ລາວ ກຽມຈັດແຂ່ງຂັນຍິງປືນ ໄອພີເອັດຊີນາໆຊາດ ເລໂວ 3

168 04 ກ.ຍ. 2018 ວົງຈອນກີລາ
ລາວ ກຽມຈັດແຂ່ງຂັນຍິງປືນ ໄອພີເອັດຊີນາໆຊາດ ເລໂວ 3

    ທ່ານ ພຸດ​ທະ​ສັກ ສຸກ​ອາ​ລຸນ ປະ­ທານ​ສະ­ໂມ­ສອນ​ຍິງ​ປືນ​ໄອ​ພີ​ເອັດ​ຊີ​ລາວ ຜູ້­ອຳ­ນວຍ­ການ​ສະ­ໜາມ​ເຝິກ​ກີ­ລາ​ຍິງ​ປືນ 5 ເມ­ສາ ໄດ້​ແຈ້ງ​ໃຫ້​ຊາບ​ວັນ​ທີ 30 ສິງ­ຫາ 2018 ວ່າ: ສປປ ລາວ ກໍ່​ຄື ສະ­ຫະ­ພັນ​ຍິງ​ປືນ​ແຫ່ງ​ຊາດ​ລາວ ຈະ​ຈັດ​ແຂ່ງ­ຂັນ​ກີ­ລາ​ຍິງ​ປືນ​ໄອ​ພີ​ເອັດ​ຊີ​ນາໆຊາດ ເລ​ໂວ 3 ຊີງ​ຂັນ​ທ່ານ​ນາ­ຍົກ­ລັດ­ຖະ­ມົນ­ຕີ ຄັ້ງ​ທີ 1 ປະ­ຈຳ​ປີ 2018 ຂຶ້ນ​ວັນ​ທີ 26-28 ຕຸ­ລາ 2018 ຢູ່​ສະ­ໜາມ​ເຝິກ​ກີ­ລາ​ຍິງ​ປືນ 5 ເມ­ສາ ເມືອງ​ໄຊ​ເຊດ​ຖາ ນະ­ຄອນ­ຫຼວງ​ວຽງ​ຈັນ ປັດ­ຈຸ­ບັນ​ໄດ້​ມີ​ການ​ກຽມ­ພ້ອມ 100% ເຊິ່ງ​ຈະ​ມີ​ການ​ແຂ່ງ­ຂັນ 6 ລາຍ­ການ ຄື: ປືນ​ສະ​ແຕນ​ດາດ ປືນ​ໂປ​ດັກ​ຊັນ ປືນ​ໂປ​ດັກ​ຊັນ​ອັອບ​ຕິກ ປືນ​ໂອ​ເພັນ ປືນ​ຣີ​ໂວ​ເວີ ແລະ ປືນ​ຄາດ​ຊິກ ແຂ່ງ­ຂັນ 15 ສະ­ໜາມ ແຕ່​ລະ​ສະ­ໜາມ​ໄດ້​ມີ​ການ​ປັບ­ປຸງ ແລະ ແປງ​ຮູບ​ແບບ​ການ​ແຂ່ງ­ຂັນ​ແຕກ​ຕ່າງ​ຈາກ​ປີ­ຜ່ານ­ມາ ໂດຍ​ຄາດ​ວ່າ​ຈະ​ມີ​ນັກ­ກີ­ລາ 100 ກວ່າ​ຄົນ ຈາກ​ຫຼາຍ​ກວ່າ 10 ປະ­ເທດ​ເຂົ້າ​ຮ່ວມ ເປັນ­ຕົ້ນ ລາວ ໄທ ສິງ­ກະ­ໂປ ເຂດປົກຄອງພິເສດມາ​ເກົາ ສປ ຈີນ ຟີ​ລິບ​ປິນ ສປ ຈີນ ແຊັກ​ບີ່ ແລະ ປະ­ເທດ​ອື່ນໆ ສະ­ເພາະ​ລາວ ຈະ​ສົ່ງ​ນັກ­ກີ­ລາ​ເຂົ້າ​ຮ່ວມ 30 ກວ່າ​ຄົນ.

    ກ່ອນ​ຈະ​ຈັດ­ການ​ແຂ່ງ­ຂັນ​ດັ່ງ­ກ່າວ ສະ­ໂມ­ສອນ​ຍິງ​ປືນ​ໄອ​ພີ​ເອັດ​ຊີ​ລາວ ຈະ​ໄດ້​ສົ່ງ​ນັກ­ກີ­ລາ​ຍິງ​ປືນ​ໄອ​ພີ​ເອັດ​ຊີ​ລາວ 10 ຄົນ ຍິງ 1 ຄົນ ເຂົ້າ​ຮ່ວມ​ທົດ​ສອບ​ຄວາມ​ສາ­ມາດ​ໃນ​ງານ​ແຂ່ງ­ຂັນ​ຍິງ​ປືນ​ໄອ​ພີ​ເອັດ​ຊີ​ນາໆຊາດ ເລ​ໂວ 4 ເຊິ່ງ​ຈະ​ຈັດ​ຂຶ້ນ​ກາງ​ເດືອນ​ກັນ­ຍາ 2018 ຢູ່​ປະ­ເທດ​ໄທ.

    ປັດ­ຈຸ­ບັນ ນັກ­ກີ­ລາ​ຍິງ​ປືນ​ໄອ​ພີ​ເອັດ​ຊີ​ລາວ 30 ກວ່າ​ຄົນ ໄດ້​ເຄື່ອນ​ໄຫວ​ເຝິກ­ຊ້ອມ​ຢູ່​ສະ­ໜາມ​ເຝິກ­ຊ້ອມ​ກີ­ລາ​ຍິງ​ປືນ 5 ເມ­ສາ ເປັນ​ປົກ­ກະ­ຕິ ໂດຍ​ຈະ​ຊ້ອມ​ສະ­ເພາະ​ວັນ​ເສົາ ແລະ ວັນ​ອາ­ທິດ ເນື່ອງ​ຈາກ​ນັກ­ກີ­ລາ​ສ່ວນ​ໃຫຍ່​ເປັນ​ນັກ­ທຸ­ລະ­ກິດ ແຕ່​ກໍ່​ເຊື່ອ​ໝັ້ນ​ວ່າ ການ​ແຂ່ງ­ຂັນ​ລາຍ­ການ ເລ​ໂວ 3 ນັກ­ກີ­ລາ​ລາວ​ຈະ​ສາ­ມາດ​ສ້າງ​ຜົນ­ງານ​ໄດ້​ໃນ​ລາຍ­ການ​ໃດ​ໜຶ່ງ ເພາະ​ໄລ­ຍະ​ຜ່ານ​ມາ ທ່ານ ອາ​ໂນ​ໄທ ເມືອງ​ມະ­ນີ ໄດ້​ເຂົ້າ​ຮ່ວມ​ແຂ່ງ­ຂັນ​ຍິງ​ປືນ​ໄອ​ພີ​ເອັດ​ຊີ​ລະ­ດັບ​ນາໆຊາດ ລາຍ­ການ​ຕ່າງໆ​ຢູ່​ປະ­ເທດ​ເພື່ອນ​ບ້ານ ແລະ ສາ­ມາດ​ຄວ້າ​ອັນ​ດັບ​ທີ່​ດີ ຫຼາຍ​ລາຍ­ການ​ມາ​ແລ້ວ.

ຂ່າວທີ່ກ່ຽວຂ້ອງ