ຂ່າວຫຼ້າສຸດ

ໄມໂຄຣຊອຟ ພັດທະນາຮ້ານຄ້າ ໂດຍບໍ່ໃຊ້ພະນັກງານຄິດໄລ່ເງິນ ຕັ້ງເປົ້າແຂ່ງອາເມຊອນໂກ

144 04 ກ.ຍ. 2018 ຫົວຂໍ້ຂ່າວອື່ນໆ

    ບໍ­ລິ­ສັດ​ຄອມ​ພິວ​ເຕີ ໄມ​ໂຄຣ​ຊອຟ (Microsoft Corp) ກຳ­ລັງ​ພັດ­ທະ­ນາ​ເຕັກ​ໂນ​ໂລ​ຊີ​ທີ່​ຈະ​ນຳ­ໄປ​ສູ່​ຮ້ານ​ຄ້າ ທີ່​ບໍ່​ຕ້ອງ​ມີ​ພະ­ນັກ­ງານ​ຄິດ­ໄລ່​ເງິນ ຊຶ່ງ​ເປັນ​ຮ້ານ​ແບບ​ດຽວ​ກັບ​ອາ​ເມ​ຊອນ ໂກ (Amazon Go) ຂອງ Amazon ທີ່​ເປິດ​ຕົວ​ໄປ​ກ່ອນ​ໜ້າ​ນີ້​ບໍ່​ນານ ຕາມ​ລາຍ​ງານ​ຂອງ​ສຳ­ນັກ​ຂ່າວ ຣອຍ​ເຕີ ຊຶ່ງ​ອ້າງ​ອີງ​ຈາກ​ແຫຼ່ງ​ຂ່າວ​ຫຸກ​ຄົນ​ຜູ້​ໃກ້­ຊິດ​ກັບ​ໄມ​ໂຄຣ​ຊອຟ.

    ລາຍ​ງານ​ເປິດ​ເຜີຍ​ວ່າ ໄມ​ໂຄຣ​ຊອຟ ກຳ­ລັງ​ພັດ­ທະ­ນາ​ລະ­ບົບ​ກວດ​ຈັບ​ສິນ­ຄ້າ​ທີ່​ລູກ​ຄ້າ​ຢິບ ອອກ​ຈາກ​ຊັ້ນ​ວາງ​ສິນ​ແລ້ວ​ໃສ່​ໃນ​ລົດ​ເຂັນ ໂດຍ​ໄດ້​ມີ​ການ​ສາ­ທິດ ເຕັກ​ໂນ​ໂລ​ຊີ​ຕົວ­ຢ່າງ ໃຫ້​ກັບ​ຮ້ານ​ຄ້າ​ຍ່ອຍ​ໃນ​ຫຼາຍ​ປະ­ເທດ​ໄປ​ແລ້ວ ນອກ­ຈາກ​ນີ້ ຍັງ​ໄດ້​ມີ​ການ​ເຈລະ­ຈາ​ກັບ​ຮ້ານ​ຄ້າ​ຍ່ອຍ​ລາຍ​ໃຫຍ່​ທີ່​ສຸດ ໃນ​ສະ­ຫະ­ລັດ​ອາ​ເມ​ຣິ​ກາ ວອລ​ມາດ (Walmart) ກ່ຽວ​ກັບ​ໂອ­ກາດ​ທີ່​ຈະ​ເກີດ​ຄວາມ​ຮ່ວມ​ຫວ່າງ​ທັງ​ສອງ​ບໍ­ລິ­ສັດ​ໃນ​ອະ­ນາ­ຄົດ.

    ກ່ອນ​ໜ້າ​ນີ້ ອາ​ເມ​ຊອນ​ຫາ­ກໍ່​ເປິດ​ຕົວ​ຮ້ານ​ຄ້າ​ລະ­ບົບ​ອັດ­ຕະ­ໂນ­ມັດ Amazon Go ທີ່​ນະ­ຄອນ ຊີ​ແອດ​ເຕິນ ລັດ​ວໍ​ຊິງ​ຕັນ ໃຫ້​ລູກ​ຄ້າ​ທົ່ວ​ໄປ​ທົດ​ລອງ​ໃຊ້ ເມື່ອ​ເດືອນ​ມັງ­ກອນ ແລະ ມີ​ແຜນ​ຈະ​ເປິດ​ອີກ​ສອງ​ແຫ່ງ​ທີ່​ນະ­ຄອນ ຊານ​ຟຣານ​ຊິ​ສ​ໂກ ແລະ ນະ­ຄອນ​ຊິ​ຄາ​ໂກ ຢ່າງ­ໃດ​ກໍ່​ຕາມ ກະ­ແສ​ຕອບ​ຮັບ​ຕໍ່​ຮ້ານ Amazon Go ມີ​ທັງ​ທາງ​ບວກ ແລະ ລົບ​ເທົ່າໆ​ກັນ.

    ຮ້ານ​ຄ້າ​ລ້ຳ​ຍຸກ​ດັ່ງ­ກ່າວ ເຮັດ​ໃຫ້​ບໍ­ລິ­ສັດ​ເຕັກ​ໂນ​ໂລ​ຊີ ຄູ່​ແຂ່ງ​ຫັນ​ມາ​ພັດ­ທະ­ນາ​ໃຫ້​ຄວາມ​ສົນ­ໃຈ​ກັບ​ຮ້ານ​ຄ້າ​ອັດ­ຕະ­ໂນ­ມັດ​ຫຼາຍ​ຂຶ້ນ ໂດຍ​ໄມ​ໂຄຣ​ຊອຟ ໄດ້​ດຶງ​ຕົວ​ຜູ້​ຊ່ຽວ­ຊານ​ດ້ານ​ວິ​ຊັ່ນ​ຄອມ​ພິວ​ເຕີ​ມາ​ຈາກ Amazon Go ເພື່ອ​ພັດ­ທະ­ນາ​ລະ­ບົບ​ກ້ອງ​ຕິດ​ລົດ​ເຂັນ ແລະ ລະ­ບົບ​ເຊັນ​ເຊີ​ກວດ​ຈັບ​ອື່ນໆ ແຕ່​ກໍ່​ຍັງ​ບໍ່​ຊັດ​ເຈນ​ວ່າ ໄມ​ໂຄຣ​ຊອຟ ຈະ​ເລີ່ມ​ໃຊ້​ບໍ­ລິ­ການ​ຄິດ­ໄລ່​ເງິນ​ອັດ­ຕະ­ໂນ­ມັດ​ນີ້​ເມື່ອ​ໃດ ແລະ ໃນ​ຮູບ​ແບບ​ໃດ.

    ນັກ​ວິ­ເຄາະ​ດ້ານ​ການ​ຕະ­ຫຼາດ​ເຊື່ອ​ວ່າ ຕະ­ຫຼາດ​ຂອງ​ລະ­ບົບ​ຄິດ­ໄລ່​ເງິນ​ອັດ­ຕະ­ໂນ­ມັດ​ນີ້ ຈະ​ມີ​ມູນ​ຄ່າ​ປະ­ມານ 50.000 ລ້ານ​ໂດ​ລາ ໃນ​ອະ­ນາ­ຄົດ​ແຕ່​ກໍ່​ອາດ​ເກີດ​ການ​ຕໍ່­ຕ້ານ​ໂດຍ​ບັນ­ດາ​ພະ­ນັກ­ງານ​ຄິດ­ໄລ່​ເງິນ ຊຶ່ງ​ຖື​ເປັນ​ໜຶ່ງ​ໃນ​ອາ­ຊີບ​ຍອດ​ນິ­ຍົມ​ທີ່​ສຸດ​ໃນ​ອາ​ເມ​ຣິ​ກາ.

ຂ່າວທີ່ກ່ຽວຂ້ອງ