ເບິ່ງບ້ານເຂົາເອົາບົດຮຽນ 04/09/2018

229 04 ກ.ຍ. 2018 ຫົວຂໍ້ຂ່າວອື່ນໆ

    ຄໍ​ລຳ​ປະ­ຈຳ​ວັນ​ນີ້ ມີ​ຂ່າວ​ກ່ຽວ​ກັບ​ການ​ປັບ­ປຸງ​ບັນ­ຊີ​ພັນ​ພືດ-ພັນ​ສັດ​ສະ­ຫງວນ​ຢູ່ ອິນ​ໂດ​ເນ​ເຊຍ ແລະ ການ​ຢຸດ​ອອກ​ໃບ​ອະ­ນຸ­ຍາດ​ສ້າງ​ສູນ​ການ​ພະ­ນັນ (ກາ­ສີ​ໂນ) ຢູ່ ຟີ​ລິບ​ປິນ.

    ທີ່ ອິນ​ໂດ​ເນ​ເຊຍ: ໃນ​ເດືອນ​ກໍ­ລະ­ກົດ​ປີ​ນີ້ ທາງ​ກະ­ຊວງ​ສິ່ງ­ແວ­ດລ້ອມ ແລະ ປ່າ­ໄມ້ ອິນ​ໂດ​ເນ​ເຊຍ ໄດ້​ແຈ້ງ​ບັນ­ຊີ​ໃໝ່​ກ່ຽວ​ກັບ​ພັນ​ພືດ ແລະ ພັນ​ສັດ​ປະ­ເພດ​ຕ້ອງ​ໄດ້​ປົກ​ປັກ​ຮັກ­ສາ​ໃຫ້​ຍືນ​ຍົງ ພັນ​ພືດ ແລະ ພັນ​ສັດ ສະ­ຫງວນ​ໃນ​ບັນ­ຊີ​ໃໝ່​ນີ້ ມີ​ທັງ​ໝົດ 921 ຊະ­ນິດ ເພີ່ມ​ຈາກ 294 ຊະ­ນິດ ໃນ​ບັນ­ຊີ​ທີ່​ປະ­ກາດ​ໃຊ້ ໃນ​ປີ 1999 ການ​ເພີ່ມ​ຂຶ້ນ​ຢ່າງ​ກະ­ໂດດ​ຂັ້ນ​ຂອງ​ພັນ​ພືດ-ພັນ​ສັດ​ສະ­ຫງວນ​ໃນ​ໄລ­ຍະ​ພຽງ 19 ປີ​ນີ້ ເປັນ​ຜົນ​ມາ​ຈາກ​ການ​ສຶກ​ສາ​ຄົ້ນ­ຄວ້າ​ທີ່​ເລີ່ມ​ຂຶ້ນ​ໃນ​ປີ 2007 ແລະ ຄັ້ງ​ສຸດ​ທ້າຍ ໃນ​ປີ 2015 ທ່ານ​ນາງ ອິນ​ດຼາ (Indra) ຫົວ­ໜ້າ​ກົມ​ອະ­ນຸ​ຮັກ​ຊີ­ວະ​ນາໆພັນ ກະ­ຊວງ​ສິ່ງ­ແວ­ດລ້ອມ ແລະ ປ່າ­ໄມ້ ມີ​ຄຳ​ເຫັນ​ກ່ຽວ​ກັບ​ເລື່ອງ​ນີ້​ວ່າ​ບັນ­ຊີ​ພັນ​ພືດ ແລະ ພັນ​ສັດ​ສະ­ຫງວນ​ທີ່​ເພີ່ມ​ຂຶ້ນ​ນີ້ ຈະ​ເຮັດ​ໃຫ້­ການ​ຄຸ້ມ​ຄອງ​ມີ​ຄວາມ​ຍືນ​ຍົງ​ບັນ­ຊີ​ໃໝ່​ນີ້ ໄດ້​ບັນ­ຈຸ​ເອົາ​ນົກ​ຫຼາຍໆ​ຊະ­ນິດ​ເຂົ້າ​ຕື່ມ ເຊັ່ນ: ນົກ​ເກ​ນາ​ຣີ ເມ​ລາ​ຢູ (ປະ­ເພດ​ນົກ​ຈອກ ແຕ່​ຮ້ອງ​ສຽງ​ຫວານ) ນົກ​ເກ​ລາ ຕິກ​ຈາ​ວາ (ນົກ​ແກ້ວ​ພັນ​ຈາ​ວາ) ນົກ​ກາ ກາ­ມາ ຕາ​ຈາ​ວາ (ນົກ​ຕາ­ຂາວ​ພັນ​ຈາ​ວາ) ແລະ ອື່ນໆ ທີ່​ຕ້ອງ​ໄດ້​ຈັດ​ນົກ​ເຫຼົ່າ​ນີ້​ເຂົ້າ​ບັນ­ຊີ​ສະ­ຫງວນ ກໍ່​ເພາະ­ວ່າ​ພວກ​ມັນ​ມີ​ເອ­ກະ­ລັກ​ສະ­ເພາະ​ເປັນ​ພິ­ເສດ ຄື: ຮ້ອງ​ມ່ວນ ມີ​ສີ­ສັນ​ງາມ​ສະ­ດຸດ​ຕາ ແລະ ເປັນ​ທີ່​ນິ­ຍົມ​ລ້ຽງ​ໄວ້​ໃນ​ຄົວ​ເຮືອນ​ຂອງ​ຊາວ​ເກາະ​ຈາ​ວາ​ເປັນ​ສ່ວນ​ໃຫຍ່ ດັ່ງ­ນັ້ນ ຖ້າ​ບໍ່​ອະ­ນຸ​ຮັກ​ມັນ​ກໍ່​ຈະ​ກາຍ­ເປັນ​ສິນ­ຄ້າ ຊື້-ຂາຍ​ກັນ​ຈົນ​ກ້ຽງ​ປ່າ.

    ມາດ­ຕາ 5 ຂອງ​ຂໍ້​ກຳ­ນົດ​ຂອງ​ລັດ­ຖະ­ບານ ເລກ​ທີ 7 ສະ­ບັບ ປີ 1999 ໄດ້​ລະ­ບຸ​ວ່າ ພັນ​ພືດ ແລະ ພັນ​ສັດ ທີ່​ເປັນ​ເອ­ກະ­ລັກ​ພິ­ເສດ​ຂອງ​ປະ­ເທດ ທີ່​ມີ​ຈຳ­ນວນ​ໜ້ອຍ ຫຼື ມີ​ທ່າ​ອ່ຽງ​ຫຼຸດ​ນ້ອຍ​ຖອຍ​ລົງ​ນັ້ນ ຕ້ອງ​ໄດ້​ຮັບ​ການ​ອະ­ນຸ​ຮັກ​ນັບ​ແຕ່​ນີ້​ຕໍ່​ໄປ ພັນ​ພືດ-ພັນ​ສັດ ທີ່​ບຸກ­ຄົນ​ສາ­ມາດ​ຊື້​ມາ​ປູກ-ມາ​ລ້ຽງ​ໄວ້​ປະ­ຈຳ​ຄົວ​ເຮືອນ ຕ້ອງ​ໄດ້​ຜ່ານ​ການ​ພິ­ຈາ­ລະ­ນາ​ເຫັນ​ດີ​ຈາກ​ທາງ​ການ​ກ່ຽວ­ຂ້ອງ​ກ່ອນ.

    ຂ່າວ​ໃຫ້​ຮູ້​ຕື່ມ​ວ່າ: ພັນ​ພືດ-ພັນ​ສັດ ໃນ​ບັນ­ຊີ​ສະ­ຫງວນ ປີ 1999 ຈຳ­ນວນ​ໜຶ່ງ ໄດ້​ຖືກ​ລຶບ​ອອກ​ຈາກ​ບັນ­ຊີ​ຊຸດ​ປັດ­ຈຸ­ບັນ ລວມ​ທັງ​ໄມ້​ເນື້ອ​ແຂງ ຈຳ­ນວນ 13 ຊະ­ນິດ ທ່ານ​ນາງ ອິນ​ດຼາ ບອກ​ກ່ຽວ​ກັບ​ເລື່ອງ​ນີ້​ວ່າ: ບັນ­ຊີ​ສະ­ຫງວນ​ພັນ​ພືດ-ພັນ​ສັດ​ນີ້ ສາ­ມາດ​ມີ​ການ​ປ່ຽນ­ແປງ​ໄດ້​ຕາມ​ເງື່ອນ­ໄຂ​ການ​ເພີ່ມ​ຂຶ້ນ ຫຼື ຫຼຸດ​ລົງ​ຂອງ​ພັນ​ພືດ-ພັນ​ສັດ​ຊະ­ນິດ​ນັ້ນໆ.

    ທີ່ ຟີ​ລິບ​ປິນ: ໜັງ­ສື­ພິມ​ວຽງ​ຈັນ​ທາມ ສະ­ບັບ​ວັນ​ທີ 9 ເດືອນ​ສິງ­ຫາ​ປີ​ນີ້ ໃຫ້​ຮູ້​ວ່າ ທ່ານ ໂຣ​ດຼິ​ໂກ ດູ​ເຕັກ​ເຕ ປະ​ທາ​ນາ​ທາ​ທິ​ບໍ­ດີ​ຟີ​ລິບ​ປິນ ໄດ້​ປະ­ກາດ​ຢຸດ​ການ​ອະ­ນຸ­ຍາດ​ໃຫ້​ສ້າງ­ຕັ້ງ​ກາ​ຊີ​ໂນ (ສູນ​ການ​ພະ­ນັນ) ແຫ່ງ​ໃໝ່​ຕື່ມ ນອກ​ເໜືອ​ໄປ​ຈາກ​ຈຳ­ນວນ​ທີ່​ມີ​ແລ້ວ​ທ່ານ​ປະ­ທາ­ນາ­ທິ­ບໍ­ດີ ໄດ້​ເຈາະ​ຈົງ​ບັນ­ຫາ​ນີ້​ໃນ​ຄຳ​ປາ​ໄສ ເນື່ອງ​ໃນ​ໂອ­ກາດ​ວັນ​ຕຳ­ຫຼວດ ຄົບ­ຮອບ 117 ປີ ຂ່າວ​ບໍ່​ໄດ້​ບອກ​ຢ່າງ​ຈະ­ແຈ້ງ​ກ່ຽວ​ກັບ​ການ​ຕັດ­ສິນ​ໃຈ​ຂອງ​ທ່ານ​ປະ­ທາ­ນາ­ທິ­ບໍ­ດີ​ກ່ຽວ​ກັບ​ເລື່ອງ​ນີ້ ແຕ່​ກໍ່​ເປັນ​ທີ່​ສັງ­ເກດ​ວ່າ ອາດ​ເນື່ອງ​ມາ​ຈາກ​ບັນ­ຫາ​ການ​ຄຸ້ມ​ຄອງ​ການ​ສຳ​ປະ­ທານ ແລະ ການ​ບໍ­ລິ­ຫານ​ສູນ​ການ​ພະ­ນັນ ທີ່​ຈຳ­ເປັນ​ຕ້ອງ​ມີ​ການ​ປັບ­ປຸງ​ຄືນ­ໃໝ່.

ຂ່າວທີ່ກ່ຽວຂ້ອງ