ຂ່າວຫຼ້າສຸດ

ວລ ລັດຕະນະ ມີແຜນຮອງຮັບນັກສຶກສາ ສົກຮຽນນີ້ 700 ຄົນ

206 04 ກ.ຍ. 2018 ຂ່າວໜ້າ​ໜຶ່ງ
ວລ ລັດຕະນະ ມີແຜນຮອງຮັບນັກສຶກສາ ສົກຮຽນນີ້ 700 ຄົນ

    ທ່ານ​ນາງ ທອງ​ປານ ພົມ­ມາ​ລາ ຮອງ​ຜູ້­ອຳ­ນວຍ­ການ​ວິ­ທະ­ຍາ­ໄລ​ລັດ­ຕະ­ນະ​ບໍ­ລິ­ຫານ​ທຸ­ລະ​ກິດ ໃຫ້​ສຳ­ພາດ​ວັນ​ທີ 29 ສິງ­ຫາ 2018 ວ່າ: ວິ­ທະ­ຍາ­ໄລ​ລັດ­ຕະ­ນະ​ບໍ­ລິ­ຫານ​ທຸ­ລະ​ກິດ ເປັນ​ສະ​ຖາ​ບັນ​ການ​ສຶກ​ສາ​ພາກ​ເອ­ກະ​ຊົນ ສ້າງ­ຕັ້ງ​ປີ 1974 ເວ­ລາ​ນັ້ນ​ເອີ້ນ​ວ່າ​ໂຮງ­ຮຽນ​ການ​ຄ້າ ມາ​ຮອດ​ປີ 1994 ໄດ້​ຍົກ​ລະ­ດັບ​ຂຶ້ນ​ເປັນ​ວິ­ທະ­ຍາ­ໄລ ມີ​ສະ­ຖານ­ທີ່​ຕັ້ງ​ຢູ່​ບ້ານ​ສະ­ພານ​ທອງ​ກາງ ເມືອງ​ສີ​ສັດ­ຕະ​ນາກ ນະ­ຄອນ­ຫຼວງ​ວຽງ​ຈັນ ປັດ­ຈຸ­ບັນ​ໄດ້​ຂະ­ຫຍາຍ​ສາ­ຂາ​ວິ­ທະ­ຍາ​ເຂດ​ຕັ້ງ​ຢູ່​ເມືອງ​ນາ​ຊາຍ​ທອງ ແຂວງ​ອຸ­ດົມ​ໄຊ ແລະ ແຂວງ​ໄຊ​ຍະ​ບູ​ລີ ໂດຍ​ໃຊ້​ຫຼັກ­ສູດ​ອັນ​ດຽວ​ກັນ​ໃນ​ການ​ສິດ­ສອນ ນັບ​ແຕ່​ກະ­ຊວງ​ສຶກ​ສາ​ທິ​ການ ແລະ ກີ­ລາ​ໄດ້​ມີ​ການ​ປະ­ຕິ​ຮູບ​ການ​ສຶກ​ສາ​ໃໝ່ (ສົກ­ຮຽນ 2013-2014) ໄດ້​ມີ​ການ​ໂຈະ​ການ​ຮຽນ-ການ​ສອນ​ຊັ້ນ​ປະ­ລິນ­ຍາ​ຕີ ແລະ ປະ­ລິນ­ຍາ​ໂທ ໃຫ້​ຍັງ​ເຫຼືອ​ແຕ່​ລະ­ບົບ​ຊັ້ນ​ສູງ (ວິ­ຊາ​ຊີບ​ຊັ້ນ​ສູງ) ຈົນ​ມາ​ຮອດ​ປັດ­ຈຸ­ບັນ.

    ສະ​ຖາ​ບັນ​ການ​ສຶກ​ສາ​ແຫ່ງ​ນີ້ ໄດ້​ນຳ​ໃຊ້​ຫຼັກ­ສູດ​ບໍ­ລິ­ຫານ​ທຸ­ລະ​ກິດ​ເຂົ້າ​ໃນ​ການ​ຮຽນ-ການ​ສອນ 6 ພາກ​ວິ­ຊາ​ຄື: ບໍ­ລິ­ຫານ​ທົ່ວ​ໄປ ການ​ເງິນ ແລະ ການ​ທະ­ນາ­ຄານ ການ​ຕະ­ຫຼາດ ບັນ­ຊີ ເຕັກ​ໂນ​ໂລ​ຊີ​ຂໍ້​ມູນ​ຂ່າວ­ສານ ແລະ ພາ­ສາ​ອັງ­ກິດ​ທຸ­ລະ​ກິດ ເປັນ​ສະ​ຖາ​ບັນ​ໜຶ່ງ​ທີ່​ຊ່ວຍ​ພາກ​ລັດ​ໃນ​ການ​ສ້າງ​ຊັບ­ພະ­ຍາ­ກອນ​ມະ­ນຸດ​ອອກ​ຮັບ​ໃຊ້​ສັງ­ຄົມ ສົກ­ຮຽນ 2018-2019 ວິ­ທະ­ຍາ­ໄລ​ມີ​ແຜນ​ຮັບ​ນັກ​ສຶກ​ສາ 700 ຄົນ ໂດຍ​ແບ່ງ​ເປັນ 2 ຊຸດ ຄື: ຊຸດ​ທີ 1 ວັນ​ທີ 1 ກໍ­ລະ­ກົດ-30 ສິງ­ຫາ 2018 ສອບ­ເສັງ​ວັນ​ທີ 31 ສິງ­ຫາ 2018 ປະ­ກາດ​ຜົນ​ວັນ​ທີ 2 ກັນ­ຍາ 2018 ລົງ­ທະ­ບຽນ​ເຂົ້າ​ຮຽນ​ວັນ​ທີ 8 ກັນ­ຍາ 2018 ຊຸດ​ທີ 2 ຮັບ​ສະ­ໝັກ​ວັນ​ທີ 1-27 ກັນ­ຍາ 2018 ສອບ­ເສັງ​ວັນ​ທີ 28 ກັນ­ຍາ 2018 ລົງ­ທະ­ບຽນ​ຮຽນ​ວັນ​ທີ 3 ຕຸ­ລາ 2018 ເພື່ອ​ຮອງ​ຮັບ​ເອົາ​ນັກ​ສຶກ​ສາ​ທີ່​ຕົກ​ຫຼົ່ນ ເຊິ່ງ​ວິ­ທະ­ຍາ­ໄລ​ແຫ່ງ​ນີ້​ຕ້ອນ­ຮັບ​ນັກ​ສຶກ​ສາ​ທຸກ​ຄົນ ແລະ ສົກ­ຮຽນ​ໃໝ່​ນີ້ ກໍ່​ໄດ້​ມີ​ການ​ກະ­ກຽມ​ຄວາມ​ພ້ອມ​ທຸກ​ດ້ານ ເປັນ­ຕົ້ນ​ຫຼັກ​ສູນ​ການ​ຮຽນ-ການ​ສອນ ປື້ມ​ຕຳ­ລາ​ຮຽນ ບຸ​ຄະ­ລາ​ກອນ​ທີ່​ບັນ­ຈຸ​ເຂົ້າ​ໃນ​ການ​ສິດ­ສອນ ແລະ ອື່ນໆ.

ຂ່າວທີ່ກ່ຽວຂ້ອງ