ການ​ສົ່ງ​ອອກ​ນ້ຳມັນ​ຂອງ​ອີ​ຣັກ ບັນລຸ​ລະດັບ​ສູງ​ເປັນ​ປະຫວັດ​ການ

136 04 ກ.ຍ. 2018 ຂ່າວຕ່າງປະເທດ
ການ​ສົ່ງ​ອອກ​ນ້ຳມັນ​ຂອງ​ອີ​ຣັກ ບັນລຸ​ລະດັບ​ສູງ​ເປັນ​ປະຫວັດ​ການ

     ກະຊວງ​ນ້ຳມັນ​ຂອງ​ອີ​ຣັກ ແຈ້ງ​ໃຫ້​ຮູ້​ວ່າ  ການ​ສົ່ງ​ອອກ​ນ້ຳມັນ​ດິບ​ຂອງ​ອີ​ຣັກ ໃນ​ເດືອນ​ສິງຫາ​ທີ່​ຜ່ານ​ມາ ບັນລຸ​ເກືອບ 112 ລ້ານ ບາ​ເຣນ ນັບ​ວ່າ​ເປັນ​ລະດັບ​ສູງ​ສຸດ ນັບ​ແຕ່​ຕົ້ນ​ປີ 2018 ເປັນຕົ້ນ​ມາ ແລະ​ນຳ​ມາ​ຊຶ່ງ​ລາຍ​ຮັບ 7,7 ຕື້​ໂດ​ລາ​ສະຫະລັດ ໃຫ້​ແກ່​ພື້ນຖານ​ເສດຖະກິດ​ອີ​ຣັກ ທີ່​ພວມ​ປະ​ເຊີນ​ກັບ​ຄວາມ​ຫຍຸ້ງຍາກ​ຢູ່​ນັ້ນ.

    ລາຄາ​ນ້ຳມັນ​ດິບ​ສົ່ງ​ອອກ​ຂອງ​ອີ​ຣັກ ໃນ​ເດືອນ​ສິງຫາ ປີ 2018 ໂດຍ​ສະເລ່ຍ​ບັນລຸ​ທີ່ 69,59 ໂດ​ລາ​ສະຫະລັດ/ບາ​ເຣນ ໃນ​ຂະນະ​ທີ່​ໃນ​ເດືອນ​ສິງຫາ ປີ 2017 ອີ​ຣັກ​ສົ່ງ​ອອກ​ນ້ຳມັນ​ດິບ​ໄດ້ 99,7 ລ້ານ​ບາ​ເຣນ ແລະ​ນຳ​ມາ​ຊຶ່ງ​ລາຍ​ຮັບ​ຈາກ​ນ້ຳມັນ 4,6 ຕື້​ໂດ​ລາ​ສະຫະລັດ.

   ການ​ສົ່ງ​ອອກ​ນ້ຳມັນ ເປັນ​ແຫຼ່ງ​ລາຍ​ຮັບ​ເງິນຕາ​ຕ່າງປະເທດ​ພຽງ​ລາຍການ​ດຽວ​ຂອງ​ອີ​ຣັກ ແລະ​ໄດ້​ນຳ​ມາ​ຊຶ່ງ​ລາຍ​ຮັບ​ໃຫ້​ແກ່​ງົບປະມານ​ຂອງ​ປະເທດ​ນີ້​ກ່ວ​​າ 60 ຕື້​ໂດ​ລາ​ສະຫະລັດ ນັບ​ແຕ່​ເດືອນ​ມັງກອນ ປີ 2018 ເປັນຕົ້ນ​ມາ.

    ອີ​ຣັກ​ມີ​ປະລິມານ​ການ​ຜະລິດ​ນ້ຳມັນ​ສູງ​ເປັນ​ອັນ​ດັບ​ສອງ ຢູ່​ໃນ​ບັນດາ​ປະເທດ​ສະມາຊິກ​ຂອງ​ອົງການ​ບັນດາ​ປະເທດ​ຜູ້​ສົ່ງ​ອອກ​ນ້ຳມັນ (OPEC) ໂດຍ​ຢູ່​ທີ່​ປະມານ 4,5 ລ້ານ​ບາ​ເຣນ/ວັນ.

    ກ່ອນ​ໜ້າ​ນັ້ນ ເມື່ອ​ເດືອນ​ມິຖຸນາ ປີ 2018 ຫຼາຍ​ປະເທດ​ຜູ້​ສົ່ງ​ອອກ​ນ້ຳມັນ​ລາຍ​ໃຫຍ່​ທີ່​ຂຶ້ນ​ກັບ OPEC ແລະ​ຣັດ​ເຊຍ ໄດ້​ເຫັນ​ດີ​ເປັນ​ເອກະສັນ​ກັນ ກ່ຽວ​ກັບ​ການ​ເພີ່ມ​ປະລິມານ​ການ​ຜະລິດ​ນ້ຳມັນ​ດິບ ທ່າມກາງ​ທີ່​ລາຄາ​ນ້ຳມັນ​ໃນ​ຕະຫຼາດ​ໂລກ ມີ​ບາງ​ເວລາ​ແຕະ​ແດນ 80 ໂດ​ລາ​ສະຫະລັດ/ບາ​ເຣນ ຊຶ່ງ​ເປັນ​ລະດັບ​ສູງ​ສຸດ ນັບ​ແຕ່​ປີ 2014 ເປັນຕົ້ນ​ມາ.

 

ຂ່າວທີ່ກ່ຽວຂ້ອງ