ຂ່າວຫຼ້າສຸດ

EU ໃຫ້​ເງິນ​ຊ່ວຍເຫຼືອ​ເວ​ເນ​ຊູ​ເອ​ລາ ແກ້​ໄຂ​ວິ​ກິດ​ການ

324 04 ກ.ຍ. 2018 ຂ່າວຕ່າງປະເທດ
EU ໃຫ້​ເງິນ​ຊ່ວຍເຫຼືອ​ເວ​ເນ​ຊູ​ເອ​ລາ ແກ້​ໄຂ​ວິ​ກິດ​ການ

     ເມື່ອ​ວັນ​ທີ 31 ສິງຫາ​ທີ່​ຜ່ານ​ມາ ສະຫະພາບ​ເອີ​ຣົບ (EU) ໄດ້​ປະກາດ​ບ້ວງ​ເງິນ​ຊ່ວຍເຫຼືອ  35 ລ້ານ​ເອີ​ໂຣ (ເທົ່າ​ກັບ​ປະມານ 41 ລ້ານ​ໂດ​ລາ​ສະຫະລັດ) ເພື່ອ​ໃຫ້​ຄວາມ​ຊ່ວຍເຫຼືອ​ເວ​ເນ​ຊູ​ເອ​ລາ ຫຼຸດຜ່ອນ​ຜົນ​ກະທົບ​ໃນ​ທາງ​ລົບ ຂອງ​ວິ​ກິດ​ການ​ເສດຖະກິດ​ພາຍ​ໃນ​ປະເທດ ຊຶ່ງ​ເປັນ​ສາເຫດ​ເຮັດ​ໃຫ້​ເກີດ​ກະແສ​ຜູ້​ອົບ​ພະ​ຍົບ​ອອກ​ຈາກ​ເວ​ເນ​ຊູ​ເອ​ລາ ໄປ​ຍັງ​ບັນດາ​ປະເທດ​ໃກ້​ຄຽງ.

    ນາງ ເຟ​ເດຣີ​ກາ ໂມ​ເກຣີ​ນີ ຜູ້​ແທນ​ລະດັບ​ສູງ ກ່ຽວ​ກັບ​ນະໂຍບາຍ​ຄວາມ​ໝັ້ນຄົງ ແລະ​ພົວພັນ​ກັບ​ຕ່າງປະເທດ​ຂອງ EU ກ່າວ​ຕໍ່​ລັດຖະມົນຕີ​ການ​ຕ່າງປະເທດ​ຂອງ​ບັນດາ​ປະເທດ​ສະມາຊິກ EU ຢູ່​ທີ່​ນະຄອນຫຼວງ​ວຽນ (ປະເທດ​ໂອ​ຕຣິດ) ວ່າ EU ໄດ້​ຮັບຮອງ​ບ້ວງ​ເງິນ​ຊ່ວຍເຫຼືອ​ມະນຸດສະທຳ ມູນ​ຄ່າ 35 ລ້ານ​ເອີ​ໂຣ ເພື່ອ​ຊ່ວຍເຫຼືອ​ປະຊາຊົນ​ເວ​ເນ​ຊູ​ເອ​ລາ ທີ່ຢູ່​ໃນ​ປະເທດ ກໍ​ຄື​ຢູ່​ໃນ​ບັນດາ​ປະເ​​ທດ​ໃກ້​ຄຽງ ແລະ​ບັນດາ​ຊຸມ​ຊົນ ທີ່​ຮັບ​ເອົາ​ຊາວ​ເວ​ເນ​ຊູ​ເອ​ລາ.

    ນາງ ໂມ​ເກຣີ​ນີ ໃຫ້​ຮູ້​ວ່າ ເງິນ​ຊ່ວຍເຫຼືອ​ດັ່ງກ່າວ ຕົ້ນຕໍ​ແມ່ນ​ໃຊ້​ເຂົ້າ​ໃນ​ໂຄງການ​ສະໜອງ​ໂພ​ສະ​ນາ​ການ ນ້ຳ ສາທາລະນະ​ສຸກ ແລະ​ຊ່ວຍເຫຼືອ​ຜູ້​ທີ່​ຮັບ​ຄວາມ​ເສຍ​ຫາຍ​ໄດ້​ງ່າຍ​ທີ່​ສຸດ​ຢູ່​ໃນ​ເວ​ເນ​ຊູ​ເອ​ລາ.

    ນັບ​ແຕ່​ປີ 2015 ເປັນຕົ້ນ​ມາ ຊາວ​ເວ​ເນ​ຊູ​ເອ​ລາ 1,6 ລ້ານ​ກວ່າ​ຄົນ ໄດ້​ໜີ​ອອກ​ໄປ​ຈາກ​ປະເທດ​ຊາດ ເພື່ອ​ໃຫ້​ພົ້ນ​ຈາກ​ວິ​ກິດ​ການ​ການເມືອງ ເສດຖະກິດ ແລະ ສັງຄົມ​ທີ່​ຮ້າຍ​ແຮງ​ຢູ່​ໃນ​ປະເທດ​ນີ້ ໃນ​ນັ້ນ​ສ່ວນ​ຫຼາຍ​ແມ່ນ​​​ຊອກ​ຫາ​ວິທີ​ຕັ້ງ​ຖິ່ນ​ຖານ​ຢູ່​ໃນ​ບັນດາ​ປະເທດ​ໃກ້​ຄຽງ.

    ສະຖິຕິ ຊີ້​ໃຫ້​ເຫັນ​ວ່າ ປັດຈຸບັນ​ນີ້ ມີ​ຊາວ​ເວ​ເນ​ຊູ​ເອ​ລາ​ປະມານ 1 ລ້ານ​ຄົນ ອາ​ໃສ​ຢູ່​ໃນ​ປະເທດ​ໂກ​ລົມ​ບີ; 400.000 ກວ່າ​ຄົນ ດຳລົງ​ຊີວິດ​ຢູ່​ໃນ​ປະເທດ​ເປ​ຣູ ໃນ​ນີ້​ມີ​ພຽງ 178.000 ຄົນ ອາ​ໃສ​ຢູ່​ຢ່າງ​ຖືກຕ້ອງ​ຕາມ​ກົດໝາຍ ຫຼື​ບໍ່​ກໍ​ພວມ​ຂໍ​ອາ​ໃສ​ຢູ່.

 

ຂ່າວທີ່ກ່ຽວຂ້ອງ