ຂ່າວຫຼ້າສຸດ

ປົກປ້ອງສຸຂະພາບຜູ້ອອກແຮງງານ ໂດຍການສ້າງຕັ້ງສູນກວດສຸຂະພາບ

260 04 ກ.ຍ. 2018 ຂ່າວໜ້າ​ໜຶ່ງ
ປົກປ້ອງສຸຂະພາບຜູ້ອອກແຮງງານ ໂດຍການສ້າງຕັ້ງສູນກວດສຸຂະພາບ

    ພິ­ທີ​ເຊັນ​ບົດ​ບັນ­ທຶກ​ການ​ຮ່ວມ​ມື​ລະ­ຫວ່າງ​ກົມ​ຄຸ້ມ​ຄອງ​ແຮງ​ງານ ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ແລະ ໂຮງ­ໝໍ​ມິດ­ຕະ­ພາບ ກະ­ຊວງ​ສາ­ທາ­ລະ­ນະ​ສຸກ​ກ່ຽວ​ກັບ​ການ​ດຳ­ເນີນ​ການ​ກວດ​ສຸ­ຂະ­ພາບ​ແຮງ​ງານ​ຢູ່​ລາວ ຈັດ​ຂຶ້ນ​ວັນ​ທີ 31 ສິງ­ຫາ 2018 ທີ່​ໂຮງ­ແຮມ​ຄຣາວ​ພາ​ຊາ ຮ່ວມ​ລົງ​ນາມ​ລະ­ຫວ່າງ​ທ່ານ ພົງ​ໄຊ​ສັກ ອິນ​ຖາ​ລາດ ຫົວ­ໜ້າ​ກົມ​ຄຸ້ມ​ຄອງ​ແຮງ​ງານ ແລະ ທ່ານ ສະ­ໜອງ ທອງ​ຊະ­ນະ ຜູ້­ອຳ­ນວຍ­ການ​ໂຮງ­ໝໍ​ມິດ­ຕະ­ພາບ ມີ​ພະ­ນັກ­ງານ​ທັງ​ສອງ​ຝ່າຍ ແລະ ແຂກ​ຖືກ​ເຊີນ​ເຂົ້າ​ຮ່ວມ.

    ຈາກ​ການ​ຂະ­ຫຍາຍ­ຕົວ​ຂອງ​ພາກ​ອຸດ­ສາ­ຫະ­ກຳ-ກະ­ສິ­ກຳ​ໃນ​ປັດ­ຈຸ­ບັນ ໄດ້​ເພີ່ມ​ຂຶ້ນ​ເລື້ອຍໆ ສະ­ນັ້ນ ຈຶ່ງ​ເຮັດ​ໃຫ້​ຜູ້​ອອກ­ແຮງ​ງານ​ກໍ່​ຄື​ກຳ­ມະ­ກອນ ກໍ່​ມີ​ຈຳ­ນວນ​ເພີ່ມ​ຂຶ້ນ​ຕາມ​ໄປ​ເຊັ່ນ​ດຽວ​ກັນ ເຊິ່ງ​ໄລ­ຍະ​ຜ່ານ​ມາ​ກຳ­ມະ­ກອນ​ທີ່່​ອອກ­ແຮງ​ງານ ຍັງ​ບໍ່​ໄດ້​ຮັບ​ການ​ກວດ​ສຸ­ຂະ­ພາບ​ຢ່າງ​ທົ່ວ​ເຖິງ ເຮັດ​ໃຫ້​ມີ​ການ​ເຈັບ­ເປັນ​ຮ້າຍ​ແຮງ​ຈາກ​ພະ­ຍາດ​ທີ່​ເກີດ​ຂຶ້ນ​ຈາກ​ການ​ອອກ­ແຮງ​ງານ​ບາງ​ກໍ­ລະ­ນີ​ກໍ່​ເຖິງ​ແກ່​ຊີ­ວິດ ໂດຍ​ອີງ­ໃສ່​ກົດ­ໝາຍ​ແຮງ​ງານ​ຂອງ​ລາວ ທີ່​ລະ­ບຸ​ໄວ້​ວ່າ​ກຳ­ມະ­ກອນ​ຜູ້​ອອກ­ແຮງ​ງານ ຈະ​ຕ້ອງ​ໄດ້​ຖືກ​ປົກ​ປ້ອງ​ສຸ­ຂະ­ພາບ​ດ້ວຍ​ການ​ກວດ ແລະ ປິ່ນ­ປົວ​ຕາມ​ຫຼັກ​ວິ­ຊາ​ການ​ທາງ​ດ້ານ​ການ​ແພດ.

    ເພື່ອ​ອຳ­ນວຍ​ຄວາມ​ສະ­ດວກ​ໃຫ້​ແກ່​ຊາວ​ຜູ້​ອອກ­ແຮງ​ງານ​ທັງ​ພາຍ​ໃນ ແລະ ຕ່າງ­ປະ­ເທດ​ໃຫ້​ໄດ້​ຮັບ​ການ​ກວດ​ສຸ­ຂະ­ພາບ​ກ່ອນ​ເຂົ້າ​ບັນ­ຈຸ​ເປັນ​ກຳ­ມະ­ກອນ​ໃນ​ໂຮງ­ງານ ຫຼື ກວດ​ສຸ­ຂະ­ພາບ​ເປັນ​ປະ­ຈຳ​ໃນ​ທຸກ​ປີ ດັ່ງ­ນັ້ນ ກົມ​ຄຸ້ມ​ຄອງ​ແຮງ​ງານ ແລະ ໂຮງ­ໝໍ​ມິດ­ຕະ­ພາບ ຈຶ່ງ​ໄດ້​ຮ່ວມ​ມື​ກັນ​ສຶກ​ສາ​ຄວາມ​ເປັນ​ໄປ​ໄດ້ ໃນ​ການ​ສ້າງ​ສູນ​ກວດ​ສຸ­ຂະ­ພາບ​ແຮງ​ງານ​ດັ່ງ­ກ່າວ​ຂຶ້ນ ໂດຍ​ພາຍ­ຫຼັງ​ກະ­ກຽມ ແລະ ສຶກ​ສາ​ຄວາມ​ເປັນ​ໄປ​ໄດ້​ແລ້ວ ໃຫ້​ສອງ​ຝ່າຍ​ຮ່ວມ​ມື​ກັນ​ຈັດ​ຕັ້ງ​ສູນ​ກວດ​ສຸ­ຂະ­ພາບ​ແຮງ​ງານ​ໃຫ້​ບັນ­ລຸ​ຜົນ­ສຳ­ເລັດ.

ຂ່າວທີ່ກ່ຽວຂ້ອງ