04 ກ.ຍ. 2018 ຂ່າວຕ່າງປະເທດ
ຂ່າວ​ສັ້ນ

  ເອ​ກົວ​ດໍ: ແຈ້ງ​ການ​ຂອງ​ເຈົ້າ​ໜ້າທີ່​ເອ​ກົວ​ດໍ ໃຫ້​ຮູ້​ວ່າ ມີ​ຜູ້​ເສຍ​ຊີວິດ 11 ຄົນ ແລະ​ ບາດເຈັບ​ອີກ 37 ຄົນ ຈາກ​ອຸບັດເຫດ​ລົດ​ໂດຍສານ​ຂວ້ຳ ຊຶ່ງ​ເກີດ​ຂຶ້ນ​ຢູ່​ໃນ​ເຂດ​ສາຍພູ ອັນ​ເດ​​ສ ຂອງ​ປະເທດ​ດັ່ງກ່າວ ເມື່ອ​ວັນ​ທີ 1 ກັນຍາ​ນີ້.

    ກ່ອນ​ໜ້າ​ນັ້ນ ເມື່ອ​ວັນ​ທີ 14 ສິງຫາ​ທີ່​ຜ່ານ​ມາ ລົດ​ໂດຍສານ​ຄັນ​ໜຶ່ງ​ຂອງ​ໂກ​ລົມ​ບີ ຊຶ່ງ​ບັນທຸກ​ຜູ້ໂດຍສານ 40 ຄົນ ກໍ​ໄດ້​ເກີດ​ອຸບັດເຫດ​ຕຳ​ກັບ​ລົດ​ອີກ​ຄັນ​ໜຶ່ງ ຢູ່​ໃນ​ເຂດ​ຊານເມືອງ​ນະຄອນຫຼວງ​ກີ​ໂຕ ຂອງ​ເອ​ກົວ​ດໍ ເປັນ​ເຫດ​ໃຫ້​ມີ​ຜູ້​ເສຍ​ຊີວິດ 23 ຄົນ ໃນ​ນັ້ນ​ມີ​ຊາວ​ໂກ​ລົມ​ບີ ແລະ ​ຊາວ​ເວ​ເນ​ຊູ​ເອ​ລາ ລວມ​ຢູ່​ນຳ​ຫຼາຍ​ຄົນ.

   ຟີ​ລິບ​ປິນ: ເຈົ້າ​ໜ້າທີ່​ຟີ​ລິບ​ປິນ ໃຫ້​ຮູ້​ວ່າ ມີ​ຜູ້​ເສຍ​ຊີວິດ​ຢ່າງ​ໜ້ອຍ 1 ຄົນ ແລະ​ບາດເຈັບ​ອີກ 15 ຄົນ ຈາກ​ເຫດການ​ວາງ​ລະເບີດ​ໃສ່​ຮ້ານ​ກາເຟ ອິນ​ເຕີ​ເນັດ ແຫ່ງ​ໜຶ່ງ ຢູ່​ໃນ​ພື້ນ​ທີ່​ແຂວງ ຊູ​​ລ​ຕານ ກູ​ດາ​ຣັດ (ພາກ​ໃຕ້​ຟີ​ລິບ​ປິນ) ຊຶ່ງ​ເກີດ​ຂຶ້ນ​ເມື່ອ​ວັນ​ທີ 1 ກັນຍາ​ນີ້. ເຫດການ​ຮຸນ​ແຮງ​ດັ່ງກ່າວ ເກີດ​ຂຶ້ນ​ບໍ່​ພໍ​ເທົ່າໃດ​ວັນ ຫຼັງ​ຈາກ​ເກີດ​ເຫດການ​ວາງ​ລະເບີດ​ເມື່ອ​ວັນ​ທີ 28 ສິງຫາ​ທີ່​ຜ່ານ​ມາ ຢູ່​ໃນ​ພື້ນ​ທີ່​ແຂວງ​ດັ່ງກ່າວ​ເຊັ່ນ​ກັນ ທີ່​ໄດ້​ເປັນ​ເຫດ​ໃຫ້​ມີ​ຜູ້​ເສຍ​ຊີວິດ 3 ຄົນ ແລະ​ບາດເຈັບ​ອີກ 30 ກວ່າ​ຄົນ.

    ສ ອາ​ເມ​ຣິ​ກາ: ວັນ​ທີ 2 ກັນ​​​ຍາ​ນີ້ ນາຍ​ພົນ ອາວ​​ສ​ຕິນ ມີ​ເລີ ໄດ້​ຮັບ​ໜ້າທີ່​ເປັນ​ຜູ້​ບັນຊາ​ການ​ກອງ​ກຳລັງ​ຂອງ ສ ອາ​ເມ​ຣິ​ກາ ຢູ່​ໃນ​ອາ​ຟະ​ກາ​ນິດ​ສະຖານ ກໍ​ຄື​ຄະນະ​ຊ່ວຍເຫຼືອ​ຢ່າງ​ເດັດຂາດ (Resolute Support) ໂດຍ​ແມ່ນ​ອົງການ​ສົນທິສັນຍາ​ປ້ອງ​ກັນ​ອັດ​ລັງ​ຕິກ​ເໜືອ (NATO) ເປັນ​ແກນ​ນຳ​ຢູ່​ໃນ​ອາ​ຟະ​ກາ​ນິດ​ສະຖານ ໂດຍ​ເປັນ​ການ​ແທນ​ທີ່​ນາຍ​ພົນ ຈອນ ນີ​ໂຈລ​ສັນ.

    ສ ອາ​ເມ​ຣິ​ກາ: ເກີດ​ອຸບັດເຫດ​ກຳປັ່ນ 2 ລຳ​ຕຳ​ກັນ ແລະ​ຈົມ​ລົງ​ໃນ​ແມ່ນ້ຳ ໂຄ​ໂລ​ຣາ​ໂດ (ສ ອາ​ເມ​ຣິ​ກາ) ຊຶ່ງ​ເກີດ​ຂຶ້ນ​ເມື່ອ​ວັນ​ທີ 2 ກັນຍາ​ນີ້ ເປັນ​ເຫດ​ໃຫ້​ມີ​ຜູ້​ບາດເຈັບ 9 ຄົນ ແລະ ​ຫານ​ສາບ​ສູນ 4 ຄົນ ຈາກ​ຈຳນວນ​ຜູ້ໂດຍສານ​ທັງ​ໝົດ 16 ຄົນ. ອຸບັດເຫດ​ດັ່ງກ່າວ​ເກີດ​ຂຶ້ນ​ຢູ່​ໃນ​ແມ່ນ້ຳ ໂຄ​ໂລ​ຣາ​ໂດ ໃນ​ຍ່ານ​ທີ່​ເປັນ​ເສັ້ນ​ແບ່ງ​ລະຫວ່າງ​ລັດ ຄາ​ລີ​ຟໍ​ເນຍ ກັບ​ລັດ ອາ​ຣີ​ໂຊ​ນາ.

 

ຂ່າວທີ່ກ່ຽວຂ້ອງ